ദോഹ: ഖത്തറിലെ റിയൽ എസ്റ്റേറ്റ് മേഖലയിൽ വൻ കുതിപ്പ്. 2025 ജനുവരി മുതൽ സെപ്റ്റംബർ വരെ 25.1 ശതമാനമാണ് വർധിച്ചന. റിയൽ എസ്റ്റേറ്റ് റെഗുലേറ്ററി അതോറിറ്റി പുറത്തുവിട്ട കണക്കുകൾ പ്രകാരം, ഈ വർഷം മൂന്നാം പാദത്തിൽ (ജൂലൈ–സെപ്റ്റംബർ) മാത്രം 27,240 വാടക കരാറുകൾ രജിസ്റ്റർ ചെയ്‌തിട്ടുണ്ട് — കഴിഞ്ഞ വർഷത്തെ അതേ കാലയളവിനെ അപേക്ഷിച്ച് 7.4 ശതമാനം വർധന.
മൊത്തത്തിൽ 89,341 വാടക കരാറുകൾ ഒമ്പത് മാസത്തിനിടെ പുതുതായി രജിസ്റ്റർ ചെയ്യപ്പെട്ടപ്പോൾ, അതിൽ 76 ശതമാനം (68,607) താമസ കരാറുകളായിരുന്നു. 18,733 എണ്ണം വാണിജ്യ കരാറുകൾ ആയി രേഖപ്പെടുത്തി.
ഖത്തറിന്റെ നാഷണൽ വിഷൻ 2030ന്റെ ഭാഗമായി ഡിജിറ്റൽ മാറ്റം, നിയമപരമായ സുതാര്യത, അടിസ്ഥാനസൗകര്യ നിക്ഷേപങ്ങൾ തുടങ്ങിയ ഘടകങ്ങൾ ഈ വളർച്ചയെ കൂടുതൽ ഉത്തേജിപ്പിക്കുന്നതായി റിപ്പോർട്ടിൽ ചൂണ്ടിക്കാട്ടുന്നു.
റിയൽ എസ്റ്റേറ്റ് മേഖലയെ ഖത്തറിന്റെ സാമ്പത്തിക പ്രവർത്തനങ്ങളുടെ സുരക്ഷിത ആധാരമായി കണക്കാക്കപ്പെടുന്നു. ഈ വർഷം മൂന്നാം പാദത്തിൽ മാത്രം 1,256 റിയൽ എസ്റ്റേറ്റ് ഇടപാടുകൾ QR 4.493 ബില്യൺ മൂല്യമുള്ളവയായി രേഖപ്പെടുത്തിയിട്ടുണ്ട് — ഇത് കഴിഞ്ഞ വർഷത്തെ അതേ പാദത്തേക്കാൾ 35% വർധനയുള്ള ഇടപാടുകളും 58% മൂല്യവർധനയും സൂചിപ്പിക്കുന്നു.
സെപ്റ്റംബർ മാസത്തിൽ മാത്രം QR 1.861 ബില്യൺ മൂല്യമുള്ള ഇടപാടുകൾ നടന്നത് ഈ വർഷത്തെ ഏറ്റവും ഉയർന്ന നിരക്കായിരുന്നു. അതേസമയം ഓഗസ്റ്റിൽ QR 1.129 ബില്യൺ, ജൂലായിൽ QR 1.501 ബില്യൺ മൂല്യമുള്ള ഇടപാടുകളായിരുന്നു.
വിൽപ്പനയും വാടകയും ഒരുപോലെ വർധിച്ച വാസസ്ഥല വിപണിയിൽ ശക്തമായ തിരിച്ചുവരവ് ഈ വർഷത്തിന്റെ ആദ്യ പകുതിയിലും രേഖപ്പെടുത്തിയിരുന്നു — രണ്ടാം പാദത്തിൽ 798 ഇടപാടുകൾ രജിസ്റ്റർ ചെയ്തപ്പോൾ, ആദ്യ പാദത്തിലെ 708 ഇടപാടുകളിൽ നിന്ന് വ്യക്തമായ ഉയർച്ച രേഖപ്പെടുത്തി.