ദോഹ: അന്താരാഷ്ട്ര തലത്തിൽ പ്രശസ്തമായ ന്യൂയോർക്ക് ഫെസ്റ്റിവൽസ് ടിവി & ഫിലിം അവാർഡിൽ (New York Festivals TV & Film Awards 2026) വൻ നേട്ടവുമായി അൽ ജസീറ മീഡിയ നെറ്റ്വർക്ക്. വിവിധ വിഭാഗങ്ങളിലായി 12 പുരസ്കാരങ്ങളാണ് അൽ ജസീറ സ്വന്തമാക്കിയത്. മെയ് 21-ന് നടന്ന വെർച്വൽ ചടങ്ങിലാണ് ജേതാക്കളെ പ്രഖ്യാപിച്ചത്.
അൽ ജസീറ അറബിക് ചാനൽ രണ്ട് ഗോൾഡ് അവാർഡുകളും ഒരു ബ്രോൺസ് അവാർഡും സ്വന്തമാക്കിയപ്പോൾ, അൽ ജസീറ ഇംഗ്ലീഷ് ചാനൽ രണ്ട് ഗോൾഡ്, രണ്ട് സിൽവർ, അഞ്ച് ബ്രോൺസ് അവാർഡുകൾ വീതം കരസ്ഥമാക്കി. സിറിയയിലെ ആഭ്യന്തര സംഭവവികാസങ്ങളെക്കുറിച്ചുള്ള ഡോക്യുമെന്ററികളാണ് അറബിക് ചാനലിനെ അവാർഡിന് അർഹമാക്കിയത്. ഇന്ത്യ, ചൈന, വിയറ്റ്നാം, ഫിലിപ്പീൻസ്, ഫലസ്തീൻ എന്നിവിടങ്ങളിൽ നിന്നുള്ള മനുഷ്യത്വപരമായ കഥകളും വാർത്താ കവറേജുകളുമാണ് ഇംഗ്ലീഷ് ചാനലിന് നേട്ടമുണ്ടാക്കിക്കൊടുത്തത്.ഭൂമിശാസ്ത്രപരമോ സാംസ്കാരികമോ ആയ യാതൊരുവിധ മുൻവിധികളുമില്ലാതെ, സത്യം പുറത്തുകൊണ്ടുവരാനും ലോകമെമ്പാടുമുള്ള മനുഷ്യരുടെ കഥകൾ വിളിച്ചുപറയാനുമുള്ള തങ്ങളുടെ നിരന്തരമായ ശ്രമങ്ങൾക്കുള്ള അംഗീകാരമാണ് ഈ അവാർഡുകളെന്ന് അൽ ജസീറ ഇംഗ്ലീഷ് മാനേജിംഗ് ഡയറക്ടർ ഈസ അലി പറഞ്ഞു.
കഴിഞ്ഞ 60 വർഷത്തിലേറെയായി ആഗോളതലത്തിലെ മികച്ച ദൃശ്യമാധ്യമ ഉള്ളടക്കങ്ങളെ ആദരിക്കുന്ന ന്യൂയോർക്ക് ഫെസ്റ്റിവൽസിൽ, തുടർച്ചയായി ഒൻപതാം തവണയും അൽ ജസീറ ഇംഗ്ലീഷിനെ 'ചാനൽ ഓഫ് ദി ഇയർ' (Channel of the Year) ആയി തെരഞ്ഞെടുത്തിരുന്നു എന്നതും ഈ മാധ്യമശൃംഖലയുടെ ആഗോള സ്വാധീനം വ്യക്തമാക്കുന്നു.
