തിരുവനന്തപുരം: കേരള സർക്കാരിന്റെ വിവിധ വകുപ്പുകളിലും സെക്രട്ടേറിയറ്റിലുമായി കെട്ടിക്കിടക്കുന്നത് 15.24 ലക്ഷം ഫയലുകൾ. "ഓരോ ഫയലും ഓരോ ജീവിതമാണ്" എന്ന മുഖ്യമന്ത്രിയുടെ പ്രഖ്യാപനവും നിലവിലെ അവസ്ഥയും തമ്മിൽ വലിയ അന്തരമുണ്ടെന്നാണ് ഇത് വ്യക്തമാക്കുന്നത്. ധനമന്ത്രി കെ.എൻ. ബാലഗോപാലിന്റെ സാമ്പത്തിക കെടുകാര്യസ്ഥതയും ഈ പ്രതിസന്ധിക്ക് ഒരു കാരണമായി ചൂണ്ടിക്കാണിക്കപ്പെടുന്നുണ്ട്. പണം ആവശ്യപ്പെട്ട് വിവിധ വകുപ്പുകളിൽ നിന്ന് വരുന്ന ഫയലുകളിൽ 95 ശതമാനവും തീരുമാനമാകാതെ കെട്ടിക്കിടക്കുകയാണെന്നും റിപ്പോർട്ടുകൾ പറയുന്നു.
റവന്യൂ, ആരോഗ്യം, പോലീസ്, തദ്ദേശ സ്വയംഭരണം, പൊതുവിദ്യാഭ്യാസം, പട്ടികജാതി വികസനം, ഉന്നത വിദ്യാഭ്യാസം, പൊതുഭരണം, ധനം എന്നീ വകുപ്പുകളിലാണ് ഏറ്റവുമധികം ഫയലുകൾ കെട്ടിക്കിടക്കുന്നത്. മുഖ്യമന്ത്രി പിണറായി വിജയൻ, കെ. രാധാകൃഷ്ണൻ, എം.ബി. രാജേഷ്, വീണാ ജോർജ്, ആർ. ബിന്ദു, കെ. രാജൻ, കെ.എൻ. ബാലഗോപാൽ എന്നിവരാണ് ഫയൽ തീർപ്പാക്കുന്നതിൽ പിന്നിലുള്ള പ്രമുഖർ.
ഫയലുകൾ കെട്ടിക്കിടക്കുന്ന അവസ്ഥ രൂക്ഷമായതോടെ, ബുധനാഴ്ച ചേർന്ന മന്ത്രിസഭാ യോഗം ഫയൽ അദാലത്ത് നടത്താൻ തീരുമാനിച്ചിട്ടുണ്ട്. ഫയലുകൾ വേഗത്തിൽ തീർപ്പാക്കുക എന്നതാണ് ഇതിലൂടെ സർക്കാർ ലക്ഷ്യമിടുന്നത്.
