​ദോഹ/റിയാദ്: സൊമാലിയയിൽ നിന്ന് ഏകപക്ഷീയമായി സ്വാതന്ത്ര്യം പ്രഖ്യാപിച്ച 'സോമാലിലാന്റ്' മേഖല അധിനിവിഷ്ട ജറുസലമിൽ അനധികൃതമായി 'എംബസി' തുറന്ന നടപടിയെ ശക്തമായി അപലപിച്ച് ഖത്തറും ജി.സി.സിയും (ഗൾഫ് സഹകരണ കൗൺസിൽ) ഉൾപ്പെടെ 16 അറബ്-ഇസ്‌ലാമിക രാജ്യങ്ങൾ. രാജ്യാന്തര നിയമങ്ങളുടെയും യു.എൻ പ്രമേയങ്ങളുടെയും നഗ്നമായ ലംഘനമാണ് സോമാലിലാന്റിന്റെ ഈ നീക്കമെന്ന് വിദേശകാര്യ മന്ത്രിമാർ പുറത്തിറക്കിയ സംയുക്ത പ്രസ്താവനയിൽ വ്യക്തമാക്കി.
​ഖത്തർ, ഈജിപ്ത്, സൗദി അറേബ്യ, ജോർദാൻ, തുർക്കിയെ, പാകിസ്താൻ, ഇന്തോനേഷ്യ, ജിബൂട്ടി, സൊമാലിയ, ഫലസ്തീൻ, ഒമാൻ, സുഡാൻ, യെമൻ, ലെബനൻ, മൗറിട്ടാനിയ, അൾജീരിയ എന്നീ രാജ്യങ്ങളിലെ വിദേശകാര്യ മന്ത്രിമാരാണ് ഈ നടപടിക്കെതിരെ ഒന്നിച്ച് രംഗത്തുവന്നത്.അധിനിവിഷ്ട ജറുസലമിന്റെ നിയമപരവും ചരിത്രപരവുമായ പദവിയെ നേരിട്ട് ബാധിക്കുന്നതാണ് സോമാലിലാന്റിന്റെ ഈ അനധികൃത നടപടി. 1967 മുതൽ കിഴക്കൻ ജറുസലം അധിനിവിഷ്ട ഫലസ്തീൻ ഭൂപ്രദേശമാണെന്നും ഇതിന്റെ പദവി മാറ്റാൻ ലക്ഷ്യമിട്ടുള്ള ഏത് നീക്കവും അസാധുവാണെന്നും മന്ത്രിമാർ ആവർത്തിച്ചു.
ഫെഡറൽ റിപ്പബ്ലിക് ഓഫ് സൊമാലിയയുടെ ഐക്യത്തിനും പരമാധികാരത്തിനും പ്രദേശിക അഖണ്ഡതയ്ക്കും മന്ത്രിമാർ പൂർണ്ണ പിന്തുണ പ്രഖ്യാപിച്ചു. രാജ്യത്തെ വിഭജിക്കാൻ ലക്ഷ്യമിട്ടുള്ള ഇത്തരം ഏകപക്ഷീയമായ നീക്കങ്ങളെ പൂർണ്ണമായി തള്ളിക്കളയുന്നതായും അവർ വ്യക്തമാക്കി.സോമാലിലാന്റിന്റെ നടപടി മേഖലയിലെ സുരക്ഷയും സ്ഥിരതയും തകർക്കാൻ മാത്രമേ ഉപകരിക്കൂ എന്ന് ജി.സി.സി ജനറൽ സെക്രട്ടറി ജാസിം മുഹമ്മദ് അൽബുദൈവി പറഞ്ഞു. ഇത്തരം അസാധുവായ നടപടികൾ തടയാൻ അന്താരാഷ്ട്ര സമൂഹം അടിയന്തരമായി ഇടപെടണമെന്നും അദ്ദേഹം ആവശ്യപ്പെട്ടു.
​കിഴക്കൻ ജറുസലം തലസ്ഥാനമായി 1967-ലെ അതിർത്തികളുടെ അടിസ്ഥാനത്തിൽ സ്വതന്ത്ര ഫലസ്തീൻ രാജ്യം സ്ഥാപിക്കണമെന്ന അറബ് സമാധാന താല്പര്യങ്ങൾക്കും അന്താരാഷ്ട്ര പ്രമേയങ്ങൾക്കും ജി.സി.സി എന്നും പ്രതിജ്ഞാബദ്ധമാണെന്ന് ജനറൽ സെക്രട്ടറി അൽബുദൈവി വീണ്ടും ഊന്നിപ്പറഞ്ഞു.