ബെംഗളൂരു: ഉത്സവകാലത്തെ ഡെലിവറി തിരക്ക് മുന്നിൽകണ്ട് ആമസോൺ ഇന്ത്യ രാജ്യത്ത് 50 പുതിയ ‘ആശ്രയ’ വിശ്രമകേന്ദ്രങ്ങൾ കൂടി ആരംഭിക്കും. ഇതോടെ രാജ്യത്തെ ആമസോൺ ആശ്രയ കേന്ദ്രങ്ങളുടെ എണ്ണം 200 ആയി ഉയരും. 2026 അവസാനത്തോടെ 250 കേന്ദ്രങ്ങളെന്ന ലക്ഷ്യത്തിലേക്കാണ് കമ്പനി നീങ്ങുന്നത്. ബെംഗളൂരുവിൽ രണ്ട് മൊബൈൽ ആശ്രയ വാനുകൾക്കും തുടക്കമിട്ടു. ഡൽഹി എൻ.സി.ആർ., മുംബൈ, ഹൈദരാബാദ് എന്നിവയ്ക്ക് ശേഷം മൊബൈൽ ആശ്രയ സേവനം ലഭിക്കുന്ന നാലാമത്തെ നഗരമാണ് ബെംഗളൂരു.

2024ൽ ഡൽഹി എൻ.സി.ആറിൽ ആരംഭിച്ച ആശ്രയ കേന്ദ്രങ്ങൾ എല്ലാ ഡെലിവറി ഡ്രൈവർമാർക്കും സൗജന്യമായി ഉപയോഗിക്കാം; അവർ ആമസോണിനായി ജോലി ചെയ്യുന്നവരായിരിക്കണമെന്നില്ല. എയർ കണ്ടീഷൻഡ് ഇരിപ്പിടങ്ങൾ, കുടിവെള്ളം, മൊബൈൽ ചാർജിങ് സൗകര്യം, വൃത്തിയുള്ള ശുചിമുറികൾ, പ്രഥമശുശ്രൂഷാ കിറ്റുകൾ, വിശ്രമിക്കാനുള്ള സൗകര്യം എന്നിവ കേന്ദ്രങ്ങളിലുണ്ട്. ഒരേസമയം 10–15 പേർക്ക് ഉപയോഗിക്കാവുന്ന ഓരോ കേന്ദ്രത്തിലും ഓരോ സന്ദർശനത്തിനും 30 മിനിറ്റ് വരെ സൗജന്യമായി വിശ്രമിക്കാം. രാവിലെ 9 മുതൽ വൈകിട്ട് 7 വരെ പ്രവർത്തിക്കുന്ന കേന്ദ്രങ്ങൾ ഗൂഗിൾ മാപ്‌സിലും ലഭ്യമാണ്.

ഡെലിവറി റൂട്ടുകളിലെ തിരക്കേറിയ മേഖലകളിൽ ഡ്രൈവർമാർക്ക് വിശ്രമവും കുടിവെള്ളവും ലഭ്യമാക്കുന്നതിനാണ് മൊബൈൽ ആശ്രയ വാനുകൾ ഒരുക്കിയിരിക്കുന്നത്. എയർ കണ്ടീഷൻഡ് ഇരിപ്പിടങ്ങൾ, കുടിവെള്ളം, സൗജന്യ വൈ-ഫൈ, മൊബൈൽ ചാർജിങ് സൗകര്യം എന്നിവ വാനുകളിലുണ്ട്. 2024ലെ പരീക്ഷണാടിസ്ഥാനത്തിലുള്ള തുടക്കത്തിൽ നിന്ന് 2025ൽ 16 നഗരങ്ങളിലായി 100 കേന്ദ്രങ്ങളിലേക്കും 2026 മേയിൽ 150 കേന്ദ്രങ്ങളിലേക്കും ആശ്രയ ശൃംഖല വികസിപ്പിച്ചിരുന്നു. സെപ്റ്റംബറിൽ പ്രഖ്യാപിച്ച 50 പുതിയ കേന്ദ്രങ്ങൾ കൂടി വരുന്നതോടെ എണ്ണം 200 ആകും. രാജ്യത്തെ ഇ-കൊമേഴ്‌സ്, ലോജിസ്റ്റിക്‌സ് മേഖലയിലെ എല്ലാ ഡെലിവറി ഡ്രൈവർമാർക്കും തുറന്നിരിക്കുന്ന വ്യവസായത്തിലെ ആദ്യ സംരംഭമായാണ് ആശ്രയയെ ആമസോൺ അവതരിപ്പിക്കുന്നത്.

Photo Courtesy - Google