സന്യ (ചൈന): 2028-ലെ ഏഴാമത് ഏഷ്യൻ ബീച്ച് ഗെയിംസിന് ഫിലിപ്പീൻസിലെ സെബു സിറ്റി വേദിയാകും. ചൈനയിലെ സന്യയിൽ നടന്നുകൊണ്ടിരിക്കുന്ന ആറാമത് ഏഷ്യൻ ബീച്ച് ഗെയിംസിന്റെ ഭാഗമായി നടന്ന ചടങ്ങിൽ ഒളിമ്പിക് കൗൺസിൽ ഓഫ് ഏഷ്യയും (OCA) ഫിലിപ്പീൻസ് സർക്കാരും ഫിലിപ്പീൻസ് ഒളിമ്പിക് കമ്മിറ്റിയും (POC) തമ്മിലുള്ള ആതിഥേയ കരാർ ഔദ്യോഗികമായി ഒപ്പിട്ടു.
OCA പ്രസിഡന്റ് ഷെയ്ഖ് ജൊവാൻ ബിൻ ഹമദ് അൽ താനി, ഫിലിപ്പീൻസ് ഒളിമ്പിക് കമ്മിറ്റി പ്രസിഡന്റ് എബ്രഹാം ടൊളന്റിനോ എന്നിവരാണ് കരാറിൽ ഒപ്പുവെച്ചത്.ഫിലിപ്പീൻസിലെ പ്രശസ്ത വിനോദസഞ്ചാര കേന്ദ്രമായ സെബുവിൽ
2028 മാർച്ചിൽ മത്സരങ്ങൾ നടക്കും.പ്രാഥമികമായി 24 കായിക ഇനങ്ങളാണ് ഉൾപ്പെടുത്തിയിരിക്കുന്നത്. OCA-യുടെ അന്തിമ അനുമതി ലഭിക്കുന്നതോടെ ഇതിൽ വ്യക്തത വരും.
ഏഷ്യയിലെ ബീച്ച് സ്പോർട്സ് മേഖലയുടെ വികസനത്തിനും ഒളിമ്പിക് പ്രസ്ഥാനത്തിന്റെ വളർച്ചയ്ക്കും ഈ ഗെയിംസ് വലിയ സംഭാവന നൽകുമെന്ന് കരാർ ഒപ്പിടൽ ചടങ്ങിന് ശേഷം ഷെയ്ഖ് ജൊവാൻ ബിൻ ഹമദ് അൽ താനി പറഞ്ഞു. അന്താരാഷ്ട്ര നിലവാരത്തിലുള്ള അടിസ്ഥാന സൗകര്യങ്ങളും സംഘാടക മികവും സെബു നഗരത്തിനുണ്ടെന്ന് ഫിലിപ്പീൻസ് പ്രതിനിധികൾ ചടങ്ങിൽ വ്യക്തമാക്കി.
വിവിധ ഏഷ്യൻ രാജ്യങ്ങളിൽ നിന്നുള്ള ദേശീയ ഒളിമ്പിക് കമ്മിറ്റികളുടെ വിപുലമായ പങ്കാളിത്തം 2028-ലെ ഗെയിംസിൽ പ്രതീക്ഷിക്കുന്നു.
