തിരുവനന്തപുരം: നിയമസഭാ തിരഞ്ഞെടുപ്പ് അടുത്തിരിക്കെ സർക്കാർ ജീവനക്കാരെ സന്തോഷിപ്പിക്കാനായി രണ്ട് നിർണ്ണായക തീരുമാനങ്ങൾ എടുക്കുന്നതിനുള്ള ആലോചനയുമായി സർക്കാർ മുന്നോട്ട്. പെൻഷൻ പ്രായം 56-ൽ നിന്ന് 60 ആക്കുക, ആഴ്ചയിലെ പ്രവൃത്തി ദിവസങ്ങൾ ആറിൽ നിന്ന് അഞ്ചാക്കി കുറയ്ക്കുക എന്നീ തീരുമാനങ്ങളാണ് സർക്കാരിന്റെ പരിഗണനയിലുള്ളത്.
മുഖ്യമന്ത്രിയുടെ ഓഫീസ് നേരിട്ടാണ് ഈ നീക്കങ്ങൾ നടത്തുന്നത്. എങ്കിലും നയപരമായ തീരുമാനങ്ങൾ ആയതിനാൽ എൽ.ഡി.എഫിലും സി.പി.എമ്മിലും വിപുലമായ ചർച്ചകൾ വേണ്ടിവരും.
തിരിച്ചടിയാകുമോ എന്ന് ആശങ്ക
മറ്റെല്ലാ വിഷയങ്ങളിലും വലിയ അധികച്ചെലവുണ്ടാകുമെന്ന് അറിഞ്ഞുകൊണ്ടുതന്നെ സർക്കാർ അതിവേഗം തീരുമാനമെടുത്തുവെങ്കിലും, ഈ രണ്ട് കാര്യങ്ങളിലും ജനങ്ങളുടെ എതിർപ്പ് തിരഞ്ഞെടുപ്പിൽ തിരിച്ചടിയാകുമോ എന്ന ആശങ്ക ചർച്ചകൾ നീളാൻ കാരണമാകുന്നുണ്ട്.
പെൻഷൻ പ്രായം ഏകീകരണം
നിലവിൽ അഞ്ചേകാൽ ലക്ഷത്തോളം സർക്കാർ ജീവനക്കാരിൽ രണ്ടേകാൽ ലക്ഷത്തോളം പേർ പങ്കാളിത്ത പെൻഷൻ പദ്ധതിക്ക് കീഴിലാണ്. ഇവരുടെ പെൻഷൻ പ്രായം ഇപ്പോൾത്തന്നെ 60 വയസ്സാണ്. ബാക്കിയുള്ള മൂന്ന് ലക്ഷത്തോളം പേരുടെ പെൻഷൻ പ്രായമാണ് 56-ൽ നിന്ന് 60 ആക്കി ഉയർത്തേണ്ടത്. അതിനാൽ ഇത് പെൻഷൻ പ്രായം വർദ്ധിപ്പിക്കുകയല്ല, മറിച്ച് എല്ലാവർക്കും ഒരുപോലെ ഏകീകരിക്കുകയാണ് എന്ന വാദമാണ് സർക്കാർ വൃത്തങ്ങൾ ഉയർത്തുന്നത്.
