​തിരുവനന്തപുരം: നെടുമങ്ങാട് ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി ശിക്ഷിച്ചതിനെത്തുടർന്ന്, 134-തിരുവനന്തപുരം നിയമസഭാ മണ്ഡലത്തിൽ നിന്നുള്ള പ്രതിനിധി ആന്റണി രാജു എം.എൽ.എയെ അയോഗ്യനാക്കി വിജ്ഞാപനം പുറപ്പെടുവിച്ചു. 2026 ജനുവരി 5-ാം തീയതി പുറത്തിറങ്ങിയ കേരള ഗസറ്റിലാണ് ഇത് സംബന്ധിച്ച ഔദ്യോഗിക അറിയിപ്പുള്ളത്.  

​അയോഗ്യതയിലേക്ക് നയിച്ച സാഹചര്യങ്ങൾ:

​കലണ്ടർ കേസ് നം. 811/2024-ൽ നെടുമങ്ങാട് ഫസ്റ്റ് ക്ലാസ് മജിസ്‌ട്രേറ്റ് കോടതി-I ആന്റണി രാജുവിനെ മൂന്ന് വർഷത്തെ സാധാരണ തടവിന് ശിക്ഷിച്ചിരുന്നു.  
​ഇതേത്തുടർന്ന്, 1951-ലെ ജനപ്രാതിനിധ്യ നിയമം (Representation of Peoples Act, 1951) വകുപ്പ് 8(3)പ്രകാരവും ഇതുമായി ബന്ധപ്പെട്ട സുപ്രീം കോടതി വിധികളുടെയും അടിസ്ഥാനത്തിലാണ് അദ്ദേഹത്തിന് നിയമസഭാംഗമായി തുടരാൻ അയോഗ്യത കൽപ്പിക്കപ്പെട്ടത്.  

​നിയമപരമായ പശ്ചാത്തലം:

ഭാരതീയ നിയമവ്യവസ്ഥയനുസരിച്ച്ജനപ്രതിനിധികൾ ക്രിമിനൽ കേസുകളിൽ രണ്ട് വർഷമോ അതിലധികമോ തടവിന് ശിക്ഷിക്കപ്പെട്ടാൽ അവർ ഉടനടി അയോഗ്യരാക്കപ്പെടും. 2013-ലെ സുപ്രീം കോടതിയുടെ ചരിത്രപരമായ ലില്ലി തോമസ് vs യൂണിയൻ ഓഫ് ഇന്ത്യ കേസ് വിധി പ്രകാരം, ശിക്ഷിക്കപ്പെടുന്ന നിമിഷം മുതൽ ജനപ്രതിനിധിയുടെ അംഗത്വം നഷ്ടമാകുന്നതാണ്. ഇതിന് മുൻപ് നിലനിന്നിരുന്ന മൂന്ന് മാസത്തെ അപ്പീൽ കാലാവധി എന്ന ആനുകൂല്യം ഈ വിധിയിലൂടെ റദ്ദാക്കപ്പെട്ടിരുന്നു.

അയോഗ്യനാക്കപ്പെട്ട സാഹചര്യത്തിൽ, 134-തിരുവനന്തപുരം സീറ്റ് 2026 ജനുവരി 3-ാം തീയതി മുതൽ ഒഴിഞ്ഞുകിടക്കുന്നതായി നിയമസഭാ സെക്രട്ടറി ഡോ. എൻ. കൃഷ്ണകുമാർ അറിയിച്ചു.  
​പതിനഞ്ചാം കേരള നിയമസഭയിലെ അംഗമായിരുന്നു ആന്റണി രാജു.