​ദോഹ: ആറാം വയസ്സിൽ വരച്ച ഒറ്റ ചിത്രം കൊണ്ട് അഞ്ച് അന്താരാഷ്ട്ര റെക്കോർഡുകൾ സ്വന്തമാക്കി ഖത്തറിലെ കൊച്ചു മലയാളി പ്രതിഭ. ദോഹ സ്കോളേഴ്സ് ഇന്റർനാഷണൽ സ്കൂളിലെ രണ്ടാം ക്ലാസ് വിദ്യാർത്ഥിയായ അൽ അമീൻ ബിൻ അഹമ്മദ് ഡാനിഷാണ് ക്യാൻവാസിലെ വിസ്മയമായി മാറിയത്. 20x20 വലിപ്പമുള്ള അക്രിലിക് പെയിന്റിംഗിലൂടെയാണ് ഈ കൊച്ചുമിടുക്കൻ ഈ അപൂർവ്വ നേട്ടം കൈവരിച്ചത്.
​ഇന്ത്യ ബുക്ക് ഓഫ് റെക്കോർഡ്സ്, ഇന്റർനാഷണൽ ബുക്ക് ഓഫ് റെക്കോർഡ്സ്, കലാമിന്റെ വേൾഡ് റെക്കോർഡ്സ്, വേൾഡ് വൈഡ് ബുക്ക് ഓഫ് റെക്കോർഡ്സ്, നോബിൾ വേൾഡ് റെക്കോർഡ്സ് എന്നീ അഞ്ച് പ്രമുഖ റെക്കോർഡ് സംഘടനകളുടെ അംഗീകാരമാണ് അൽ അമീനെ തേടിയെത്തിയത്. ജിസിസി മേഖലയിൽ ഈ പ്രായത്തിൽ ഇത്തരമൊരു നേട്ടം കൈവരിക്കുന്ന ആദ്യ കുട്ടിയാണ് അൽ അമീൻ.റെക്കോർഡുകൾക്കപ്പുറം താൻ വരച്ച ചിത്രത്തിന് പിന്നിലെ സന്ദേശമാണ് അൽ അമീന് പ്രധാനം. "എന്റെ ചിത്രംസമാധാനത്തെക്കുറിച്ചും നിറങ്ങളെക്കുറിച്ചുമുള്ള ഒരു കഥയാണ് പറയുന്നത്. ചിത്രത്തിലെ ആകാശവും അതിൽ ഞാൻ ഉപയോഗിച്ച തിളക്കമുള്ള നിറങ്ങളുമാണ് എനിക്ക് ഏറ്റവും ഇഷ്ടപ്പെട്ടത്," അൽ അമീൻ തന്റെ സന്തോഷം പങ്കുവെച്ചു. അഞ്ച്റെക്കോർഡുകൾ ലഭിച്ചതിൽ ഏറെ സന്തോഷമുണ്ടെന്നും മാതാപിതാക്കളോടും അധ്യാപകരോടും നന്ദിയുണ്ടെന്നും ഈ കൊച്ചുമിടുക്കൻ കൂട്ടിച്ചേർത്തു.കോഴിക്കോട് പേരാമ്പ്ര സ്വദേശികളായ അഹമ്മദ് ഡാനിഷിന്റെയും റാനിയ അബ്ദുൾ സമദിന്റെയും മകനാണ് അൽ അമീൻ. അമീന്റെ പിതാവ് ഖത്തർ എയർവേയ്‌സിലും മാതാവ് ദോഹയിലെ മിലിട്ടറി മെഡിക്കൽ സിറ്റി ഹോസ്പിറ്റലിലും ജീവനക്കാരാണ്.
​"വളരെ ചെറിയ പ്രായത്തിൽ തന്നെ അവൻ എല്ലാടത്തും വരയ്ക്കാൻ തുടങ്ങിയിരുന്നു. ചിത്രരചനയെ അവന് ഭാരമുള്ള ഒരു ജോലിയായല്ല, മറിച്ച് കളിപോലെ ആസ്വദിക്കാനുള്ള സമയമായാണ് ഞങ്ങൾ നൽകുന്നത്," മാതാപിതാക്കൾ പറഞ്ഞു. അൽ അമീന്റെ നേട്ടത്തിന് പിന്നിൽ വിദ്യാലയത്തിൽ നിന്നും ഖത്തറിലെ സമൂഹത്തിൽ നിന്നും ലഭിച്ച വലിയ പിന്തുണയുണ്ടെന്നും, ഈ നേട്ടം മറ്റ് കുട്ടികൾക്കും തങ്ങളുടെ കഴിവുകൾ വളർത്തിയെടുക്കാൻ പ്രചോദനമാകുമെന്ന് പ്രതീക്ഷിക്കുന്നതായും അവർ കൂട്ടിച്ചേർത്തു.
​അൽ അമീന്റെ ചിത്രങ്ങൾ ഉൾപ്പെടുത്തി ഭാവിയിൽ പ്രദർശനങ്ങൾ (Exhibitions) സംഘടിപ്പിക്കാനും, അതിലൂടെ ലഭിക്കുന്ന വരുമാനം കാരുണ്യ പ്രവർത്തനങ്ങൾക്കായി ഉപയോഗിക്കാനുമാണ് ഈ കുടുംബത്തിന്റെ തീരുമാനം. ശരിയായ പ്രോത്സാഹനവും സ്വാതന്ത്ര്യവും നൽകിയാൽ കൊച്ചു കൈകൾക്കും വലിയ അത്ഭുതങ്ങൾ സൃഷ്ടിക്കാൻ കഴിയുമെന്ന് തെളിയിച്ചിരിക്കുകയാണ് ഈ ആറു വയസ്സുകാരൻ.