കൊച്ചി: കക്ഷിയുടെ 40 ലക്ഷം രൂപ തട്ടിയെടുത്ത കേസിൽ അഭിഭാഷകയ്ക്കും അവരുടെ ഭർത്താവിനുമെതിരെ വിശദമായ അന്വേഷണത്തിനും അറസ്റ്റ് ഉൾപ്പെടെയുള്ള തുടർനടപടികൾക്കും കേരള ഹൈക്കോടതി നിർദേശം നൽകി. കേസിന്റെ ഗൗരവം പരിഗണിച്ചാണ് സ്റ്റേഷൻ ഹൗസ് ഓഫീസർ ഉടൻ നടപടി സ്വീകരിക്കണമെന്ന് കോടതി ഉത്തരവിട്ടത്.
കേസിന്റെ വിശദാംശങ്ങൾ:
കേസിലെ പരാതിക്കാരൻ, ആറാം എതിർകക്ഷിയായ അഭിഭാഷകയുടെ ഭർത്താവിന്റെ അക്കൗണ്ടിലേക്ക് 40 ലക്ഷം കൈമാറിയിരുന്നു. ഈ തുക ഭർത്താവ് തന്റെ ബിസിനസ് ആവശ്യങ്ങൾക്കായി ഉപയോഗിച്ചതായി അഭിഭാഷക പിന്നീട് കോടതിയിൽ നൽകിയ സത്യവാങ്മൂലത്തിൽ സമ്മതിച്ചു.
ഇതിൽ 11.2 ലക്ഷം തിരികെ നൽകിയിട്ടുണ്ടെന്നും, ശേഷിക്കുന്ന 28.8 ലക്ഷം 10 ദിവസത്തിനകം മടക്കി നൽകാമെന്നും അവർ ഉറപ്പുനൽകിയിരുന്നു.
എന്നാൽ, കേസ് വീണ്ടും പരിഗണിച്ചപ്പോൾ അഭിഭാഷകയ്ക്ക് ബാക്കി തുക സംഘടിപ്പിക്കാൻ കഴിഞ്ഞില്ലെന്ന് കോടതിയെ അറിയിച്ചു.
ആരോപണങ്ങൾ അതീവ ഗൗരവ സ്വഭാവമുള്ളതാണെന്ന് നിരീക്ഷിച്ച കോടതി, ഉടൻ തന്നെ വിശദമായ അന്വേഷണം നടത്തി അഭിഭാഷകയെയും ഭർത്താവിനെയും അറസ്റ്റ് ചെയ്യണമെന്ന് എസ്‌എച്ച്‌ഒയ്ക്ക് നിർദ്ദേശം നൽകുകയായിരുന്നു.
നേരത്തെ, പരാതിക്കാരൻ പോലീസ് സൂപ്രണ്ടിന് പരാതി നൽകുകയും തുടർന്ന് എഫ്ഐആർ രജിസ്റ്റർ ചെയ്യുകയും ചെയ്തിരുന്നു. എന്നാൽ അന്വേഷണ പുരോഗതിയിൽ തൃപ്തരല്ലാത്തതിനാലാണ് കക്ഷി ഉചിതമായ നടപടി ആവശ്യപ്പെട്ട് ഹൈക്കോടതിയെ സമീപിച്ചത്.
