ഹെയർ ഓയിൽ വിറ്റ് കോടികൾ സമ്പാദിച്ച യുവതിയാണ് ഇപ്പോൾ ബിസിനസ് ലോകത്ത് ചർച്ചകളിൽ നിറയുന്നത്. ഇന്ത്യൻ വംശജയായ എറിം കൗർ ആണ് ബ്രിട്ടനിൽ കോടികൾ കൊയ്യുന്നത്. അതും ഇന്ത്യയുടെ പരമ്പരാഗത രീതികളിൽ നിർമ്മിച്ച ഹെയർ ഓയിൽ വിറ്റാണ് ഈ മുപ്പതുകാരി കോടികൾ കൊയ്യുന്നത്.
ലണ്ടനിലാണ് എറിം കൗറിന്റെ 'ബൈ എറിം' എന്ന ആഡംബര ബ്രാന്റിന്റെ ആസ്ഥാനം. 2019 ലാണ് ബൈ എറിം സ്ഥാപിച്ചത്. ഹെയർ ഓയിൽ ബ്രാൻഡിലൂടെ നാല് മില്യൺ ഡോളർ ഡോളർ സമ്പാദിച്ചുവെന്ന് സിഎൻബിസി മേക്ക് ഇറ്റ് റിപ്പോർട്ട് ചെയ്യുന്നത്. അതായത് ഏകദേശം 34 കോടി രൂപയാണ് യുവതി സമ്പാദിച്ചത്.
ബ്രാന്റ് ഉടമ എന്നതിലപ്പുറം ഇൻസ്റ്റാഗ്രാമിലും ടിക് ടോക്കിലും 700,000-ത്തിലധികം ഫോളോവേഴ്‌സും ഈ യുവ സംരംഭകയ്ക്കുണ്ട്. സോഷ്യൽ മീഡിയയിലൂടെയാണ് ബ്രാന്റിന്റെ പ്രധാന വ്യാപാരം നടത്തുന്നത്. ബൈഎറിമിന്റെ വെബ്‌സൈറ്റിൽ ഈ ഹെയർ ഓയിൽ 100% പ്രകൃതിദത്തവും ആയുർവേദ ചേരുവകൾ ഉപയോഗിച്ചുണ്ടാക്കുന്നതുമാണെന്ന് നൽകിയിട്ടുണ്ട്. നെല്ലിക്കയെണ്ണ, ആർഗൻ ഓയിൽ, വെളിച്ചെണ്ണ, ബദാം ഓയിൽ, കാസ്റ്റർ ഓയിൽ എന്നിവയുൾപ്പെടെയുള്ള 8 പ്രധാന സാധനങ്ങളാണ് കൂട്ടിലുള്ളതെന്നും എറിം കൗർ വെളിപ്പെടുത്തുന്നു.
