
ദോഹ: ഖത്തറിൽ വളർത്തുമൃഗങ്ങളെ ഉപേക്ഷിക്കുകയോ മതിയായ പരിചരണം നൽകാതെ വിടുകയോ ചെയ്യുന്ന ഉടമകൾക്ക് 10,000 മുതൽ 50,000 ഖത്തർ റിയാൽ വരെ പിഴ ശിക്ഷ ലഭിക്കുമെന്ന് പുതിയ മൃഗസംരക്ഷണ നിയമം. 2026-ലെ 18-ാം നമ്പർ നിയമപ്രകാരം പുറപ്പെടുവിച്ച ഈ നിയമനിർമ്മാണം 2026 നവംബർ 18-ന് ഔദ്യോഗിക ഗസറ്റിൽ പ്രസിദ്ധീകരിച്ചു. മൃഗങ്ങളെ അവഗണന, ക്രൂരത, അനാവശ്യമായ പീഡനങ്ങൾ എന്നിവയിൽ നിന്ന് സംരക്ഷിക്കുന്നതിനുള്ള കർശന വ്യവസ്ഥകളാണ് ഇതിലുള്ളത്.ആർട്ടിക്കിൾ 22 പ്രകാരം, മൃഗങ്ങൾക്ക് വേദനയോ ദോഷമോ ഉണ്ടാക്കുന്ന വിധത്തിൽ അവയെ ഉപേക്ഷിക്കാനോ ദീർഘകാലം പരിചരണമില്ലാതെ വിടാനോ പാടില്ല. ന്യായമായ കാരണങ്ങളാൽ മൃഗങ്ങളെ ഒഴിവാക്കേണ്ടി വന്നാൽ ബന്ധപ്പെട്ട അധികൃതരുമായി ഏകോപിപ്പിച്ച് മാത്രമേ അത് ചെയ്യാവൂ.അതിജീവനത്തിനായി മനുഷ്യരെ ആശ്രയിക്കുന്ന മൃഗങ്ങളെ പുറത്തുവിടുന്നത് ആർട്ടിക്കിൾ 2 വിലക്കുന്നു. ഇത്തരം മൃഗങ്ങളെ ഉപേക്ഷിക്കാൻ ആഗ്രഹിക്കുന്ന ഉടമകൾ മുനിസിപ്പാലിറ്റി മന്ത്രാലയത്തിലെ ബന്ധപ്പെട്ട വകുപ്പുമായി ബന്ധപ്പെടേണ്ടതാണ്.ആർട്ടിക്കിൾ 22-ഉം മറ്റ് മൃഗസംരക്ഷണ വ്യവസ്ഥകളും ലംഘിക്കുന്നവർക്ക് ആർട്ടിക്കിൾ 56 പ്രകാരം 10,000 മുതൽ 50,000 റിയാൽ വരെ പിഴ ചുമത്തും. നിയമലംഘനം ആവർത്തിക്കുന്ന പക്ഷം പിഴ ഇരട്ടിയാക്കാനും നിയമത്തിൽ വ്യവസ്ഥയുണ്ട്.വളർത്തുമൃഗങ്ങൾക്ക് ഉചിതമായ പരിചരണം നൽകാനും അവയെ ഉപദ്രവങ്ങളിൽ നിന്ന് സംരക്ഷിക്കാനുമുള്ള ഉടമകളുടെ ഉത്തരവാദിത്തമാണ് പുതിയ നിയമം അടിവരയിടുന്നത്. വളർത്തുമൃഗങ്ങളെ തുടർന്നും പരിപാലിക്കാൻ സാധിക്കാത്തവർ അവയെ അലക്ഷ്യമായി ഉപേക്ഷിക്കുന്നതിന് പകരം ബന്ധപ്പെട്ട അധികാരികളെ സമീപിക്കണമെന്നും അധികൃതർ നിർദ്ദേശിക്കുന്നു.










