ദോഹ: പൊതുഗതാഗത സംവിധാനം കൂടുതൽ ശക്തമാക്കുന്നതിന്റെ ഭാഗമായി അൽ വക്ര ബസ് സ്റ്റേഷനിൽ നിന്ന് മണിക്കൂറിൽ 50 ഇലക്ട്രിക് ബസുകൾ സർവീസ് നടത്താൻ സജ്ജമായതായി ഖത്തർ ഗതാഗത മന്ത്രാലയം അറിയിച്ചു. മന്ത്രാലയത്തിന്റെ ഔദ്യോഗിക 'എക്സ്' (X) അക്കൗണ്ടിലൂടെയാണ് ഇക്കാര്യം വ്യക്തമാക്കിയത്.
രാജ്യത്തെ പൊതുഗതാഗത ബസ് അടിസ്ഥാനസൗകര്യ വികസന പദ്ധതിയിലെ 8 പ്രധാന സ്റ്റേഷനുകളിലൊന്നാണ് അൽ വക്ര.115,108 ചതുരശ്ര മീറ്റർ വിസ്തീർണ്ണത്തിൽ നിർമ്മിച്ച സ്റ്റേഷനിൽ 10 ബസ് പാർക്കിംഗ് ഏരിയകൾ ലഭ്യമാണ്.
ദിവസേന 11,000 യാത്രക്കാരെ ഉൾക്കൊള്ളാൻ ശേഷിയുള്ള സ്റ്റേഷനിൽ നിന്ന് 9 പ്രധാന കേന്ദ്രങ്ങളിലേക്ക് സർവീസുകൾ ഉണ്ടാകും.ബസുകൾക്ക് ആവശ്യമായ ഇലക്ട്രിക് ചാർജിംഗ് സാങ്കേതികവിദ്യ, ടിക്കറ്റ് കൗണ്ടർ, പാസഞ്ചർ വെയ്റ്റിംഗ് ഏരിയ, ഭരണനിർവ്വഹണ ഓഫീസുകൾ, പ്രാർത്ഥനാ മുറി, വാണിജ്യ കേന്ദ്രങ്ങൾ എന്നിവ സ്റ്റേഷനിൽ സജ്ജീകരിച്ചിട്ടുണ്ട്.
