ദോഹ:ദഫ്നയിലെ ഒരു റെസ്റ്റോറന്റിൽ വെച്ചുണ്ടായ സംഘർഷത്തെ തുടർന്ന് 25 അറബ് സ്വദേശികളെ ആഭ്യന്തര മന്ത്രാലയം അറസ്റ്റ് ചെയ്തു.
കഴിഞ്ഞ ദിവസം രാത്രി മന്ത്രാലയം തങ്ങളുടെ 'X' (ട്വിറ്റർ) അക്കൗണ്ടിലൂടെയാണ് ഈ വിവരം ഔദ്യോഗികമായി അറിയിച്ചത്. ദഫ്നയിലെ റെസ്റ്റോറന്റിൽ നടന്ന അടിപിടിയുടെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു. വ്യക്തികളുടെ സുരക്ഷയ്ക്കും സ്വത്തിനും ഭംഗം വരുത്തുന്ന രീതിയിലും, പൊതുസമാധാനവും സുരക്ഷയും ലംഘിക്കുന്ന തരത്തിലുമുള്ള നിയമവിരുദ്ധമായ പ്രവർത്തനങ്ങളാണ് അവിടെ നടന്നതെന്ന് മന്ത്രാലയം വ്യക്തമാക്കി.
സംഭവത്തെക്കുറിച്ച് അറിഞ്ഞയുടൻ തന്നെ ബന്ധപ്പെട്ട സുരക്ഷാ വിഭാഗങ്ങൾ ആവശ്യമായ നടപടികൾ സ്വീകരിക്കുകയും കുറ്റക്കാരായ 25 പേരെ കസ്റ്റഡിയിലെടുക്കുകയുമായിരുന്നു. ഇവർക്കെതിരെയുള്ള പ്രാഥമിക നിയമനടപടികൾ പൂർത്തിയാക്കിയതായും, തുടർനടപടികൾക്കായി കേസ് പബ്ലിക് പ്രോസിക്യൂഷന് കൈമാറാൻ ഒരുങ്ങുകയാണെന്നും മന്ത്രാലയം കൂട്ടിച്ചേർത്തു.
രാജ്യത്തെ നിയമങ്ങളും ചട്ടങ്ങളും എല്ലാവരും കർശനമായി പാലിക്കണമെന്നും ഉത്തരവാദിത്തത്തോടെ പെരുമാറണമെന്നും മന്ത്രാലയം ജനങ്ങളോട് ആവശ്യപ്പെട്ടു. പൊതുസുരക്ഷയ്ക്ക് ഭംഗം വരുത്തുന്ന തരത്തിലുള്ള യാതൊരുവിധ പ്രവൃത്തികളിലും ആരും ഏർപ്പെടരുത്. നിയമം ലംഘിക്കുകയോ സമൂഹത്തിന്റെ സുരക്ഷയെയും സമാധാനത്തെയും ബാധിക്കുന്ന തരത്തിൽ പ്രവർത്തിക്കുകയോ ചെയ്യുന്നവർക്കെതിരെ വിട്ടുവീഴ്ചയില്ലാത്ത കർശന നടപടികൾ സ്വീകരിക്കുമെന്നും ആഭ്യന്തര മന്ത്രാലയം മുന്നറിയിപ്പ് നൽകി.
