ഗുഹാവത്തി: ചാരപ്രവർത്തനം നടത്തിയ സംഭവത്തിൽ വ്യോമസേന ജീവനക്കാരൻ അറസ്റ്റിൽ. പ്രയാഗ്‌രാജ് സ്വദേശിയായ സുമിത് കുമാർ (36) എന്നയാളാണ് പിടിയിലായത്. വ്യോമസേനയിലെ സിവിലിയൻ വിഭാഗത്തിലെ ജീവനക്കാരനാണ് ഇയാൾ. ഇന്ത്യൻ വ്യോമസേനയുമായി ബന്ധപ്പെട്ട സുപ്രധാന വിവരങ്ങൾ പാകിസ്ഥാൻ ചാരസംഘടനയ്ക്ക് കൈമാറിയെന്നാരോപിച്ചാണ് ഇയാളെ പിടികൂടിയത്. അസമിൽ നിന്നാണ് ഇയാളെ രാജസ്ഥാൻ ഇന്റലിജൻസ് വിഭാഗം അറസ്റ്റ് ചെയ്തത്.
2026 ജനുവരിയിൽ ജയ്‌സാൽമീർ സ്വദേശിയായ ഝബർ റാമിനെ കസ്റ്റഡിയിലെടുത്തിരുന്നു. ഇയാളെ ചോദ്യം ചെയ്തതിലൂടെ ലഭിച്ച സൂചനകളാണ് അന്വേഷണം സുമിത് കുമാറിലേക്കെത്താൻ കാരണമായത്. സുമിത് കുമാർ അസമിലെ ദിബ്രുഗഡ് ജില്ലയിലെ ചബുവ എയർഫോഴ്‌സ് സ്റ്റേഷനിൽ മൾട്ടി ടാസ്‌കിംഗ് സ്റ്റാഫ് ആയി ജോലി ചെയ്തു വരികയായിരുന്നു. ഈ പദവി ഉപയോഗപ്പെടുത്തി വ്യോമസേനയുടെ രഹസ്യ വിവരങ്ങൾ കൈക്കലാക്കുകയും അവ പാകിസ്ഥാൻ ചാര ഏജൻസികളുമായി പങ്കുവെച്ചതായും അന്വേഷണസംഘം വ്യക്തമാക്കുന്നു.
സോഷ്യൽ മീഡിയ പ്ലാറ്റ്‌ഫോമുകൾ വഴിയാണ് ഇയാൾ പാകിസ്ഥാൻ ഹാൻഡ്‌ലർമാരുമായി ബന്ധം പുലർത്തിയതെന്നും, 2023 മുതൽ തന്നെ ചാരപ്രവർത്തനത്തിൽ ഏർപ്പെട്ടിരുന്നുവെന്നും ഉദ്യോഗസ്ഥർ പറഞ്ഞു. പണത്തിന് വേണ്ടി തന്ത്രപ്രധാന വിവരങ്ങൾ ചോർത്തിയതായും അന്വേഷണത്തിൽ വ്യക്തമായി. സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് അധികൃതർ അറിയിച്ചു.
