ദോഹ: ഖത്തറിന്റെ കാർബൺ പുറന്തള്ളൽ കുറയ്ക്കാനുള്ള ദേശീയ ശ്രമങ്ങളുടെ ഭാഗമായി ഹമദ് ഇന്റർനാഷണൽ എയർപോർട്ടിൽ ആദ്യ ഇലക്ട്രിക് വാഹന (EV) ചാർജിംഗ് സ്റ്റേഷൻ പ്രവർത്തനം ആരംഭിച്ചു. ഖത്തർ ജനറൽ ഇലക്ട്രിസിറ്റി ആൻഡ് വാട്ടർ കോർപ്പറേഷൻ (കഹ്റാമ)യുമായി സഹകരിച്ചാണ് ഹമദ് എയർപോർട്ട് ഈ പദ്ധതി നടപ്പാക്കിയത്. ഊർജ സംരക്ഷണവും കാര്യക്ഷമതയും ലക്ഷ്യമിടുന്ന ദേശീയ പദ്ധതിയായ ‘തർഷീദ്’ പദ്ധതിയുടെ ഭാഗമായാണ് ഈ സംരംഭം.
ഹമദ് ഇന്റർനാഷണൽ എയർപോർട്ടിന്റെ ഈസ്റ്റ് കാർ പാർക്കിന്റെ ഗ്രൗണ്ട് ലെവലിലാണ് പൊതുജനങ്ങൾക്കായി ആദ്യ EV ചാർജിംഗ് സ്റ്റേഷൻ സ്ഥാപിച്ചിരിക്കുന്നത്. രണ്ട് വാഹനങ്ങൾക്ക് ഒരേസമയം ചാർജിംഗ് സൗകര്യം നൽകുന്ന ഫാസ്റ്റ് ചാർജറിന് 50 കിലോവാട്ട് വരെ വൈദ്യുതി നൽകാൻ കഴിയും. വെറും 30 മിനിറ്റിനുള്ളിൽ ഏകദേശം 125 കിലോമീറ്റർ ദൂരം സഞ്ചരിക്കാനുള്ള ചാർജ് ലഭിക്കുമെന്നതാണ് പ്രത്യേകത.
‘തർഷീദ് സ്മാർട്ട് EV’ മൊബൈൽ ആപ്പുമായി ബന്ധിപ്പിച്ചിരിക്കുന്ന ഈ സംവിധാനത്തിലൂടെ ചാർജിംഗ് പോയിന്റുകൾ കണ്ടെത്താനും, റിയൽ ടൈം സ്റ്റാറ്റസ് പരിശോധിക്കാനും, ചാർജിംഗ് ആരംഭിക്കാനും നിർത്താനും, വൈദ്യുതി ഉപഭോഗം നിരീക്ഷിക്കാനും ഉപയോക്താക്കൾക്ക് സാധിക്കും.
“ഊർജ സംരക്ഷണം എയർപോർട്ടിന്റെ സുസ്ഥിര വികസന ലക്ഷ്യങ്ങളുടെ പ്രധാന ഘടകമാണ്. കഹ്റാമയുമായുള്ള ഈ സഹകരണം ഊർജക്ഷമ സാങ്കേതികവിദ്യകളിലേക്കുള്ള ഞങ്ങളുടെ പ്രതിബദ്ധതയുടെ തെളിവാണിതെന്ന് 
ഹമദ് ഇന്റർനാഷണൽ എയർപോർട്ട് ഫസിലിറ്റീസ് മാനേജ്മെന്റ് സീനിയർ വൈസ് പ്രസിഡന്റ് ഒമർ നജാരി പറഞ്ഞു.“പരിസ്ഥിതി സംരക്ഷണവും ജീവിത നിലവാരവും മെച്ചപ്പെടുത്തുന്ന സ്മാർട്ട് സാങ്കേതികവിദ്യകളെ പ്രോത്സാഹിപ്പിക്കുന്നതിൽ ഞങ്ങൾ മുൻനിരയിലാണ്. ഹമദ് എയർപോർട്ടുമായുള്ള ഈ സഹകരണം ഖത്തറിന്റെ സുസ്ഥിര ഭാവിക്കായുള്ള സംയുക്ത പ്രതിബദ്ധതയാണെന്ന് കഹ്റാമയിലെ കൺസർവേഷൻ & എനർജി എഫിഷ്യൻസി ഡിപ്പാർട്ട്മെന്റ് മാനേജർ എൻജിനീയർ റാഷിദ് അൽറഹിമി പറഞ്ഞു.
ഇതിനകം തന്നെ ഹമദ് ഇന്റർനാഷണൽ എയർപോർട്ട് ഊർജ ഉപഭോഗം കുറയ്ക്കുന്നതിനായി ജില്ല കൂളിംഗ് പ്ലാന്റുകളുടെ ഒപ്റ്റിമൈസേഷൻ, ഊർജക്ഷമമായ ലൈറ്റിംഗ് സംവിധാനങ്ങൾ, സ്മാർട്ട് മീറ്ററിംഗ് എന്നിവ നടപ്പാക്കിയിട്ടുണ്ട്. EV ചാർജിംഗ് സ്റ്റേഷൻ പദ്ധതി വിപുലീകരിക്കാനും അധികൃതർ പദ്ധതിയിടുന്നുണ്ട്. ഖത്തറിലുടനീളം സുസ്ഥിര ഗതാഗതവും ഊർജക്ഷമതയും പ്രോത്സാഹിപ്പിക്കുന്നതിലേക്കുള്ള വലിയ മുന്നേറ്റത്തിന്റെ തുടക്കമാണ് ഈ സഹകരണമെന്ന് അധികൃതർ വ്യക്തമാക്കി.