നടി അർച്ചന കവി വിവാഹിതയായി. റിക്ക് വർഗീസ് ആണ് വരൻ. അർച്ചനയുടെ രണ്ടാം വിവാഹമാണിത്. നേരത്തെ 2016 ൽ കൊമേഡിയൻ അബീഷ് മാത്യുവിനെ അർച്ചന വിവാഹം കഴിച്ചിരുന്നു. എന്നാൽ ഇരുവരും 2021 ൽ പിരിയുകയായിരുന്നു. നേരത്തേ രണ്ടാം വിവാഹത്തിന്റെ സൂചന നൽകി താരം ഇൻസ്റ്റഗ്രാം സ്റ്റോറി പങ്കുവെച്ചിരുന്നു. ഇതിനു പിന്നാലെ അവതാരക ധന്യ വർമ്മയാണ് വിവാഹ വാർത്ത സോഷ്യൽ മീഡിയയിലൂടെ അറിയിച്ചത്. ഇതോടെ നിരവധി പേരാണ് അർച്ചന കവിക്ക് വിവാഹമംഗളാശംസകൾ അറിയിച്ചെത്തിയിരിക്കുന്നത്.
നീലത്താമര എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച താരമാണ് അർച്ചന കവി. ചിത്രത്തിലെ കുഞ്ഞിമാളു എന്ന കഥാപാത്രം പ്രേക്ഷക നിരൂപക പ്രശംസകൾ ഏറ്റുവാങ്ങിയിരുന്നു. പിന്നീട് മമ്മി ആന്റ് മീ, സോൾട്ട് ആൻറ് പെപ്പർ, ഹണീ ബീ തുടങ്ങീ മികച്ച സിനിമകളുടെ ഭാഗമായെങ്കിലും ഇടക്ക് സിനിമയിൽ നിന്നും താരം ഇടവേളയെടുത്തിരുന്നു. പിന്നീട് ഈ വർഷം ടൊവിനോ തോമസ് നായകനായി എത്തിയ ഐഡന്റിറ്റി എന്ന ചിത്രത്തിൽ മികച്ച കഥാപാത്രത്തെ അവതരിപ്പിക്കാനും അർച്ചന കവിക്ക് സാധിച്ചിരുന്നു.
