തിരുവനന്തപുരം: സംസ്ഥാനത്തെ തദ്ദേശസ്വയംഭരണ സ്ഥാപനങ്ങൾ കേന്ദ്രീകരിച്ച് വ്യാപക അഴിമതിയും കൈക്കൂലിയും. കെട്ടിട നിർമ്മാണാനുമതിയും മറ്റ് ആനുകൂല്യങ്ങളും നൽകുന്നതിനായി ലക്ഷക്കണക്കിന് രൂപ കൈക്കൂലി വാങ്ങിയ 30 ഉദ്യോഗസ്ഥരെ വിജിലൻസിന്റെ 'ഓപ്പറേഷൻ പാർപ്പിടം' റെയ്ഡിൽ കണ്ടെത്തി. സ്വകാര്യ കൺസൾട്ടൻസികൾ, എൻജിനിയർമാർ, ആർക്കിടെക്ടുമാർ, കരാറുകാർ എന്നിവരിൽ നിന്നായി ഏകദേശം 45 ലക്ഷത്തോളം രൂപയാണ് വിവിധ ഉദ്യോഗസ്ഥർ ഡിജിറ്റൽ അക്കൗണ്ടുകൾ വഴിയും നേരിട്ടും കൈപ്പറ്റിയത്.
സംസ്ഥാനത്തെ 6 കോർപ്പറേഷനുകൾ, 30 മുനിസിപ്പാലിറ്റികൾ, 24 പഞ്ചായത്തുകൾ എന്നിവിടങ്ങളിൽ ഒരേസമയമായിരുന്നു വിജിലൻസ് പരിശോധന. അഴിമതി വെളിപ്പെട്ട പ്രധാന കേന്ദ്രങ്ങളും വിവരങ്ങളും താഴെ പറയുന്നവയാണ്:
പ്രധാന കണ്ടെത്തലുകൾ
കുന്നുളം മുനിസിപ്പാലിറ്റി: മുനിസിപ്പൽ സെക്രട്ടറിയുടെ ബാങ്ക് അക്കൗണ്ടിലേക്ക് കരാറുകാരും ലൈസൻസികളും ചേർന്ന് ഒരു വർഷത്തിനിടെ അയച്ചത് 21.5 ലക്ഷം രൂപ.
ഫോർട്ട്കൊച്ചി സോണൽ ഓഫീസ്: രണ്ട് അസിസ്റ്റന്റ് എൻജിനിയർമാർ, ഓവർസിയർ, ബിൽഡിംഗ് ഇൻസ്പെക്ടർ എന്നിവർ ചേർന്ന് കരാറുകാരിൽ നിന്ന് തട്ടിയത് 12.69 ലക്ഷം രൂപ. (ഇതിൽ ഒരു അസി. എൻജിനിയർ മാത്രം 5.03 ലക്ഷവും മറ്റൊരു അസി. എൻജിനിയർ 4.92 ലക്ഷവും കൈപ്പറ്റി).
തിരുവനന്തപുരം ജില്ല: നെയ്യാറ്റിൻകര മുനിസിപ്പാലിറ്റി ഓവർസിയർ 1.37 ലക്ഷവും വർക്കലയിലെ താത്കാലിക ഓവർസിയർ 2.03 ലക്ഷവും കൈക്കൂലി വാങ്ങി. നെടുമങ്ങാട് സർവേയറുടെ വാഹനത്തിൽ നിന്ന് 45,000 രൂപ പിടിച്ചെടുത്തു. കഴക്കൂട്ടം സോണലിൽ ഓവർസിയർ 5,000 രൂപയും, വിളപ്പിൽശാല പഞ്ചായത്തിൽ ഓവർസിയർ 67,000 രൂപയും കൈപ്പറ്റി.
പൂവാർ & പള്ളിവാസൽ: പൂവാർ പഞ്ചായത്തിൽ ബാറുകൾക്കും അനധികൃത കെട്ടിടങ്ങൾക്കും ബോട്ട് സർവീസുകൾക്കും നിയമവിരുദ്ധ അനുമതി നൽകി. ഇടുക്കി പള്ളിവാസൽ പഞ്ചായത്തിൽ 262 അനധികൃത കെട്ടിടങ്ങൾക്ക് യു.എ.സി (UAC) നമ്പർ നൽകി.
മറ്റ് ജില്ലകളിലെ അഴിമതി:
കാസർകോട് അജാനൂർ പഞ്ചായത്തിൽ ലൈസൻസില്ലാത്ത റിസോർട്ടിന് യു.എ.സി നമ്പർ നൽകി.
പരവൂർ മുനിസിപ്പാലിറ്റിയിൽ ചട്ടവിരുദ്ധമായി ടർഫ് ക്രമപ്പെടുത്തി നൽകി.
വയനാട് അമ്പലവയൽ പഞ്ചായത്തിലെ സ്വീപ്പർ കരാറുകാരനിൽ നിന്ന് 2.8 ലക്ഷം രൂപ വാങ്ങി.
സുൽത്താൻ ബത്തേരിയിൽ അസി. എൻജിനിയർ കരാറുകാരനിൽ നിന്ന് 1.16 ലക്ഷം രൂപ കൈപ്പറ്റി.
വിജിലൻസ് നിലപാട്: അഴിമതിക്കാർക്കെതിരെ ശക്തമായ നടപടി തുടരുമെന്നും, വരും ദിവസങ്ങളിലും 'ഓപ്പറേഷൻ പാർപ്പിടം' പരിശോധനകൾ ഊർജ്ജിതമായി മുന്നോട്ട് കൊണ്ടുപോകുമെന്നും വിജിലൻസ് അധികൃതർ അറിയിച്ചു.
