കൊച്ചി: ബേപ്പൂര്‍ തീരത്തു നിന്നും 88 നോട്ടിക്കല്‍ മൈല്‍ അകലെ സിംഗപ്പൂര്‍ ഫ്‌ളാഗ് ചെയ്ത കണ്ടയ്‌നര്‍ കപ്പല്‍ വാന്‍ ഹായ് 503ല്‍ തീപിടുത്തമുണ്ടായതായി കോസ്റ്റ് ഗാര്‍ഡ് അറിയിച്ചു. രാവിലെ ഒന്‍പതരയ്ക്കായിരുന്നു അപകടം.
ഒരു കണ്ടെയ്‌നറില്‍ സ്‌ഫോടനവും തുടര്‍ന്ന് തീപിടുത്തവും ഉണ്ടാവുകയായിരുന്നു. ജൂണ്‍ ആറിന് 22 ജീവനക്കാരുമായി ശ്രീലങ്കയിലെ കൊളംബോ തുറമുഖത്ത് നിന്നാണ് കപ്പല്‍ ഇന്ത്യയിലെ മുംബൈയിലെ നവ ഷെവ തുറമുഖത്തേക്ക് പുറപ്പെട്ടത്. ജൂണ്‍ ഒന്‍പതിനായിരുന്നു കപ്പല്‍ ലക്ഷ്യത്തില്‍ എത്തേണ്ടിയിരുന്നത്.
വിവരം ലഭിച്ചതിനെത്തുടര്‍ന്ന ഇന്ത്യന്‍ കോസ്റ്റ് ഗാര്‍ഡ് ആവശ്യമായ പ്രവര്‍ത്തനങ്ങള്‍ നടത്തുകയും ജീവനക്കാര്‍ക്ക് രക്ഷാപ്രവര്‍ത്തനങ്ങള്‍ ഏകോപിപ്പിക്കുകയും ചെയ്തു. തീ മറ്റ് കണ്ടെയ്‌നറുകളിലേക്ക് പടര്‍ന്നതായും ജീവനക്കാര്‍ കപ്പല്‍ ലൈഫ് റാഫ്റ്റുകളിലേക്ക് ഉപേക്ഷിച്ചതായും റിപ്പോര്‍ട്ടുണ്ട്. മുംബൈയിലെ ഐസിജി മാരിടൈം റെസ്‌ക്യൂ കോര്‍ഡിനേഷന്‍ സെന്റര്‍ പ്രദേശത്ത് സ്ഥിതി ചെയ്യുന്ന എംവി വണ്‍ മാര്‍വലിനെ തിരിച്ചുവിട്ടു. ലൈഫ് ബോട്ടിലുണ്ടായിരുന്ന 18 ജീവനക്കാരില്‍ ഒരാള്‍ക്ക് ഗുരുതരമായി പരിക്കേറ്റതായി റിപ്പോര്‍ട്ടുണ്ട്. സ്‌ഫോടനത്തിനു ശേഷം നാല് ജീവനക്കാരെ കാണാതായിട്ടുണ്ട്. ഇവരില്‍ രണ്ടു പേര്‍ തായ്‌വാന്‍ സ്വദേശികളും ഓരോരുത്തര്‍ ഇന്തോനേഷ്യ, മ്യാന്‍മര്‍ സ്വദേശികളുമാണ്. തത്സമയ വിലയിരുത്തലുകള്‍ നടത്താന്‍ ഐസിജി ഡോര്‍ണിയര്‍ വിമാനം കപ്പലിന് മുകളില്‍ പറന്നിരുന്നു. നിലവില്‍ അപകടത്തിലായ കപ്പലിനെ നിയന്ത്രണവിധേയമാക്കാന്‍ ഇന്ത്യന്‍ കോസ്റ്റ് ഗാര്‍ഡ് അഗ്നിശമന ശ്രമങ്ങള്‍ ആരംഭിച്ചിട്ടുണ്ട്. തീയുടെ സ്വഭാവവും അഗ്നിശമന പ്രവര്‍ത്തനങ്ങളില്‍ ഉണ്ടാകാവുന്ന അപകടസാധ്യതകളും നിര്‍ണ്ണയിക്കാന്‍ കപ്പലിലുള്ള ചരക്കിന്റെ വിശദാംശങ്ങള്‍ പരിശോധിക്കുന്നുണ്ട്.
സാഹചര്യത്തിനനുസരിച്ച് പ്രതികരണ പദ്ധതി തയ്യാറാക്കുന്നതിനായി ഐസിജി ഡിജി ഷിപ്പിംഗ്, സംസ്ഥാന ഭരണകൂടം, കപ്പല്‍ ഉടമകള്‍ എന്നിവരുമായി ഏകോപനം പുലര്‍ത്തുന്നു. നിലവില്‍, കപ്പല്‍ തീരത്ത് നിന്ന് വളരെ അകലെയാണ്, കൂടാതെ കപ്പല്‍ തീരത്തേക്ക് അടുക്കുന്നത് തടയാന്‍ എല്ലാ ശ്രമങ്ങളും നടത്തും.
