തിരുവനന്തപുരം: ലഹരി വിരുദ്ധ ബോധവത്കരണ ദിനത്തിൽ, നിലവിലെ ലഹരി വിരുദ്ധ പ്രവർത്തനങ്ങൾ വെറും ചടങ്ങുകളായി ഒതുങ്ങരുതെന്ന ശക്തമായ ആവശ്യം ഉയരുന്നു. ലഹരി പദാർത്ഥങ്ങളെക്കുറിച്ചുള്ള അറിവില്ലായ്മയല്ല, മറിച്ച് പ്രലോഭനങ്ങളും തെറ്റായ പ്രചാരണങ്ങളുമാണ് ലഹരി വ്യാപനത്തിന് പ്രധാന കാരണമെന്ന് വിദഗ്ദ്ധർ ചൂണ്ടിക്കാട്ടുന്നു. വെബ് സീരീസുകളും ചില സിനിമകളുമെല്ലാം 'പാർട്ടിയിലല്ലേ, രസമല്ലേ, ഒരിക്കലല്ലേ...' എന്ന ചിന്താഗതി യുവതലമുറയിൽ വളർത്തുന്നതായി പഠനങ്ങൾ പറയുന്നു.

ബോധവത്കരണ പരിപാടികൾ, റെയ്ഡുകൾ, ഡി-അഡിക്ഷൻ എന്നിവയിൽ മാത്രം ഒതുങ്ങുന്നതാണ് ഇപ്പോഴത്തെ പ്രവർത്തനങ്ങൾ. എന്നാൽ, സമപ്രായക്കാരുടെ ഇടപെടലുകളിലൂടെയും, യുവജന സംഘടനകളുടെ സജീവ പങ്കാളിത്തത്തിലൂടെയും മാത്രമേ ലഹരി സംസ്കാരത്തെ ഫലപ്രദമായി നേരിടാൻ സാധിക്കൂ. എൻ.ഡി.പി.എസ് നിയമങ്ങളിലെ പഴുതുകൾ പലരെയും രക്ഷപ്പെടുത്തുന്നതും, ലഹരി ചികിത്സാ കേന്ദ്രങ്ങളുടെ ശാസ്ത്രീയ മേൽനോട്ടമില്ലായ്മയും വലിയ വെല്ലുവിളികളാണ്.

കേരളത്തിൽ അഡിക്ഷൻ ചികിത്സയ്ക്കും, ഡി-അഡിക്ഷൻ കേന്ദ്രങ്ങളുടെ ശാസ്ത്രീയ മേൽനോട്ടത്തിനുമായി ഒരു മികച്ച കേന്ദ്രീകൃത സംവിധാനം അനിവാര്യമാണ്. ചികിത്സയ്ക്ക് ശേഷം ലഹരിയിലേക്ക് തിരിച്ചുപോകുന്നത് തടയാനുള്ള (Relapse prevention) പ്രവർത്തനങ്ങൾക്കും പ്രാധാന്യം നൽകണം. വൈദ്യശാസ്ത്രം, മനഃശാസ്ത്രം, സാമൂഹിക ശാസ്ത്രം എന്നിവയുടെ തത്വങ്ങൾ സമന്വയിപ്പിച്ച് ലഹരി വിരുദ്ധ പ്രവർത്തനങ്ങൾ നവീകരിക്കേണ്ടത് അത്യാവശ്യമാണ്. തദ്ദേശ സ്വയംഭരണ സ്ഥാപനങ്ങളുമായി ചേർന്ന് വാർഡ് തലങ്ങളിൽ പോലും ഇടപെടലുകൾ എത്തണം.
കേരളം ലഹരി ഉപയോഗിക്കുന്നവരുടെ നാടായി മാറുന്നത് തടയാൻ സുസ്ഥിരവും ഫലപ്രദവുമായ പ്രവർത്തനങ്ങൾ ആവശ്യമാണെന്നും, വെറുമൊരു വഴിപാടായി ഈ പ്രശ്നത്തെ സമീപിക്കരുതെന്നും മുന്നറിയിപ്പുണ്ട്.