തിരുവനന്തപുരം: കാന്തപുരം എ.പി. അബൂബക്കർ മുസ്ലിയാരുടെ വിവാദ പരാമർശത്തിൽ മുഖ്യമന്ത്രി വി.ഡി. സതീശന്റെ പ്രതികരണത്തിനെതിരെ പ്രതിഷേധം ശക്തമാകുന്നതിനിടെ എ.പി. വിഭാഗം നേതാക്കൾ മുഖ്യമന്ത്രിയെ നേരിൽ കണ്ടു. കാന്തപുരത്തിനെതിരായ പരാമർശം തിരുത്തണമെന്ന് നേതാക്കൾ മുഖ്യമന്ത്രിയോട് ആവശ്യപ്പെട്ടു. കൂടിക്കാഴ്ചയ്ക്ക് പിന്നാലെ ‘ആ പ്രസ്താവനയോട് യോജിപ്പില്ല’ എന്ന തലക്കെട്ടിൽ മുഖ്യമന്ത്രി ഫെയ്‌സ്ബുക്കിൽ പങ്കുവെച്ച വീഡിയോ പോസ്റ്റ് നീക്കുകയും ചെയ്തു.

ക്ലിഫ് ഹൗസിൽ നടന്ന കൂടിക്കാഴ്ചയിൽ കേരള മുസ്‌ലിം ജമാഅത്ത് സംസ്ഥാന ജനറൽ സെക്രട്ടറി സയ്യിദ് ഇബ്രാഹിം ഖലീൽ അൽ ബുഖാരി കടലുണ്ടി, പേരോട് അബ്ദുറഹ്‌മാൻ സഖാഫി എന്നിവർ ഉൾപ്പെടെയുള്ള നേതാക്കളാണ് പങ്കെടുത്തത്. പൊന്നാനി എംഎൽഎ കെ.പി. നൗഷാദ് അലിയും കൂടിക്കാഴ്ചയിൽ സന്നിഹിതനായിരുന്നു.

കാന്തപുരത്തിന്റെ പ്രസ്താവനയെ മുഖ്യമന്ത്രി തെറ്റായി വ്യാഖ്യാനിച്ചെന്നായിരുന്നു എ.പി. വിഭാഗത്തിന്റെ ആരോപണം. ഇതിനെതിരെ മുസ്‌ലിം ജമാഅത്ത് ഉൾപ്പെടെയുള്ള സംഘടനകൾ നേരത്തെ രംഗത്തെത്തിയിരുന്നു. മുഖ്യമന്ത്രിയുടെ പരാമർശം തിരുത്തണമെന്ന് ആവശ്യപ്പെട്ട് സംഘടനകൾ പ്രമേയവും പാസാക്കിയിരുന്നു.

‘19-ാം നൂറ്റാണ്ടിലെ കാര്യങ്ങൾ 21-ാം നൂറ്റാണ്ടിൽ പറയരുത്’

കാന്തപുരത്തിന്റെ പരാമർശത്തിനെതിരെ നേരത്തെ മുഖ്യമന്ത്രി രൂക്ഷമായ വിമർശനമാണ് ഉന്നയിച്ചത്. മതത്തെ തെറ്റായി വ്യാഖ്യാനിക്കുകയാണ് കാന്തപുരമെന്നും 19-ാം നൂറ്റാണ്ടിൽ പറയേണ്ട കാര്യങ്ങളാണ് 21-ാം നൂറ്റാണ്ടിൽ പറയുന്നതെന്നുമായിരുന്നു മുഖ്യമന്ത്രിയുടെ പ്രതികരണം.

പ്രവാചകന്റെ ഭാര്യ ഖദീജ വ്യാപാരിയായിരുന്നുവെന്നും ആയിഷ യുദ്ധത്തിൽ സൈന്യത്തെ നയിച്ചിരുന്നുവെന്നും ചൂണ്ടിക്കാട്ടിയ മുഖ്യമന്ത്രി, ബിൽക്കീസ് രാജ്ഞിയുടെ ഉദാഹരണവും മുന്നോട്ടുവെച്ചിരുന്നു. ഈ പരാമർശങ്ങളിലുള്ള അതൃപ്തി മുഖ്യമന്ത്രിയെ അറിയിക്കാനും പ്രസ്താവന തിരുത്തണമെന്ന് ആവശ്യപ്പെടാനുമാണ് എ.പി. വിഭാഗം നേതാക്കൾ നേരിട്ട് എത്തിയത്.

കാന്തപുരത്തിന് ജിഫ്രി തങ്ങളുടെ പിന്തുണ

അതിനിടെ കാന്തപുരത്തിന്റെ പ്രസ്താവനയെ പിന്തുണച്ച് സമസ്ത ഇ.കെ. വിഭാഗം അധ്യക്ഷൻ ജിഫ്രി മുത്തുക്കോയ തങ്ങളും രംഗത്തെത്തി. ഓരോ വ്യക്തിക്കും സ്വന്തം മതവിശ്വാസങ്ങൾ പ്രകടിപ്പിക്കാൻ അവകാശമുണ്ടെന്നും മതപരമായ വിശ്വാസങ്ങൾ പ്രകടിപ്പിക്കുന്നതിനെ പരിഹസിക്കുന്നത് ശരിയല്ലെന്നും അദ്ദേഹം പറഞ്ഞു.

മതപരമായ കാര്യങ്ങൾ പറയുന്നവരെ ചെറുതാക്കി കാണിക്കാനുള്ള ശ്രമം അംഗീകരിക്കാനാകില്ലെന്നും ജിഫ്രി മുത്തുക്കോയ തങ്ങൾ വ്യക്തമാക്കി. ഇതോടെ കാന്തപുരത്തിന്റെ പ്രസ്താവനയെ ചൊല്ലിയുള്ള വിവാദം മത-രാഷ്ട്രീയ മേഖലകളിലും കൂടുതൽ ചർച്ചയാകുകയാണ്.