ദോഹ: ശരീരഭാരം കുറയ്ക്കുന്നതിനായി വയറ്റിൽ ബലൂൺ സ്ഥാപിക്കുന്ന ശസ്ത്രക്രിയക്ക് (Gastric Balloon Surgery) വിധേയയായ ഖത്തറി യുവതിയെ ഗുരുതരാവസ്ഥയിൽ തീവ്രപരിചരണ വിഭാഗത്തിൽ (ICU) പ്രവേശിപ്പിച്ചു. ചികിത്സയ്ക്ക് വിധേയയായി മൂന്നാം ദിവസം വയറ്റിനുള്ളിൽ വെച്ച് ബലൂൺ പൊട്ടിത്തെറിച്ചതിനെ തുടർന്നാണ് ആരോഗ്യനില വഷളായത്.
ദോഹയിലെ ഒരു സ്വകാര്യ ആശുപത്രിയിലാണ് യുവതി ഈ ശസ്ത്രക്രിയയ്ക്ക് വിധേയയായത്. എന്നാൽ ദിവസങ്ങൾക്കുള്ളിൽ പെട്ടെന്നുണ്ടായ ആരോഗ്യപ്രശ്നങ്ങളെ തുടർന്ന് ഇവരെ സ്വകാര്യ ആശുപത്രിയിൽ നിന്നും ഹമദ് ജനറൽ ആശുപത്രിയിലെ തീവ്രപരിചരണ വിഭാഗത്തിലേക്ക് അടിയന്തരമായി മാറ്റുകയായിരുന്നു.
ഇത്തരം ശസ്ത്രക്രിയകൾക്ക് മുമ്പ് ഉണ്ടാകാൻ സാധ്യതയുള്ള അപകടസാധ്യതകളെയും പ്രത്യാഘാതങ്ങളെയും കുറിച്ച് രോഗികളെ വ്യക്തമായി ധരിപ്പിക്കേണ്ടതിന്റെ ആവശ്യകതയിലേക്കാണ് ഈ സംഭവം വിരൽ ചൂണ്ടുന്നത്. സൗന്ദര്യവർദ്ധക-ശരീരഭാരം കുറയ്ക്കൽ ചികിത്സകൾക്കായി പരിചയസമ്പന്നരായ വിദഗ്ധ ഡോക്ടർമാരുടെയും അംഗീകൃത മെഡിക്കൽ സെന്ററുകളുടെയും സേവനം മാത്രം തിരഞ്ഞെടുക്കാൻ ജനങ്ങൾ ശ്രദ്ധിക്കണമെന്ന് വിദഗ്ധർ ഓർമ്മിപ്പിക്കുന്നു.
