ഭർതൃപീഡനത്തെ തുടർന്ന് കോളജ് അധ്യാപികയായ യുവതി ആത്മഹത്യ ചെയ്തു. ആന്ധ്രപ്രദേശിലെ കൃഷ്ണ ജില്ലയിലെ കലവപമുല ഗ്രാമത്തിലാണ് സംഭവം. ശ്രീവിദ്യ എന്ന ഇരുപത്തിനാലുകാരിയാണ് ജീവനൊടുക്കിയത്. സ്വകാര്യ കോളേജിൽ അധ്യാപികയാണ് ശ്രീവിദ്യ. ആറുമാസം മുൻപായിരുന്നു വില്ലേജ് സർവേയറായ രാംബാബു ശ്രീവിദ്യയെ വിവാഹം കഴിച്ചത്.
വിവാഹം കഴിഞ്ഞ് ഒരുമാസമായപ്പോൾ മുതൽ രാംബാബുവിൽനിന്ന് പീഡനം അനുഭവിക്കേണ്ടി വന്നിരുന്നതായി ശ്രീവിദ്യയുടെ ആത്മഹത്യക്കുറിപ്പിലുണ്ട്. താൻ അനുഭവിച്ചിരുന്ന പീഡനങ്ങളേക്കുറിച്ച് ശ്രീവിദ്യ കത്തിൽ വ്യക്തമാക്കുന്നുണ്ട്. മദ്യപിച്ച് വീട്ടിലെത്തുന്ന രാംബാബു, ശാരീരികമായി ആക്രമിക്കുകയും അസഭ്യം പറയുകയും ചെയ്തിരുന്നു. തന്നെ അപഹസിക്കുകയും മറ്റൊരു സ്ത്രീയുടെ മുന്നിൽവെച്ച് ഒന്നിനുംകൊള്ളാത്തവളെന്ന് പരിഹസിക്കുകയും ചെയ്തു. തല ഇടിപ്പിക്കുകയും മുതുകിൽ മർദിക്കുകയും ചെയ്തിരുന്നെന്നും ശ്രീവിദ്യയുടെ കുറിപ്പിലുണ്ട്. ഇത്തവണ രാഖി കെട്ടാൻ താനുണ്ടാവില്ലെന്ന് സഹോദരനോട് ശ്രീവിദ്യ കുറിപ്പിൽ പറയുന്നു.
