ഒരു ബ്രായുടെ വില 473 കോടി രൂപയെന്ന് കേട്ടാൽ ആരും ഒന്ന് അമ്പരന്നുപോകും. എന്നാൽ വിക്ടോറിയാസ് സീക്രട്ട് ഫാഷൻ ഷോയിൽ റിയാലിറ്റി ഷോ താരവും സംരംഭകയുമായ കൈലി ജെന്നർ അവതരിപ്പിച്ച ബ്രായുടെ വില ഇത്രയും വരുമെന്നാണ് റിപ്പോർട്ട്. 18 കാരറ്റ് സ്വർണവും 4,410 വജ്രങ്ങളും ഉപയോഗിച്ച് നിർമിച്ച ഈ ആഡംബര ബ്രാ ഫാഷൻ ലോകത്ത് ഇപ്പോൾ വലിയ ചർച്ചയായിരിക്കുകയാണ്.

ഞായറാഴ്ച നടന്ന വിക്ടോറിയാസ് സീക്രട്ട് ഫാഷൻ ഷോയിലാണ് കൈലി ഈ പ്രത്യേക ഡിസൈനിലുള്ള ബ്രാ ധരിച്ചെത്തിയത്. ആഭരണ നിർമാണ രംഗത്തെ പ്രമുഖ ബ്രാൻഡായ ജേക്കബ് ആൻഡ് കോയുമായി സഹകരിച്ചാണ് വിക്ടോറിയാസ് സീക്രട്ട് ബ്രാ ഒരുക്കിയത്. തങ്ങൾ ഇതുവരെ നിർമിച്ചിട്ടുള്ളതിൽ ഏറ്റവും മൂല്യമേറിയ ബ്രായാണിതെന്നാണ് ജേക്കബ് ആൻഡ് കോയുടെ അവകാശവാദം.

ബ്രായുടെ നിർമാണത്തിനായി 15 കലാകാരന്മാർ ചേർന്ന് ഏകദേശം 1,000 മണിക്കൂറാണ് ചെലവഴിച്ചത്. സ്വർണവും ആയിരക്കണക്കിന് വജ്രങ്ങളും ഉൾപ്പെടുത്തിയുള്ള സവിശേഷ നിർമാണമാണ് ഇതിന്റെ മൂല്യം ഇത്രയധികം ഉയരാൻ കാരണമായത്.

എന്നാൽ ബ്രായുടെ വില മാത്രമല്ല, അത് അവതരിപ്പിക്കാൻ കൈലി ജെന്നറെ തിരഞ്ഞെടുത്തതും സമൂഹമാധ്യമങ്ങളിൽ ചർച്ചയായിട്ടുണ്ട്. വിക്ടോറിയാസ് സീക്രട്ടിന്റെ ഇൻസ്റ്റഗ്രാം പേജിൽ പങ്കുവച്ച കൈലിയുടെ ചിത്രങ്ങൾക്ക് സമ്മിശ്ര പ്രതികരണമാണ് ലഭിക്കുന്നത്. ബ്രാ അവതരിപ്പിക്കാൻ യഥാർത്ഥ മോഡലുകൾക്കു പകരം കൈലിയെ തിരഞ്ഞെടുത്തത് അവരോടുള്ള അനാദരവാണെന്നാണ് ചിലരുടെ വിമർശനം. കൈലിയെ തന്നെ ഈ ദൗത്യത്തിനായി തിരഞ്ഞെടുത്തതിന്റെ കാരണം എന്താണെന്നും പലരും ചോദിക്കുന്നു.

വിമർശനങ്ങൾക്ക് മറുപടിയുമായി വിക്ടോറിയാസ് സീക്രട്ടിന്റെ ചീഫ് ക്രിയേറ്റീവ് ഓഫീസർ ആദം സെൽമാൻ രംഗത്തെത്തി. ഫാഷൻ, ടെലിവിഷൻ, സംസ്കാരം തുടങ്ങിയ മേഖലകളിൽ മാത്രം ഒതുങ്ങിനിൽക്കുന്ന വ്യക്തിയല്ല കൈലിയെന്നും അതിനപ്പുറത്തേക്ക് സ്വാധീനമുള്ള വ്യക്തിത്വമാണ് അവരുടേതെന്നും അദ്ദേഹം വിശദീകരിച്ചു. ജനങ്ങൾക്കിടയിലുള്ള സ്വീകാര്യതയും കൈലിയെ തിരഞ്ഞെടുക്കാൻ കാരണമായതായി അദ്ദേഹം വ്യക്തമാക്കി.

വിക്ടോറിയാസ് സീക്രട്ട് ഫാഷൻ ഷോയുടെ തിരിച്ചുവരവിന്റെ പശ്ചാത്തലത്തിലും ഈ വിവാദത്തിന് പ്രാധാന്യമുണ്ട്. സ്ത്രീകളോടുള്ള വിവേചനം, കാലഹരണപ്പെട്ട സൗന്ദര്യസങ്കൽപ്പങ്ങൾ, വൈവിധ്യത്തിന്റെ അഭാവം തുടങ്ങിയ വിമർശനങ്ങൾ ശക്തമായതിനെത്തുടർന്ന് 2018ൽ ഷോയ്ക്ക് പ്രേക്ഷകപിന്തുണയിൽ ഇടിവുണ്ടായി. തുടർന്ന് പരിപാടി താൽക്കാലികമായി നിർത്തിവച്ചു.

2024ലാണ് ഫാഷൻ ഷോ വീണ്ടും അരങ്ങിലെത്തിയത്. പ്ലസ് സൈസ് മോഡലുകൾ ഉൾപ്പെടെ വ്യത്യസ്ത ശരീരപ്രകൃതിയുള്ള മോഡലുകൾക്ക് അവസരം നൽകിയതോടെ കൂടുതൽ വൈവിധ്യമാർന്ന അവതരണത്തിലേക്ക് വിക്ടോറിയാസ് സീക്രട്ട് നീങ്ങുകയായിരുന്നു. എന്നാൽ കൈലി ജെന്നറുടെ പുതിയ ലുക്കിനെച്ചൊല്ലിയുള്ള ചർച്ചകൾ, ബ്രാൻഡിന്റെ ഈ മാറ്റങ്ങൾക്കിടയിലും മോഡലുകളുടെ പ്രാതിനിധ്യം സംബന്ധിച്ച ചോദ്യങ്ങൾ ഇപ്പോഴും പ്രസക്തമാണെന്ന് വ്യക്തമാക്കുന്നു.