കൊച്ചി : കേരള രാഷ്ട്രീയത്തിൽ സാന്നിധ്യം ഉറപ്പിക്കാൻ ലക്ഷ്യമിട്ട് ആം ആദ്മി പാർട്ടി (എഎപി) കേരള സംസ്ഥാന നേതൃയോഗം ജൂൺ 21, 22 തീയതികളിൽ ആലുവ കുഞ്ഞാട്ടുകര ശാന്തിഗിരി ആശ്രമത്തിൽ നടക്കും കേരളത്തിന്റെ ചുമതലയുള്ള ഡൽഹി മുൻ മേയറും എഎപി ദേശീയ നേതാവുമായ ഡോ. ഷെല്ലി ഒബ്രോയ് രണ്ടുദിവസവും യോഗത്തിൽ പങ്കെടുക്കും.പാർട്ടി സംസ്ഥാന ഘടനയെ ശക്തിപ്പെടുത്തുന്നതിനും വരാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പുകളിലും നിയമസഭ തിരഞ്ഞെടുപ്പിലും മികച്ച പ്രകടനം കാഴ്ചവെക്കുന്നതിന്റെ മുന്നോടിയായാണ് ഈ സുപ്രധാന യോഗം ചേരുന്നത്. സംസ്ഥാനത്തെ നിലവിലെ രാഷ്ട്രീയ സാഹചര്യങ്ങളും പൊതുജനാരോഗ്യ, സാമ്പത്തിക, തൊഴിൽ തുടങ്ങിയ മേഖലകളിലെ വിഷയങ്ങളും യോഗത്തിൽ വിശദമായി ചർച്ചചെയ്യും.കേരളത്തിൽ ഒരു മൂന്നാം ബദലായി ഉയർന്നുവരാൻ എഎപി ശ്രമിച്ചുകൊണ്ടിരിക്കുന്ന പശ്ചാത്തലത്തിൽ ഈ നേതൃയോഗത്തിന് ഏറെ പ്രാധാന്യമുണ്ട്. കേന്ദ്രസർക്കാരിന്റെ നയങ്ങളെയും സംസ്ഥാന സർക്കാരിന്റെ പ്രവർത്തനങ്ങളെയും വിലയിരുത്തിക്കൊണ്ട് ജനകീയ വിഷയങ്ങളിൽ ഊന്നിയ പുതിയ സമരപരിപാടികൾക്കും പ്രവർത്തനങ്ങൾക്കും യോഗം രൂപം നൽകും. ഡൽഹി മോഡൽ ഭരണത്തെക്കുറിച്ചും അഴിമതിരഹിത ഭരണം വാഗ്ദാനം ചെയ്തുകൊണ്ടുമുള്ള പ്രചാരണങ്ങൾ ഊർജ്ജിതമാക്കാനും യോഗത്തിൽ തീരുമാനിക്കും.ഡോ. ഷെല്ലി ഒബ്രോയുടെ സാന്നിധ്യം ദേശീയ നേതൃത്വം കേരളത്തിന് നൽകുന്ന പ്രാധാന്യം വ്യക്തമാക്കുന്നു. പാർട്ടിയുടെ നയങ്ങളും പരിപാടികളും താഴെത്തട്ടിലേക്ക് എത്തിക്കുന്നതിനുള്ള തന്ത്രങ്ങൾ, പുതിയ അംഗങ്ങളെ ചേർക്കുന്നതിനുള്ള പ്രചാരണങ്ങൾ, വിദ്യാർഥി യുവജന-വനിതാ,  വിഭാഗങ്ങളെ സജീവമാക്കാനുള്ള നടപടികൾ എന്നിവയും യോഗത്തിന്റെ അജണ്ടയിൽ ഉൾപ്പെടുത്തിയിട്ടുണ്ട്. കേരളത്തിലെ മതേതര രാഷ്ട്രീയ സാഹചര്യങ്ങളിൽ എഎപിക്ക് എങ്ങനെ മുന്നോട്ട് പോകാൻ കഴിയുമെന്നതും ചർച്ചയ്ക്ക് വരും.
സംസ്ഥാന രാഷ്ട്രീയത്തിൽ പുതിയൊരു ദിശാബോധം നൽകാനും ജനശ്രദ്ധ ആകർഷിക്കാനും ഈ നേതൃയോഗത്തിന് കഴിയുമെന്നാണ് പാർട്ടി  പ്രതീക്ഷിക്കുന്നത്.