കൊച്ചി: സാധുവായ വിവാഹബന്ധത്തിൽ ജനിക്കുന്ന ഒരു കുട്ടിക്ക്, ഭർത്താവ് പിതൃത്വം നിഷേധിച്ചതുകൊണ്ടുമാത്രം യാന്ത്രികമായി ഡി.എൻ.എ പരിശോധന നടത്താൻ ഉത്തരവിടാനാകില്ലെന്ന് കേരള ഹൈക്കോടതി വ്യക്തമാക്കി. പ്രസക്തമായ കാലയളവിൽ ദമ്പതികൾ തമ്മിൽ ലൈംഗിക ബന്ധത്തിനുള്ള അവസരമില്ലായിരുന്നു  എന്ന് തെളിയിക്കുന്ന വ്യക്തമായ വാദങ്ങളും പ്രഥമദൃഷ്ട്യാ തെളിവുകളും ആവശ്യമാണ്.
​ഭാര്യയും പ്രായപൂർത്തിയാകാത്ത കുട്ടിയും ചേർന്ന് ജീവനാംശവും സ്വർണാഭരണങ്ങളും ആവശ്യപ്പെട്ട് ഗാർഹിക പീഡന നിയമപ്രകാരം നൽകിയ ഹർജിയിൽ ഡി.എൻ.എ പരിശോധന നടത്തണമെന്ന ആവശ്യം വടക്കാഞ്ചേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി നിരസിച്ചിരുന്നു. ഇതിനെതിരെ ഭർത്താവ് സമർപ്പിച്ച ഹർജി ജസ്റ്റിസ് ജോബിൻ സെബാസ്റ്റ്യൻ തള്ളിക്കൊണ്ടാണ് ഈ നിരീക്ഷണം നടത്തിയത്.
​ ബന്ധപ്പെട്ട കാലയളവിൽ ഭാര്യാഭർത്താക്കന്മാർ തമ്മിൽ അടുപ്പത്തിലാകാൻ അവസരമില്ലായിരുന്നു എന്ന് സ്ഥാപിക്കുന്ന വസ്തുതകൾ ഇല്ലാത്തിടത്തോളം കാലം, 1872-ലെ ഇന്ത്യൻ എവിഡൻസ് ആക്ട് സെക്ഷൻ 112 പ്രകാരമുള്ള കുട്ടിയുടെ നിയമപരമായ പൈതൃക സംരക്ഷണം (presumption of legitimacy) കുട്ടിയുടെ അനുകൂലമായി നിലനിൽക്കും.
​ തർക്കം തീർപ്പാക്കുന്നതിന് അത്യന്തം അനിവാര്യമായ ഉചിതമായ കേസുകളിൽ മാത്രമേ ഡി.എൻ.എ പരിശോധനയ്ക്ക് ഉത്തരവിടാൻ സാധിക്കൂ.
 പരിശോധനയ്ക്ക് കക്ഷികൾ മുൻപ് മധ്യസ്ഥ ചർച്ചയിൽ സമ്മതിച്ചിരുന്നു എന്ന ഭർത്താവിന്റെ വാവാദവും കോടതി തള്ളി. നിയമത്തിനോ പൊതുതാൽപ്പര്യത്തിനോ എതിരായ കാര്യങ്ങളിൽ കക്ഷികളുടെ സമ്മതംകൊണ്ട് മാത്രം കോടതിക്ക് ഉത്തരവിടാനാകില്ലെന്ന് കോടതി വ്യക്തമാക്കി.
​മജിസ്ട്രേറ്റ് കോടതിയുടെ ഉത്തരവ് ന്യായമാണെന്ന് കണ്ടെത്തിയ ഹൈക്കോടതി, ഹർജി തള്ളിക്കൊണ്ട് ഉത്തരവിടുകയായിരുന്നു.