ദോഹ: വ്യാജ പ്രവൃത്തിപരിചയ സർട്ടിഫിക്കറ്റുകൾ സമർപ്പിച്ച് ഹെൽത്ത് പ്രൊഫഷണൽ ലൈസൻസ് നേടാൻ ശ്രമിച്ച 27 പേരെ ഖത്തർ പൊതുജനാരോഗ്യ മന്ത്രാലയം കറുത്ത പട്ടികയിൽ (Blacklist) പെടുത്തുകയും രാജ്യത്തെ ആരോഗ്യ മേഖലയിൽ ജോലി ചെയ്യുന്നതിൽ നിന്ന് വിലക്കുകയും ചെയ്തു. ഈ വർഷത്തെ ആദ്യ ആറു മാസത്തിനിടയിലാണ് ഇത്രയും പേർ പിടിക്കപ്പെട്ടത്.
രജിസ്ട്രേഷന്റെയും ലൈസൻസിംഗിന്റെയും തികച്ചും ആദ്യഘട്ടത്തിൽ തന്നെ രേഖകളുടെ വിശ്വാസ്യത പരിശോധിക്കാറുണ്ടെന്ന് പൊതുജനാരോഗ്യ മന്ത്രാലയത്തിലെ ഹെൽത്ത് സ്പെഷ്യാലിറ്റീസ് വിഭാഗം ഡയറക്ടർ ഡോ. സാദ് അൽ കഅബി വ്യക്തമാക്കി. ആരോഗ്യ പ്രവർത്തകർ രാജ്യത്ത് ജോലിയിൽ പ്രവേശിക്കുന്നതിന് മുൻപ് തന്നെ ഈ പരിശോധന പൂർത്തിയാക്കുന്നതിനാൽ ഇത്തരം തട്ടിപ്പുകൾ തുടക്കത്തിൽ തന്നെ കണ്ടെത്താൻ സാധിക്കുന്നുണ്ട്.
ഖത്തറിലെ ആരോഗ്യ മേഖലയിൽ പ്രവർത്തിക്കാൻ ആഗ്രഹിക്കുന്ന ആരോഗ്യ പ്രവർത്തകരെ രജിസ്റ്റർ ചെയ്യുന്നതിനും ലൈസൻസ് നൽകുന്നതിനും ഉയർന്ന നിലവാരത്തിലുള്ള മാനദണ്ഡങ്ങളാണ് മന്ത്രാലയം പിന്തുടരുന്നത്. സേവനങ്ങളുടെ ഗുണനിലവാരവും സുരക്ഷിതത്വവും ഉറപ്പാക്കുന്നതിന്റെ ഭാഗമാണിത്. അപേക്ഷകർ സമർപ്പിക്കുന്ന വിദ്യാഭ്യാസ യോഗ്യതകളും പ്രവൃത്തിപരിചയ രേഖകളും വിദഗ്ദ്ധ ഏജൻസികളുടെ സഹകരണത്തോടെ കർശനമായ പരിശോധനകൾക്ക് വിധേയമാക്കിയ ശേഷമാണ് അംഗീകാരം നൽകുന്നത്.
