ദോഹ: ഖത്തറിലെ പ്രമുഖ ഇന്ധന ഉൽപ്പാദന കേന്ദ്രങ്ങൾക്ക് നേരെ വീണ്ടും മിസൈൽ ആക്രമണം. ഖത്തർ എനർജിയുടെ ലിക്വിഫൈഡ് നാച്ചുറൽ ഗ്യാസ് (LNG) പ്ലാന്റുകൾക്ക് നേരെ വ്യാഴാഴ്ച പുലർച്ചെയാണ് ആക്രമണമുണ്ടായത്. ആക്രമണത്തിൽ പ്ലാന്റുകൾക്ക് വ്യാപകമായ നാശനഷ്ടങ്ങൾ സംഭവിച്ചതായും വലിയ രീതിയിലുള്ള തീപിടുത്തമുണ്ടായതായും ഖത്തർ എനർജി ഔദ്യോഗിക പ്രസ്താവനയിൽ സ്ഥിരീകരിച്ചു.ബുധനാഴ്ച (മാർച്ച് 18) റാസ് ലഫാൻ ഇൻഡസ്ട്രിയൽ സിറ്റിയിലെ പേൾ ജിടിഎൽ (Pearl GTL) പ്ലാന്റിന് നേരെ നടന്ന ആക്രമണത്തിന് പിന്നാലെയാണ് വ്യാഴാഴ്ച പുലർച്ചെ എൽഎൻജി കേന്ദ്രങ്ങളെ ലക്ഷ്യം വച്ച് വീണ്ടും മിസൈലുകൾ എത്തിയത്. കഴിഞ്ഞ ദിവസത്തെ ആക്രമണത്തിലും പ്ലാന്റിന് കനത്ത നാശനഷ്ടങ്ങൾ സംഭവിച്ചിരുന്നു.ആക്രമണം നടന്നയുടൻ തന്നെ എമർജൻസി റെസ്‌പോൺസ് ടീമുകൾ സ്ഥലത്തെത്തി തീ നിയന്ത്രണവിധേയമാക്കാനുള്ള നടപടികൾ ആരംഭിച്ചു. പ്ലാന്റുകൾക്ക് കനത്ത തകരാറുകൾ സംഭവിച്ചിട്ടുണ്ടെങ്കിലും, നിലവിൽ ആർക്കും പരിക്കേറ്റതായോ ജീവഹാനി സംഭവിച്ചതായോ റിപ്പോർട്ടുകളില്ല.ലോകത്തിലെ ഏറ്റവും വലിയ എൽഎൻജി കയറ്റുമതി രാജ്യങ്ങളിലൊന്നായ ഖത്തറിലെ ഊർജ്ജ കേന്ദ്രങ്ങൾ ലക്ഷ്യം വെച്ചുള്ള ഈ ആക്രമണങ്ങൾ ആഗോള ഇന്ധന വിപണിയിൽ വലിയ ആശങ്കയ്ക്ക് കാരണമായിട്ടുണ്ട്. സ്ഥിതിഗതികൾ നിരീക്ഷിച്ചു വരികയാണെന്നും കൂടുതൽ വിവരങ്ങൾ ലഭ്യമാകുന്ന മുറയ്ക്ക് കൈമാറുമെന്നും ഖത്തർ എനർജി അറിയിച്ചു.
