ദോഹ: ദോഹയിലെ സംഗീതപ്രേമികൾക്ക് നവ്യാനുഭവം സമ്മാനിച്ച് 360 ബീറ്റ്സിന്റെ ആദ്യ സംരംഭമായ ‘താളം’ മ്യൂസിക്കൽ ഷോ ശ്രദ്ധേയമായി. ഐ.സി.സി അശോക ഹാളിൽ നടന്ന പരിപാടി, സംഗീതവും സാങ്കേതിക മികവും ഒത്തുചേർന്ന ഒരു മഹാസംഗമമായി മാറി. രണ്ട് മാസത്തെ നീണ്ട തയ്യാറെടുപ്പുകൾക്കൊടുവിൽ അരങ്ങേറിയ ഈ സംഗീത വിരുന്ന് ദോഹയിലെ കലാസ്വാദകർ ആവേശത്തോടെയാണ് ഏറ്റെടുത്തത്.
​ആസിഫ് കാപ്പാടിന്റെ കരുത്തുറ്റ ആലാപനത്തോടെ ആരംഭിച്ച സദസ്സിൽ സിന്ധു പ്രേംകുമാർ, ശ്രീരഞ്ജിനി, അൽസാബിത്ത്, അനീഷാ, നബീൽ, അഷ്കർ എന്നിവരടങ്ങിയ ഗായകനിര ആസ്വാദകരെ മന്ത്രമുഗ്ധരാക്കി. മൂന്ന് മണിക്കൂറിലധികം നീണ്ടുനിന്ന പരിപാടിയിൽ ഓർക്കസ്ട്രയുടെ അകമ്പടിയോടെ ഗായകർ തകർത്താടിയപ്പോൾ സദസ്സ് ആവേശക്കടലായി മാറി.
​ഷോ ഡയറക്ടർ ഫർഹാസ് മുഹമ്മദ് ഒരുക്കിയ സിനിമാറ്റിക് ശൈലിയിലുള്ള പഞ്ച് ഇൻട്രോ പരിപാടിയുടെ മുഖ്യ ആകർഷണമായിരുന്നു. നൗഷാദ് മതയോത്ത്, രശ്മി ശരത്, കെ.ജി. റഷീദ്, ആരിഫ്, ഷിയാസ് അൻവർ എന്നിവരുടെ നേതൃത്വത്തിലുള്ള കൃത്യമായ സംഘാടനം പരിപാടിയെ മറ്റൊരു തലത്തിലെത്തിച്ചു. വൺ ടു വൺ മീഡിയ സാരഥി മൺസൂർ അലിയുടെ സാന്നിധ്യവും ജയശ്രീ സുരേഷിന്റെ അവതരണവും പരിപാടിക്ക് മിഴിവേകി.
​ഐ.സി.സി ഹാളിൽ ഇതുവരെ കണ്ടിട്ടില്ലാത്ത വിധത്തിൽ മനോഹരമായ സൗണ്ട് സിസ്റ്റവും നിരവധി എൽ.ഇ.ഡി സ്ക്രീനുകളും ഒരുക്കി സ്റ്റേജിനെ വർണ്ണാഭമാക്കിയ സിറാജും സംഘവും പരിപാടിയുടെ വിജയത്തിൽ നിർണ്ണായക പങ്കുവഹിച്ചു. എഫ്.ഒ.കെ ഖത്തർ, ന്യൂ വോയിസ് ദോഹ, ഗുൽമുഹമ്മദ് ഫൗണ്ടേഷൻ, സ്നേഹതീരം ടീമുകളുടെ സഹകരണവും പങ്കാളിത്തവും പരിപാടിയുടെ മാറ്റുകൂട്ടി.
​ദോഹയിലെ സംഗീത ലോകത്ത് പുതിയൊരു മാനദണ്ഡം സൃഷ്ടിച്ചുകൊണ്ടാണ് 360 ബീറ്റ്സിന്റെ ‘താളം’ അരങ്ങൊഴിഞ്ഞത്. വരും ദിവസങ്ങളിൽ കൂടുതൽ വ്യത്യസ്തമായ കലാപരിപാടികളുമായി മുന്നോട്ട് പോകാനാണ് തങ്ങളുടെ ലക്ഷ്യമെന്ന് സംഘാടകർ അറിയിച്ചു.