ലോകത്തെ മുൾമുനയിൽ നിർത്തിയ മണിക്കൂറുകൾക്കൊടുവിൽ വെനസ്വേലൻ പ്രസിഡന്റ് നിക്കോളാസ് മഡുറോ അമേരിക്കൻ സൈന്യത്തിന്റെ പിടിയിലായി. ഇന്നലെ പുലർച്ചെ കാരക്കാസിലെ പ്രസിഡൻഷ്യൽ വസതിയിൽ യു.എസ് കമാൻഡോകൾ നടത്തിയ മിന്നലാക്രമണത്തിലാണ് മഡുറോയെയും ഭാര്യ സിലിയ ഫ്ലോറസിനെയും പിടികൂടിയത്. നിലവിൽ ഇവരെ യുദ്ധക്കപ്പലിൽ അമേരിക്കയിലേക്ക് കൊണ്ടുപോവുകയാണ്. മയക്കുമരുന്ന് കടത്ത് ഉൾപ്പെടെയുള്ള കുറ്റങ്ങൾ ചുമത്തി മഡുറോയെ ന്യൂയോർക്കിലെ കോടതിയിൽ വിചാരണ ചെയ്യുമെന്ന് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു.

​പുലർച്ചെ 1.50-ന് ഇന്ത്യൻ സമയം രാവിലെ 11.20-ഓടെയാണ് 'ഡെൽറ്റ ഫോഴ്സ്' ആക്രമണം ആരംഭിച്ചത്. 150-ഓളം വിമാനങ്ങളും ഹെലികോപ്റ്ററുകളും ഈ വൻ ദൗത്യത്തിൽ പങ്കെടുത്തു. കാരക്കാസിലെ ഫോർട്ട് ടിയൂണ സൈനിക താവളത്തിന് നേരെയായിരുന്നു പ്രധാന ആക്രമണം. വെനസ്വേലൻ സൈന്യം പ്രതിരോധിക്കാൻ ശ്രമിച്ചെങ്കിലും അത്യാധുനിക ആയുധങ്ങളുമായി എത്തിയ അമേരിക്കൻ സേനക്ക് മുന്നിൽ അവർക്ക് പിടിച്ചുനിൽക്കാനായില്ല.

​ലോകത്തെ ഏറ്റവും വലിയ എണ്ണ നിക്ഷേപമുള്ള രാജ്യങ്ങളിൽ ഒന്നാണ് വെനസ്വേല. മയക്കുമരുന്ന് വേട്ട എന്നതിലുപരി വെനസ്വേലയുടെ എണ്ണസമ്പത്ത് കൈക്കലാക്കുക എന്നതാണ് ട്രംപിന്റെ യഥാർത്ഥ ലക്ഷ്യമെന്ന് രാഷ്ട്രീയ നിരീക്ഷകർ കരുതുന്നു. ഹ്യൂഗോ ഷാവേസിന്റെ കാലം മുതൽ അമേരിക്കയുമായി ശത്രുതയിലായിരുന്ന ഇടത് ഭരണകൂടത്തെ ഇല്ലാതാക്കാൻ വർഷങ്ങളായി യു.എസ് പദ്ധതിയൊരുക്കുകയായിരുന്നു.മയക്കുമരുന്ന് ഭീകരത (Narco-terrorism) ആരോപിച്ച് 5 കോടി ഡോളർ തലയ്ക്ക് വിലയിട്ടിരുന്ന മഡുറോയെ ഒടുവിൽ അമേരിക്ക നേരിട്ട് പിടികൂടി.

​പുതിയ ഭരണസംവിധാനം വരുന്നത് വരെ വെനസ്വേലയുടെ ഭരണം യു.എസ് നിയന്ത്രിക്കും. ഇതിനോട് വൈസ് പ്രസിഡന്റ് ഡെൽസി റൊഡ്രിഗ്വെസ് സഹകരിക്കുമെന്ന് അറിയിച്ചിട്ടുണ്ട്.

​ അമേരിക്കയുടെ ഈ ഏകപക്ഷീയമായ സൈനിക നടപടിയെ റഷ്യയും ചൈനയും കടുത്ത ഭാഷയിൽ അപലപിച്ചു. ഇത് അന്താരാഷ്ട്ര നിയമങ്ങളുടെ ലംഘനമാണെന്ന് അവർ ആരോപിക്കുന്നു.
​അമേരിക്കൻ സൈന്യത്തിൽ ആൾനാശമില്ലെങ്കിലും കാരക്കാസിലെ ആക്രമണത്തിൽ എത്ര പേർ കൊല്ലപ്പെട്ടുവെന്ന് ഇപ്പോഴും വ്യക്തമല്ല. രാജ്യം നിലവിൽ കടുത്ത അടിയന്തരാവസ്ഥയിലാണ്.