​ദോഹ: ഖത്തർ മീഡിയ സിറ്റിയും ഉപഗ്രഹ വിതരണ കമ്പനിയായ ഈഷൈൽസാറ്റും (Es'hailSat) ചേർന്ന് മീഡിയ സിറ്റിയിൽ പ്രവർത്തിക്കുന്ന കമ്പനികൾക്കായി പ്രത്യേക ഓഫറുകളും ഉപഗ്രഹ അധിഷ്ഠിത സേവനങ്ങളും പ്രഖ്യാപിച്ചു. ആംസ്റ്റർഡാമിൽ നടന്ന ആഗോള ബ്രോഡ്കാസ്റ്റ് ആന്റ് മീഡിയ ടെക്നോളജി മേളയായ 'ഐ.ബി.സി 2026' (IBC 2026)-ന്റെ ഇടവേളയിലാണ് ഇരുസ്ഥാപനങ്ങളും ചേർന്ന് പദ്ധതി ഔദ്യോഗികമായി പുറത്തിറക്കിയത്.
​ധാരണ പ്രകാരം മീഡിയ സിറ്റിയുടെ ലൈസൻസുള്ള കമ്പനികൾക്ക് ഈഷൈൽസാറ്റിന്റെ ഉപഗ്രഹ സാങ്കേതികവിദ്യ, ഡയറക്ട്-ടു-ഹോം (DTH) പ്രക്ഷേപണം, ബ്രോഡ്‌ബാൻഡ്, എന്റർപ്രൈസ് കണക്റ്റിവിറ്റി, ഖത്തറിലെ ടയർ-IV ISO സർട്ടിഫൈഡ് ടെലിപോർട്ട് സൗകര്യങ്ങൾ എന്നിവ മുൻഗണനാടിസ്ഥാനത്തിൽ ലഭ്യമാകും. കൂടാതെ ഡാറ്റാ സെന്റർ സപ്പോർട്ട്, ആൻ്റിന ഹോസ്റ്റിംഗ്, പ്ലേഔട്ട്, മീഡിയ അസറ്റ് മാനേജ്‌മെന്റ് തുടങ്ങിയ അധിക സേവനങ്ങളും കുറഞ്ഞ ചെലവിൽ ഉറപ്പാക്കും.
​ടെലിവിഷൻ-റേഡിയോ ചാനലുകൾ, ഒ.ടി.ടി (OTT) ഡിജിറ്റൽ മീഡിയ പ്ലാറ്റ്‌ഫോമുകൾ, പ്രൊഡക്ഷൻ കമ്പനികൾ, സ്റ്റാർട്ടപ്പുകൾ എന്നിവയുൾപ്പെടെയുള്ള മാധ്യമ സാങ്കേതിക മേഖലയിലെ വിവിധ സംരംഭങ്ങൾക്ക് ഈ സഹകരണം ഏറെ പ്രയോജനം ചെയ്യും.
​മീഡിയ സിറ്റി ഖത്തർ സി.ഇ.ഒ ഹമദ് ഉമർ അൽ മന്നായി, ഈഷൈൽസാറ്റ് സി.ഇ.ഒയും പ്രസിഡന്റുമായ അലി അൽ കുവാരി എന്നിവർ സംയുക്ത സഹകരണത്തിൽ സന്തോഷം പ്രകടിപ്പിച്ചു. നേരത്തെ ഒപ്പുവെച്ച ധാരണാപത്രം അടിസ്ഥാനമാക്കി മാധ്യമ സ്ഥാപനങ്ങൾക്ക് പ്രവർത്തനച്ചെലവ് കുറയ്ക്കാനും മിഡിൽ ഈസ്റ്റ്, നോർത്ത് ആഫ്രിക്കൻ (MENA) മേഖലകളിലേക്ക് പ്രവർത്തനം വ്യാപിപ്പിക്കാനും ഈ പദ്ധതി വഴി സാധിക്കുമെന്ന് അധികൃതർ വ്യക്തമാക്കി.