കൊല്ലം: വിവാഹസൽക്കാരത്തിനിടെ ഐസ്ക്രീമിനെച്ചൊല്ലിയ തർക്കം വൻ സംഘർഷമായി മാറി. സംഭവത്തിൽ പരിഭ്രാന്തയായ വധു കുഴഞ്ഞുവീണു. ഇതോടെ യുവതിയെ ആശുപത്രിയിൽ പ്രവേശിപ്പിച്ചു. കൊല്ലം കൊല്ലൂർവിള പള്ളിമുക്കിലെ ഒരു ഓഡിറ്റോറിയത്തിൽ ഞായറാഴ്ച രാത്രി നടന്ന വിവാഹസൽക്കാരത്തിനിടെയായിരുന്നു സംഭവം.
രാത്രി എട്ടരയോടെ ഐസ്ക്രീം ഒരുതവണ വാങ്ങിയ ഒരാൾ വീണ്ടും ആവശ്യപ്പെട്ടതോടെയാണ് പ്രശ്നങ്ങൾക്ക് തുടക്കമായത്. എന്നാൽ വീണ്ടും നൽകാൻ വിതരണക്കാരൻ തയ്യാറാകാതിരുന്നതോടെ വാക്കേറ്റമുണ്ടായി. ഇതിൽ സൽക്കാരത്തിനെത്തിയവർ അനുകൂല-പ്രതികൂല നിലപാടുകളിലായി തിരിഞ്ഞതോടെ തർക്കം കയ്യാങ്കളിയിലേക്കും പിന്നീട് കൂട്ടയടിയിലേക്കും എത്തുകയായിരുന്നു.
സംഘർഷം രൂക്ഷമായതോടെ ചടങ്ങിനെത്തിയ നിരവധി പേർ ഭയന്നോടി. അക്രമം നേരിൽ കണ്ട വധു കുഴഞ്ഞുവീണതിനെ തുടർന്ന് സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു.
സംഭവം ഓഡിറ്റോറിയിൽ നിന്ന് റോഡിലേക്കും വ്യാപിച്ചതോടെ പൊലീസ് സ്ഥലത്തെത്തി സ്ഥിതിഗതികൾ നിയന്ത്രണവിധേയമാക്കി. സംഭവവുമായി ബന്ധപ്പെട്ട് ഏതാനും പേരെ കസ്റ്റഡിയിലെടുത്തെങ്കിലും ഇരുവിഭാഗവും പരാതിയില്ലെന്ന് അറിയിച്ചതിനെ തുടർന്ന് പിന്നീട് വിട്ടയച്ചു.
