ദോഹ: ഖത്തർ ചാരിറ്റി സംഘടിപ്പിച്ച 'ദഫാ ബലാ' (വിപത്തുകളെ തടയുക) എന്ന ജീവകാരുണ്യ കാമ്പയിൻ വൻ വിജയം. വെറും നാല് മണിക്കൂറിനുള്ളിൽ 40.5 ദശലക്ഷം (4 കോടി 5 ലക്ഷം) ഖത്തർ റിയാൽ സമാഹരിച്ചുകൊണ്ട് കാമ്പയിൻ ലക്ഷ്യം മറികടന്നു. ഏകദേശം 39,300 പേരാണ് ഈ സംരംഭത്തിൽ പങ്കാളികളായത്.
റമദാനിലെ 27-ാം രാവിനോടനുബന്ധിച്ച് ഞായറാഴ്ച രാത്രി 9 മണിക്ക് ആരംഭിച്ച് അർദ്ധരാത്രി വരെ നീണ്ടുനിന്ന തത്സമയ പരിപാടിയിലൂടെയാണ് ഈ തുക സമാഹരിച്ചത്.
ഖത്തർ ചാരിറ്റിയുടെ യൂട്യൂബ് ചാനലിലൂടെ നടന്ന '27-ാം രാവ് ചലഞ്ച്' (27th Night Challenge) എന്ന പരിപാടിയിൽ പ്രശസ്ത ഇൻഫ്ലുവൻസർ അബ്ദുള്ള അൽ ഗഫ്രി, മീഡിയ പേഴ്സണാലിറ്റി ഡോ. അബ്ദുൽ റഹ്മാൻ അൽ ഹറാമി എന്നിവർ പങ്കെടുത്തു.
സന്ദേശം: "നിങ്ങളുടെ സൽപ്രവൃത്തികൾ ഉദ്ദേശിക്കുക, അവ അർഹരിലേക്ക് എത്തും" എന്ന റമദാൻ കാമ്പയിന്റെ ഭാഗമായാണ് ഈ പരിപാടി സംഘടിപ്പിച്ചത്.
ഖത്തറിലും വിവിധ വിദേശ രാജ്യങ്ങളിലുമായി ജീവൻരക്ഷാ മരുന്നുകളും ചികിത്സാ സൗകര്യങ്ങളും എത്തിക്കുന്നതിനുള്ള മാനുഷിക പദ്ധതികൾ നടപ്പിലാക്കുക.കഷ്ടത അനുഭവിക്കുന്ന രോഗികളെ സഹായിക്കുക എന്ന ലക്ഷ്യത്തോടെ, പുണ്യരാവായ 27-ാം രാവിനെ ഒരു മാനുഷിക പ്ലാറ്റ്‌ഫോമാക്കി മാറ്റാൻ ഖത്തർ ചാരിറ്റിക്ക് ഈ സംരംഭത്തിലൂടെ സാധിച്ചു. ഉദാരമതികളായ പൊതുജനങ്ങളുടെ വലിയ പിന്തുണയാണ് ഈ ചരിത്ര വിജയത്തിന് പിന്നിലെന്ന് സംഘാടകർ അറിയിച്ചു.
