തിരുവനന്തപുരം: ഔഷധി ചെയർപേഴ്സണായിരിക്കെ സ്ഥാപനത്തിന്റെ ചെലവിൽ സൗന്ദര്യചികിത്സ നടത്തിയെന്ന ആരോപണം നിഷേധിച്ച് ശോഭന ജോർജ്. ഔഷധിയിൽ താൻ യാതൊരു ചികിത്സയും നടത്തിയിട്ടില്ലെന്നും ഇതിന് തെളിവായി രേഖകളുണ്ടെങ്കിൽ പുറത്തുവിടണമെന്നും അവർ ആവശ്യപ്പെട്ടു.
മുട്ടയും ചെമ്പരത്തിപ്പൂമൊട്ടും ഉപയോഗിച്ച് സൗന്ദര്യം വർധിപ്പിക്കാനാകുമോയെന്നും ശോഭന ജോർജ് ചോദിച്ചു. നിയമസഭയിൽ തനിക്കെതിരെ വ്യാജ ആരോപണങ്ങൾ ഉന്നയിച്ചെന്നാരോപിച്ച് വിപി സജീന്ദ്രൻ എംഎൽഎയ്ക്കെതിരെ സ്പീക്കർക്ക് പരാതി നൽകുമെന്നും അവർ വ്യക്തമാക്കി.
അതേസമയം, ഔഷധി ചെയർപേഴ്സണായിരുന്ന കാലത്ത് ശോഭന ജോർജ് സ്ഥാപനത്തിന്റെ ചെലവിൽ അനധികൃത സൗന്ദര്യചികിത്സ നടത്തിയെന്നാണ് ആരോപണം. ഇതുമായി ബന്ധപ്പെട്ട ആഭ്യന്തര അന്വേഷണ റിപ്പോർട്ടിൽ മൂന്ന് കിലോ ചെമ്പരത്തിപ്പൂമൊട്ടും കോഴിമുട്ടകളും ഉപയോഗിച്ചതായി പരാമർശിക്കുന്നുണ്ടെന്നാണ് വിവരം.
ഔഷധിയുടെ പഞ്ചകർമ ആശുപത്രിയിലെ ഡീലക്സ് എസി മുറിയിലായിരുന്നു ചികിത്സയെന്നാണ് ആരോപണം. ഇതിനായി സ്ഥാപനത്തിന്റെ ഔദ്യോഗിക ഫണ്ടും ഡോക്ടർമാരുടെ സേവനവും ദുരുപയോഗം ചെയ്തതായും അന്വേഷണത്തിൽ കണ്ടെത്തിയെന്നാണ് റിപ്പോർട്ടുകൾ. എന്നാൽ, തനിക്കെതിരായ ആരോപണങ്ങൾ ശോഭന ജോർജ് പൂർണമായും നിഷേധിച്ചു.
