ദോഹ: 47-ാമത് ലോക സൈനിക പാരച്യൂട്ടിംഗ് ചാമ്പ്യൻഷിപ്പ് (CISM 2025) ഉദ്ഘാടനച്ചടങ്ങിന്റെ ഭാഗമായി എയർ സ്പോർട്സ് മ്യൂസിയം ദോഹയിൽ ഉദ്ഘാടനം ചെയ്തു. ഉപപ്രധാനമന്ത്രിയും പ്രതിരോധ കാര്യങ്ങളുടെ രാജ്യ മന്ത്രിയുമായ ഷെയ്ഖ് സൌദ് ബിൻ അബ്ദുറഹ്മാൻ ബിൻ ഹസ്സൻ അൽ താനിയും ഖത്തർ ഒളിമ്പിക് കമ്മിറ്റി പ്രസിഡന്റായ ഷെയ്ഖ് ജോവാൻ ബിൻ ഹമദ് അൽ താനിയും ചേർന്നാണ് ഉദ്ഘാടനം നിർവഹിച്ചത്.
വ്യാപകമായ അന്താരാഷ്ട്ര കായികമേളകൾ സംഘടിപ്പിക്കുന്നതിലും ആതിഥ്യം വഹിക്കുന്നതിലും ഖത്തർ കൈവരിച്ച വിജയപഥത്തിലെ മറ്റൊരു വലിയ നേട്ടമായാണ് ഈ മ്യൂസിയത്തിന്റെ ആരംഭം കണക്കാക്കുന്നത്.
ഇതിനിടെ, ഏറ്റവും വലിയ സൈനിക പാരച്യൂട്ട് എയർ ഡിസ്പ്ലേ വിജയകരമായി സംഘടിപ്പിച്ചതിനുള്ള ഗിന്നസ് വേൾഡ് റെക്കോർഡിന്റെ സർട്ടിഫിക്കറ്റ് ഷെയ്ഖ് സൌദിന് ഗിന്നസ് പ്രതിനിധി എമ്മ ബ്രെയിൻ കൈമാറി. നിരവധി രാജ്യാന്തര ടീമുകളുടെ പങ്കാളിത്തത്തോടെ, അന്താരാഷ്ട്ര നിലവാരങ്ങൾ പാലിച്ചുകൊണ്ടാണ് ഈ റെക്കോർഡ് നേടാനായത്.
ഗിന്നസ് വേൾഡ് റെക്കോർഡ്സ് പ്രതിനിധി ഈ നേട്ടം ഖത്തറിന്റെ പേരിൽ രേഖപ്പെടുത്തുന്നതിൽ സന്തോഷം പ്രകടിപ്പിച്ചു. ഉയർന്ന പ്രൊഫഷണലിസവും അതുല്യമായ സംഘാടന നിലവാരവുമാണ് ഈ പരിപാടിയെ വേറിട്ട് നിൽപ്പിക്കുന്നതെന്ന് അവർ അഭിനന്ദിച്ചു.
