നവംബർ 17ന് വൃശ്ചികമാസം ആരംഭിക്കുന്നു. നവംബർ 16 തിങ്കളാഴ്ച രാത്രി 7.40ന് സൂര്യൻ തുലാം രാശിയിൽനിന്ന് വൃശ്ചികത്തിലേക്ക് പ്രവേശിക്കുന്നതോടെയാണ് വൃശ്ചികമാസത്തിന് തുടക്കമാകുന്നത്. ഡിസംബർ 16 വരെയാണ് വൃശ്ചികമാസം.

വിശാഖം, അനിഴം, തൃക്കേട്ട എന്നീ ഞാറ്റുവേലകൾ ഉൾപ്പെടുന്ന വൃശ്ചികമാസത്തിന് 29 ദിവസങ്ങളാണുള്ളത്. ഈ മാസം വ്യാഴം മകം നക്ഷത്രത്തിൽ അതിചാരഗതിയിൽ തുടരും. ശനി മീനം രാശിയിലെ ഉത്രട്ടാതിയിൽ വക്രഗതിയിലാണ്.

ഏകദേശം ഒന്നര വർഷത്തിലൊരിക്കലാണ് രാഹുവും കേതുവും രാശിമാറുന്നത്. ഡിസംബർ 5ന് രാത്രി രാഹു കുംഭത്തിൽനിന്ന് മകരത്തിലേക്കും കേതു ചിങ്ങത്തിൽനിന്ന് കർക്കടകത്തിലേക്കും മാറും. ചൊവ്വ ചിങ്ങം രാശിയിൽ മകം നക്ഷത്രത്തിൽ തുടരുമ്പോൾ ബുധൻ വൃശ്ചികം 18 വരെ തുലാം രാശിയിലും പിന്നീട് വൃശ്ചികം രാശിയിലും സഞ്ചരിക്കും. മാസാരംഭത്തിൽ കന്നി രാശിയിലുള്ള ശുക്രൻ വൃശ്ചികം ആറിന് തുലാം രാശിയിലേക്ക് മാറും.

മാസത്തിന്റെ തുടക്കത്തിൽ ചന്ദ്രൻ വെളുത്ത പക്ഷത്തിലായിരിക്കും. വൃശ്ചികം എട്ടിന് പൗർണമിയും തുടർന്ന് കറുത്തപക്ഷവും വരും. വൃശ്ചികം 22നാണ് കറുത്തവാവ്. ഈ ഗ്രഹനിലകളുടെ അടിസ്ഥാനത്തിൽ 27 നക്ഷത്രക്കാരുടെയും വൃശ്ചികമാസഫലം അറിയാം.

അശ്വതി

കുടുംബപരമായും തൊഴിൽപരമായും ചില വെല്ലുവിളികൾ നേരിടേണ്ടി വന്നേക്കാവുന്ന മാസമാണിത്. പിതാവിന് അനുകൂലമല്ലാത്ത സാഹചര്യങ്ങൾ ഉണ്ടാകാം. പൈതൃകസ്വത്തുമായി ബന്ധപ്പെട്ട തർക്കങ്ങളും മനഃസമാധാനം നഷ്ടപ്പെടുത്താം. ഉദ്യോഗസ്ഥർക്ക് ജോലിസ്ഥലത്ത് പലവിധ പ്രശ്നങ്ങൾ അഭിമുഖീകരിക്കേണ്ടിവരും.

വ്യാഴത്തിന്റെ അനുകൂലസ്ഥിതി നിലനിൽക്കുന്നുണ്ടെങ്കിലും കേതുവിന്റെയും ചൊവ്വയുടെയും സ്വാധീനം അതിന്റെ ഗുണഫലങ്ങൾ കുറച്ചേക്കാം. കച്ചവടത്തിൽനിന്ന് ചെറിയ ലാഭം പ്രതീക്ഷിക്കാം. വിദ്യാർഥികൾക്ക് പഠനത്തിൽ മികവ് തെളിയിക്കാനും ബുദ്ധിവികാസത്തിനും അവസരമുണ്ടാകും. ഭൂമിയിൽനിന്നുള്ള വരുമാനം പരിമിതമായിരിക്കും.

പ്രണയബന്ധങ്ങൾക്ക് അനുകൂലമായ സമയമാണ്. കലാരംഗത്ത് പ്രവർത്തിക്കുന്നവർക്ക് മുന്നേറാനുള്ള അവസരങ്ങൾ ലഭിക്കും. പുതിയ സംരംഭങ്ങൾ ആരംഭിക്കാൻ തിടുക്കം കാണിക്കാതിരിക്കുന്നതാണ് ഉചിതം. ന്യായമായ ആവശ്യങ്ങൾക്കായി പണം ലഭിക്കുന്ന സാഹചര്യങ്ങളുണ്ടാകും.

ഭരണി

ചില കാര്യങ്ങളിൽ ആശയക്കുഴപ്പവും അനാവശ്യമായ യാത്രകളും ഉണ്ടാകാം. മേലധികാരികളിൽനിന്ന് പ്രതീക്ഷിക്കുന്ന പിന്തുണ ലഭിക്കണമെന്നില്ല. രാഹു-കേതു രാശിമാറ്റം മാനസിക സമ്മർദങ്ങൾ വർധിപ്പിച്ചേക്കാം. അതിനാൽ സംസാരത്തിലും പ്രവർത്തനങ്ങളിലും കൂടുതൽ ജാഗ്രത പുലർത്തണം.

സുഹൃത്തുക്കളുമായുള്ള ബന്ധത്തിൽ അകൽച്ചയുണ്ടാകാൻ സാധ്യതയുണ്ട്. അതേസമയം വ്യാഴത്തിന്റെ സ്വാധീനത്തിൽ ചില ചെറിയ നേട്ടങ്ങൾ സ്വന്തമാക്കാനാകും. സാഹിത്യരംഗത്തുള്ളവർക്ക് രചനകളിലൂടെ ശ്രദ്ധ നേടാം. ക്ഷേത്ര-മതപരമായ ചടങ്ങുകളിൽ പങ്കെടുക്കാനും മുടങ്ങിക്കിടന്ന വഴിപാടുകൾ പൂർത്തിയാക്കാനും അവസരമുണ്ടാകും.

മക്കളിലൂടെ സന്തോഷകരമായ അനുഭവങ്ങളുണ്ടാകും. പ്രണയബന്ധങ്ങൾ ഊഷ്മളമായി തുടരും. പുനർവിവാഹത്തിന് ശ്രമിക്കുന്നവർക്ക് അനുകൂലമായ തീരുമാനങ്ങളുണ്ടാകാം. ജോലി അഭിമുഖങ്ങളിൽ മികച്ച പ്രകടനം കാഴ്ചവെക്കുമെങ്കിലും നിയമന ഉത്തരവ് ലഭിക്കാൻ വൈകിയേക്കാം.

കാർത്തിക

മേടക്കൂറുകാർക്കും ഇടവക്കൂറുകാർക്കും സമ്മർദങ്ങൾ നേരിടേണ്ടിവരുന്ന സാഹചര്യങ്ങളുണ്ടാകാം. മേടക്കൂറുകാർക്ക് വ്യാഴത്തിന്റെ അനുകൂലതയാൽ പ്രശ്നങ്ങൾക്ക് വേഗത്തിൽ പരിഹാരം കണ്ടെത്താനാകും. സന്താനങ്ങൾക്ക് ഗുണകരമായ അനുഭവങ്ങളുണ്ടാകും.

രാഹു-കേതു മാറ്റം ഇരുകൂറുകാർക്കും ഒരുപോലെ ഗുണകരമാകില്ല. വിദ്യാർഥികൾ പഠനത്തിൽ കൂടുതൽ ശ്രദ്ധ പുലർത്തും. തൊഴിൽ അഭിമുഖങ്ങളിൽ മികച്ച പ്രകടനം കാഴ്ചവെക്കാനാകും. പ്രണയബന്ധങ്ങളിൽ ചെറിയ അസ്വാരസ്യങ്ങൾ ഉണ്ടായേക്കാം.

ഓൺലൈൻ വ്യാപാരത്തിലൂടെ സാമ്പത്തിക നേട്ടം പ്രതീക്ഷിക്കാം. വാഹനം വാങ്ങുന്നതുമായി ബന്ധപ്പെട്ട് കുടുംബത്തിലെ മുതിർന്നവരും പുതുതലമുറയും തമ്മിൽ അഭിപ്രായവ്യത്യാസങ്ങൾ ഉടലെടുക്കാൻ സാധ്യതയുണ്ട്.

രോഹിണി

നിലവിലെ സാഹചര്യങ്ങളിൽ വലിയ മാറ്റങ്ങൾ പ്രതീക്ഷിക്കാനാകാത്ത മാസമാണിത്. നിലവിലുള്ള കാര്യങ്ങളുമായി പൊരുത്തപ്പെട്ട് മുന്നോട്ടുപോകുന്നതാണ് ഉചിതം. ജോലി അന്വേഷിക്കുന്നവർക്ക് നിരാശ നേരിടേണ്ടിവന്നേക്കാം. എന്നാൽ ശ്രമങ്ങൾ ഉപേക്ഷിക്കാതെ തുടരേണ്ടതുണ്ട്.

ബിസിനസ് വിപുലീകരിക്കാനുള്ള ശ്രമങ്ങൾ നടക്കും. ഇതിനായി പരസ്യങ്ങളെ ആശ്രയിക്കേണ്ടിവരാം. വിദേശയാത്രയ്ക്ക് തയ്യാറെടുക്കുന്നവർക്ക് തടസ്സങ്ങൾ മാറിത്തുടങ്ങും. ഗവേഷണ പ്രവർത്തനങ്ങൾ തടസ്സമില്ലാതെ മുന്നോട്ടുകൊണ്ടുപോകാനാകും.

സിനിമ, സംഗീതം, നാടകം, പാരമ്പര്യ കലകൾ തുടങ്ങിയ മേഖലകളിൽ പ്രവർത്തിക്കുന്നവർക്ക് കൂടുതൽ അവസരങ്ങൾ ലഭിക്കും. പ്രണയബന്ധങ്ങളിൽ അടുപ്പവും പരസ്പര ധാരണയും വർധിക്കും. ഭൂമി വാങ്ങുന്നതിനോ വിൽക്കുന്നതിനോ സാഹചര്യമൊരുങ്ങാം. ചെറിയ നിക്ഷേപങ്ങൾ നടത്താനും സാധിക്കും.

മകയിരം

മിഥുനക്കൂറുകാർക്ക് സൂര്യന്റെ സഞ്ചാരം അനുകൂലമായതിനാൽ തൊഴിൽരംഗത്ത് സമാധാനവും പുരോഗതിയും ഉണ്ടാകും. കഴിവുകൾ പ്രകടിപ്പിക്കാനും കൂടുതൽ ഉത്തരവാദിത്വങ്ങൾ ഏറ്റെടുക്കാനും അവസരങ്ങൾ ലഭിക്കും.

എന്നാൽ രാഹു, കേതു, ചൊവ്വ എന്നിവയുടെ സ്വാധീനം ഇടവം, മിഥുനം കൂറുകാർക്ക് ഒരുപോലെ അനുകൂലമാകില്ല. ഇടവക്കൂറുകാർക്ക് സാമ്പത്തികമായി മെച്ചപ്പെട്ട സാഹചര്യങ്ങളുണ്ടാകും. കടബാധ്യതകൾ കുറയ്ക്കാനും മക്കളുടെ ഭാവിക്കായി നിക്ഷേപങ്ങൾ നടത്താനും കഴിയും.

ബന്ധുക്കളുമായുള്ള തർക്കങ്ങളിൽ സമവായത്തിലെത്താൻ സാധ്യതയുണ്ട്. പ്രണയബന്ധങ്ങളിൽ താൽപര്യം കുറയുകയോ സുഹൃദ്‌വലയങ്ങളിൽനിന്ന് അകന്നുനിൽക്കാൻ തോന്നുകയോ ചെയ്യാം. ഭൂമി വാങ്ങാനുള്ള ശ്രമങ്ങളിൽ കാലതാമസമുണ്ടാകും. ദീർഘയാത്രകൾ ആസൂത്രണം ചെയ്യുകയും പുതിയ സാങ്കേതികവിദ്യകൾ പഠിക്കാൻ താൽപര്യം പ്രകടിപ്പിക്കുകയും ചെയ്യും.

തിരുവാതിര

തൊഴിൽപരമായി മുന്നേറ്റമുണ്ടാക്കാൻ കഴിയുന്ന മാസമാണിത്. കൂടുതൽ ഉത്സാഹത്തോടെ പ്രവർത്തിക്കാനും പുതിയ സംരംഭങ്ങൾക്ക് തുടക്കമിടാനും സാധിക്കും. സർക്കാരിൽനിന്ന് ലഭിക്കേണ്ട അനുമതികൾ ലഭിച്ചേക്കാം. പിതാവും മക്കളും തമ്മിലുള്ള അഭിപ്രായവ്യത്യാസങ്ങൾ പരിഹരിക്കപ്പെടാനും സാധ്യതയുണ്ട്.

വ്യാഴത്തിന്റെ അനുകൂലസ്ഥിതി പ്രവർത്തനങ്ങൾക്ക് പിന്തുണ നൽകും. വായ്പ, ചിട്ടി തുടങ്ങിയ മാർഗങ്ങളിലൂടെ പണം ലഭിക്കാനിടയുണ്ട്. എന്നാൽ രാഹു അഷ്ടമത്തിലേക്കും കേതു രണ്ടാം ഭാവത്തിലേക്കും മാറുന്നതിനാൽ അപ്രതീക്ഷിത തടസ്സങ്ങൾ ഉണ്ടായേക്കാം. ആരോഗ്യകാര്യങ്ങളിൽ പ്രത്യേക ശ്രദ്ധ വേണം.

പഠനത്തിൽ വലിയ മാറ്റങ്ങൾ പ്രതീക്ഷിക്കാനില്ല. ഫ്ലാറ്റ് സ്വന്തമാക്കാനുള്ള ശ്രമങ്ങൾ വൈകിയേക്കാം. വിവാഹത്തിനായി കാത്തിരിക്കുന്നവർക്ക് കാര്യങ്ങൾ അനുകൂലമാകാൻ കൂടുതൽ സമയം വേണ്ടിവരും.

പുണർതം

വ്യാഴത്തിന്റെയും കേതുവിന്റെയും സ്വാധീനം പ്രവർത്തനങ്ങൾക്ക് പിന്തുണ നൽകും. പ്രതീക്ഷിച്ച കാര്യങ്ങൾ വൈകിയാണെങ്കിലും നടപ്പിലാക്കാൻ സാധിക്കും. ഔദ്യോഗിക യാത്രകളും സന്ദർശനങ്ങളും ഫലപ്രദമാകും.

ചില മേഖലകളിൽ എതിർപ്പുകൾ നേരിടേണ്ടിവരും. എന്നാൽ വിമർശനങ്ങളിൽ പ്രസക്തമായ കാര്യങ്ങൾ തിരിച്ചറിഞ്ഞ് ആവശ്യമായ മാറ്റങ്ങൾ വരുത്തുന്നത് ഗുണകരമാകും. ലഭിക്കാനുള്ള പണത്തിൽ ചിലത് തിരിച്ചുകിട്ടാൻ സാധ്യതയുണ്ട്.

വൃശ്ചികം 19ന് സംഭവിക്കുന്ന രാഹു-കേതു മാറ്റം അത്ര അനുകൂലമല്ല. ആരോഗ്യത്തിലും പഠനത്തിലും കൂടുതൽ ശ്രദ്ധ ആവശ്യമാണ്. കർക്കടകക്കൂറുകാർക്ക് പൊതുസമൂഹത്തിൽ സ്വാധീനം വർധിക്കാം. വ്യാപാരസ്ഥാപനങ്ങൾ നടത്തുന്നവർക്ക് വരുമാനം മെച്ചപ്പെടും. സാഹസികമായ തീരുമാനങ്ങൾ ഒഴിവാക്കുന്നതാണ് ഉചിതം.

പൂയം

സൂര്യൻ അഞ്ചാം ഭാവത്തിൽ സഞ്ചരിക്കുന്നതിനാൽ തീരുമാനങ്ങളെടുക്കുന്നതിൽ അമിതമായ ആലോചനകൾ ഉണ്ടായേക്കാം. പ്രവർത്തനങ്ങളിലെ ഉത്സാഹം കുറയാനും നൽകിയ വാഗ്ദാനങ്ങൾ പാലിക്കാൻ ബുദ്ധിമുട്ടുണ്ടാകാനും സാധ്യതയുണ്ട്.

ജന്മരാശിയിൽനിന്ന് ചൊവ്വ മാറുന്നത് ആശ്വാസകരമാണെങ്കിലും കേതുവിന്റെ വരവ് ചില പ്രതിസന്ധികൾ തുടരാൻ ഇടയാക്കും. അതേസമയം വ്യാഴത്തിന്റെ അനുകൂലസ്ഥിതി കുടുംബജീവിതത്തിൽ സന്തോഷവും സമാധാനവും നൽകും.

സംഘടനകളിൽ നേതൃസ്ഥാനങ്ങൾ ലഭിക്കാം. പഠനത്തിലും ഗവേഷണത്തിലും വ്യക്തമായ ലക്ഷ്യബോധത്തോടെ മുന്നോട്ടുപോകാനാകും. വിദേശയാത്രയ്ക്ക് കാത്തിരിക്കുന്നവർക്ക് അവസരങ്ങൾ ലഭിക്കും. പുതിയ വാഹനം വാങ്ങാനും വീട് നവീകരിക്കാനും സാധ്യതയുണ്ട്. അവിവാഹിതരുടെ വിവാഹാലോചനകൾക്ക് അനുകൂലമായ തീരുമാനങ്ങളുണ്ടാകാം. ആരോഗ്യപ്രശ്നങ്ങൾക്ക് ആവശ്യമായ ചികിത്സ ലഭിക്കും.

ആയില്യം

ജന്മനക്ഷത്രത്തിലെ ചൊവ്വ മാറി അവിടേക്ക് കേതു എത്തുന്നത് നിലവിലുള്ള ചില പ്രശ്നങ്ങൾ തുടരാനുള്ള സൂചനയാണ്. പങ്കാളിത്ത ബിസിനസിൽ പ്രതീക്ഷിച്ച വിജയം നേടാൻ കൂടുതൽ പരിശ്രമം ആവശ്യമായി വരും. ജോലി അന്വേഷിക്കുന്നവർക്ക് നിയമന ഉത്തരവ് വൈകിയേക്കാം.

മറ്റുള്ളവരുമായി കൂടിയാലോചിക്കാതെ സ്വന്തം തീരുമാനങ്ങൾ മാത്രം നടപ്പാക്കുന്നത് ശത്രുക്കളെ സൃഷ്ടിക്കാം. പ്രണയബന്ധങ്ങളിൽ ചില അസ്വാരസ്യങ്ങൾ ഉണ്ടായാലും ശുക്രന്റെ അനുകൂലതയാൽ അവ പരിഹരിക്കാൻ സാധിക്കും.

ഭൂമി വിൽപ്പനയിലൂടെ പണം ലഭിക്കാൻ സാധ്യതയുണ്ട്. കടബാധ്യതകൾ കുറയ്ക്കാനാകും. വിദ്യാർഥികൾക്ക് പഠനത്തിൽ കൂടുതൽ ഉത്സാഹം കൈവരും. വിദേശയാത്രകൾക്ക് തടസ്സമുണ്ടാകില്ല. സമ്മാനങ്ങൾ നൽകാനും സ്വീകരിക്കാനും അവസരങ്ങളുണ്ടാകും.

മകം

ലക്ഷ്യങ്ങൾ നേടിയെടുക്കാൻ കൂടുതൽ പരിശ്രമം ആവശ്യമായ മാസമാണിത്. വ്യാഴവും കേതുവും ജന്മരാശിയിലും ചൊവ്വ പന്ത്രണ്ടാം ഭാവത്തിലും സഞ്ചരിക്കുന്നതിനാൽ കാര്യങ്ങൾ പ്രതീക്ഷിച്ച വേഗത്തിൽ മുന്നോട്ടുപോകണമെന്നില്ല.

മേലധികാരികൾ പുതിയ ഉത്തരവാദിത്വങ്ങൾ ഏൽപ്പിച്ചേക്കാം. എന്നാൽ അവ പൂർത്തിയാക്കുന്നതിൽ പലവിധ തടസ്സങ്ങൾ നേരിടേണ്ടിവരും. ഏകാഗ്രത കുറയാനും സാധ്യതയുണ്ട്. പകരക്കാരെ ചുമതലകൾ ഏൽപ്പിക്കുമ്പോൾ കൂടുതൽ ശ്രദ്ധിക്കണം.

വ്യാപാരത്തിൽനിന്ന് വലിയ ലാഭം പ്രതീക്ഷിക്കാനാകില്ല. രാഷ്ട്രീയരംഗത്ത് മത്സരബുദ്ധി വർധിക്കും. ഹ്രസ്വകാല കോഴ്സുകൾ പൂർത്തിയാക്കാനാകും. വീടുവിട്ട് താമസിക്കേണ്ട സാഹചര്യം ഉണ്ടായേക്കാം. നാലാം ഭാവത്തിലെ ശുക്രന്റെ അനുകൂലത പ്രണയബന്ധങ്ങളിൽ പുതിയ സന്തോഷങ്ങൾ നൽകും. പാരമ്പര്യസ്വത്ത് വിൽക്കാനുള്ള ശ്രമങ്ങൾ തുടരേണ്ടിവരും.

പൂരം

ആദർശങ്ങളിലും ഉയർന്ന ചിന്തകളിലും ഉറച്ചുനിൽക്കാൻ സാധിക്കുന്ന സമയമാണിത്. ന്യായമായ ആവശ്യങ്ങൾ നടപ്പിലാക്കാൻ കഴിയും. എന്നാൽ നാലാം ഭാവത്തിലെ സൂര്യന്റെ സഞ്ചാരം യാത്രകളും അലച്ചിലും വർധിപ്പിച്ചേക്കാം. മനഃസമാധാനത്തിനും ചെറിയ കുറവുണ്ടാകാം.

ഒപ്പം പ്രവർത്തിക്കുന്നവർ ഉത്തരവാദിത്വങ്ങൾ മറക്കുന്നത് അസ്വസ്ഥത സൃഷ്ടിക്കും. സാമ്പത്തിക ഇടപാടുകളിൽ പ്രത്യേകം ശ്രദ്ധിക്കണം. മറ്റുള്ളവരാൽ വഞ്ചിക്കപ്പെടാനുള്ള സാധ്യതയുണ്ട്. രാഹുവിന്റെ രാശിമാറ്റം അനുകൂലമാണെങ്കിലും അതിന്റെ ഗുണഫലങ്ങൾ അനുഭവപ്പെടാൻ സമയമെടുക്കും.

വിലപിടിപ്പുള്ള സമ്മാനങ്ങൾ ലഭിക്കാം. വാഹനം വാങ്ങുന്ന കാര്യത്തിൽ തീരുമാനമെടുക്കാൻ ആശയക്കുഴപ്പമുണ്ടാകും. വിദ്യാർഥികൾക്ക് പഠനത്തിൽ കൂടുതൽ ഉത്സാഹം ലഭിക്കും. വീട് നവീകരിക്കാനും സൗന്ദര്യവൽക്കരിക്കാനും സാധിക്കും. ദാമ്പത്യബന്ധങ്ങളിൽ പരസ്പര ധാരണ കുറയാൻ സാധ്യതയുള്ളതിനാൽ ആരോഗ്യകാര്യങ്ങളിലും ശ്രദ്ധ വേണം.

ഉത്രം

കന്നിക്കൂറുകാർക്ക് പൊതുവേ അനുകൂലമായ സാഹചര്യങ്ങളാണ് ഈ മാസം പ്രതീക്ഷിക്കാവുന്നത്. തൊഴിൽരംഗത്ത് പുരോഗതിയുണ്ടാകും. പുതിയ സാഹചര്യങ്ങളോട് വേഗത്തിൽ പൊരുത്തപ്പെടാനും പുതിയ കാര്യങ്ങൾ പഠിക്കാനും കഴിയും. മുമ്പ് മനസ്സിലാക്കാൻ പ്രയാസമായിരുന്ന വിഷയങ്ങൾ ഇപ്പോൾ എളുപ്പത്തിൽ ഗ്രഹിക്കാനാകും.

അധികാരസ്ഥാനങ്ങളിൽ സ്വാധീനം വർധിക്കും. എന്നാൽ ചിങ്ങക്കൂറുകാർക്ക് ദേഷ്യവും അസ്വസ്ഥതയും കൂടാൻ സാധ്യതയുണ്ട്. പ്രതീക്ഷിച്ച തൊഴിൽ അവസരങ്ങൾ വൈകിയേക്കാം. നിലവിലുള്ള ഏജൻസി പ്രവർത്തനങ്ങളും കരാറുകളും ലാഭകരമായി തുടരും.

അവിവാഹിതർക്ക് വിവാഹാലോചനകളിൽ പ്രതീക്ഷയേകുന്ന പുരോഗതിയുണ്ടാകും. വീടുനിർമാണവുമായി ബന്ധപ്പെട്ട തടസ്സങ്ങൾ മാറാം. അപ്രതീക്ഷിത സഹായങ്ങൾ ലഭിക്കുകയും ബന്ധുക്കളുടെ പ്രശ്നങ്ങൾ പരിഹരിക്കാൻ കഴിയുകയും ചെയ്യും. കുടുംബകാര്യങ്ങളിൽ കൂടുതൽ ശ്രദ്ധ ചെലുത്തും. തീർത്ഥയാത്രകൾക്കും അവസരമുണ്ടാകും.

അത്തം

തൊഴിൽരംഗത്ത് നേട്ടങ്ങൾ കൈവരിക്കാൻ കഴിയുന്ന മാസമാണിത്. ജോലികളിലെ തടസ്സങ്ങൾ മാറുകയും കാര്യങ്ങൾ കൂടുതൽ സ്വാതന്ത്ര്യത്തോടെ നിർവഹിക്കാനാകുകയും ചെയ്യും. പുതിയ ശാഖ ആരംഭിക്കാനുള്ള ശ്രമങ്ങൾ വിജയത്തിലെത്താൻ സാധ്യതയുണ്ട്.

എന്നാൽ വ്യാഴത്തിന്റെ പന്ത്രണ്ടാം ഭാവത്തിലെ സ്ഥിതി സാമ്പത്തിക സമ്മർദങ്ങൾ സൃഷ്ടിച്ചേക്കാം. അനിവാര്യവും അനാവശ്യവുമായ ചെലവുകൾ വർധിക്കും. രാഹു-കേതു മാറ്റം സമ്മിശ്രഫലങ്ങളാണ് നൽകുക.

രാഹു അഞ്ചാം ഭാവത്തിലെത്തുന്നത് മക്കളുമായി ബന്ധപ്പെട്ട ആശങ്കകൾക്കും അമിതചിന്തകൾക്കും ഇടയാക്കാം. ആത്മീയ കാര്യങ്ങളിലെ ശ്രദ്ധയിലും കുറവുണ്ടായേക്കാം. കേതു പതിനൊന്നാം ഭാവത്തിലേക്ക് മാറുന്നത് ചില അപ്രതീക്ഷിത വരുമാനങ്ങൾക്കും ഭൗതിക നേട്ടങ്ങൾക്കും വഴിയൊരുക്കും. പ്രണയബന്ധങ്ങൾ വീണ്ടും സജീവമാകാനും കുടുംബജീവിതത്തിൽ സന്തോഷം വർധിക്കാനും സാധ്യതയുണ്ട്.

ചിത്തിര

തുലാക്കൂറുകാർക്ക് അനുകൂലമായ പല സാഹചര്യങ്ങളും വന്നുചേരും. സാമ്പത്തികമായി നേരിട്ടുകൊണ്ടിരിക്കുന്ന സമ്മർദങ്ങൾ കുറയുകയും സമൂഹത്തിൽ അംഗീകാരം ലഭിക്കുകയും ചെയ്യും. തൊഴിൽരംഗത്ത് സ്ഥാനക്കയറ്റത്തിന് സാധ്യതയുണ്ട്.

വായ്പ, ചിട്ടി, നറുക്കെടുപ്പ് തുടങ്ങിയവയിലൂടെ പണം ലഭിക്കാം. സൂര്യന്റെ സഞ്ചാരം യാത്രകളിൽ ബുദ്ധിമുട്ടുകൾ സൃഷ്ടിച്ചേക്കാം. ചില സന്ദർഭങ്ങളിൽ പരുഷമായി സംസാരിക്കേണ്ടിവരാനും സാധ്യതയുണ്ട്. ജന്മരാശിയിലെ ശുക്രന്റെ സ്വാധീനം ഭൗതിക സുഖങ്ങൾ വർധിപ്പിക്കും.

കന്നിക്കൂറുകാർക്ക് പ്രതീക്ഷിച്ച നിയമന ഉത്തരവ് ലഭിക്കാനിടയുണ്ട്. രാഷ്ട്രീയരംഗത്ത് പിന്തുണ വർധിക്കും. എന്നാൽ ചെലവുകൾ നിയന്ത്രിക്കാൻ പ്രയാസമുണ്ടാകാം. വിദ്യാഭ്യാസകാര്യങ്ങളിൽ ലക്ഷ്യബോധം കൈവരിക്കും. സാമൂഹിക സാഹചര്യങ്ങളോട് പൊരുത്തപ്പെടാൻ സാധിക്കുമെങ്കിലും ആത്മീയ കാര്യങ്ങളിൽ താൽപര്യം കുറയാനിടയുണ്ട്.

ചോതി

ആത്മവിശ്വാസത്തോടെ തൊഴിൽരംഗത്ത് മുന്നേറാൻ സാധിക്കും. മന്ദഗതിയിലായിരുന്ന പല കാര്യങ്ങളും വീണ്ടും സാധാരണ നിലയിലാകും. കഴിവിനൊത്ത അവസരങ്ങൾ ലഭിക്കുകയും സ്വകാര്യ സ്ഥാപനങ്ങളിൽ ജോലി ചെയ്യുന്നവർക്ക് അനുകൂലമായ തൊഴിൽസാഹചര്യം ഉണ്ടാകുകയും ചെയ്യും. സ്ഥാനക്കയറ്റത്തിനും സാധ്യതയുണ്ട്.

സംഘടനകളിൽ മത്സരങ്ങൾ നേരിടേണ്ടിവരാം. ശുക്രന്റെ അനുകൂലസ്ഥിതി ഏകാന്തത അനുഭവിക്കുന്നവർക്ക് മാനസിക ആശ്വാസം നൽകും. മറ്റുള്ളവരോടുള്ള സൗഹൃദപരമായ സമീപനം അംഗീകരിക്കപ്പെടും.

നിക്ഷേപങ്ങൾ വർധിപ്പിക്കാൻ സാഹചര്യമുണ്ടാകും. എന്നാൽ വീടിന്റെ അറ്റകുറ്റപ്പണികൾക്കായി പ്രതീക്ഷിച്ചതിലും കൂടുതൽ പണം ചെലവഴിക്കേണ്ടിവന്നേക്കാം. രാഹു-കേതു മാറ്റത്തിന്റെ ഫലങ്ങൾ ഉടൻ അനുഭവപ്പെടണമെന്നില്ല.

വിശാഖം

തുലാക്കൂറുകാർക്കും വൃശ്ചികക്കൂറുകാർക്കും വ്യാഴത്തിന്റെ സഞ്ചാരം വ്യത്യസ്തമായ ഫലങ്ങളാണ് നൽകുക. സമൂഹത്തിൽ ബഹുമാനവും അംഗീകാരവും വർധിക്കാൻ സാധ്യതയുണ്ട്. നേരത്തെ പരിശ്രമിച്ചിട്ടും നടക്കാതെപോയ കാര്യങ്ങൾ ഇപ്പോൾ വിജയത്തിലെത്താം.

ജോലി അന്വേഷിക്കുന്നവർക്ക് അനുകൂലമായ അവസരങ്ങൾ ലഭിക്കും. വരുമാനമാർഗങ്ങൾ നിലച്ചുപോയവർക്ക് വീണ്ടും മുന്നേറാൻ കഴിയും. ലക്ഷ്യത്തിലെത്താനുള്ള താൽപര്യം നിലനിൽക്കുമെങ്കിലും അതിനായി സ്വീകരിക്കുന്ന മാർഗങ്ങളിൽ ചിലപ്പോൾ ശ്രദ്ധക്കുറവുണ്ടായേക്കാം.

ധാർമിക കാര്യങ്ങളിലുള്ള താൽപര്യം കുറയാം. സ്വന്തം സ്വാതന്ത്ര്യം നഷ്ടപ്പെടുന്നതായി തോന്നുകയും മറ്റുള്ളവരെ ആശ്രയിക്കുന്നത് ഇഷ്ടപ്പെടാതിരിക്കുകയും ചെയ്യും. വിലപിടിപ്പുള്ള സമ്മാനങ്ങൾ ലഭിക്കാനും സ്ത്രീകളുടെ പിന്തുണ നേടാനും സാധ്യതയുണ്ട്. യാത്രകൾ സന്തോഷകരമാകും. ഭൂമിയിൽനിന്നുള്ള വരുമാനം കുറയാം. ഭൂമി ഇടപാടുകളിൽ ജാഗ്രത വേണം. വാഹനം വാങ്ങാൻ അത്ര അനുകൂലമായ സമയമല്ല. ആരോഗ്യകാര്യങ്ങളിലും അലംഭാവം പാടില്ല.

അനിഴം

സൂര്യൻ ജന്മരാശിയിൽ സഞ്ചരിക്കുന്നതിനാൽ മാനസിക സമ്മർദവും ശാരീരിക അസ്വസ്ഥതകളും ഉണ്ടായേക്കാം. മുൻകൂട്ടി കരുതിവെച്ച പണം മറ്റു ആവശ്യങ്ങൾക്കായി ചെലവഴിക്കേണ്ടിവരും. ലക്ഷ്യങ്ങൾ കൈവരിക്കാൻ കൂടുതൽ അന്വേഷണവും പരിശ്രമവും ആവശ്യമാണ്.

സഹപ്രവർത്തകരുടെയും ഒപ്പമുള്ളവരുടെയും പിന്തുണ പൂർണമായി ലഭിക്കണമെന്നില്ല. സാമ്പത്തിക പരീക്ഷണങ്ങൾക്കും അനാവശ്യ നിക്ഷേപങ്ങൾക്കും മുതിരരുത്. തെറ്റിദ്ധാരണകൾ ഉണ്ടെങ്കിൽ അവ സമയബന്ധിതമായി പരിഹരിക്കണം.

കുടുംബത്തിലെ മംഗളകർമങ്ങളുടെ നടത്തിപ്പിൽ പ്രധാന പങ്കുവഹിക്കേണ്ടിവരും. പുതിയ വാഹനം വാങ്ങാനുള്ള ശ്രമങ്ങൾ വിജയിച്ചേക്കാം. കുടുംബത്തിൽ ചിലപ്പോൾ സമാധാനവും മറ്റുചിലപ്പോൾ അസ്വാരസ്യങ്ങളും അനുഭവപ്പെടാം. ബിസിനസ് സ്ഥാപനത്തിന്റെ പുതിയ ശാഖ ആരംഭിക്കാൻ കൂടുതൽ കാത്തിരിക്കേണ്ടിവരും. തീർത്ഥയാത്രകൾ മാനസിക സമ്മർദം കുറയ്ക്കാൻ സഹായിക്കും.

തൃക്കേട്ട

വ്യാഴത്തിന്റെയും സൂര്യന്റെയും സ്ഥിതികൾ പ്രതീക്ഷിച്ച ഗുണഫലങ്ങൾ നൽകാൻ പര്യാപ്തമാകണമെന്നില്ല. രാശ്യാധിപനായ ചൊവ്വ നീചാവസ്ഥയിൽ തുടരുന്ന മാസത്തിന്റെ ആദ്യപകുതിയിൽ ആത്മവിശ്വാസക്കുറവ് അനുഭവപ്പെട്ടേക്കാം. ചില തീരുമാനങ്ങൾ മാറ്റേണ്ടിവരും. നിലവിലെ ജോലിയിൽ മടുപ്പ് തോന്നാനും സാധ്യതയുണ്ട്.

കമ്മീഷൻ, കരാർ, ദിവസക്കൂലി തുടങ്ങിയ മാർഗങ്ങളിലൂടെ വരുമാനം ലഭിക്കാം. ബിസിനസിൽ വലിയ മുതൽമുടക്ക് നടത്തുന്നത് തൽക്കാലം ഒഴിവാക്കുന്നതാണ് നല്ലത്. പ്രണയബന്ധങ്ങൾ മാനസിക ഉന്മേഷം നൽകും.

വൃശ്ചികം 19ലെ രാഹുവിന്റെ രാശിമാറ്റം അനുകൂലമായ മാറ്റങ്ങൾക്ക് വഴിയൊരുക്കും. തൊഴിൽരംഗത്തെ ഉത്സാഹം വർധിക്കുകയും തടസ്സങ്ങൾ മാറുകയും ചെയ്യും. നഷ്ടപ്പെട്ട വിശ്വാസ്യത വീണ്ടെടുക്കാനും ബുദ്ധിപൂർവം പ്രശ്നങ്ങളെ മറികടക്കാനും സാധിക്കും.

മൂലം

തൊഴിൽരംഗത്ത് സമാധാനം കുറയുകയും ജോലിസംബന്ധമായ യാത്രകൾ വർധിക്കുകയും ചെയ്യാം. ലക്ഷ്യങ്ങൾ നേടിയെടുക്കാൻ പതിവിലും കൂടുതൽ പരിശ്രമിക്കേണ്ടിവരും. എന്നാൽ ഒമ്പതാം ഭാവത്തിലെ വ്യാഴത്തിന്റെ സഞ്ചാരം പല പ്രശ്നങ്ങൾക്കും പരിഹാരം കണ്ടെത്താൻ സഹായിക്കും. ഭാഗ്യാനുഭവങ്ങളും സാമൂഹിക സ്വാധീനത്തിലെ വർധനവും പ്രതീക്ഷിക്കാം.

രാഹു-കേതു മാറ്റം അത്ര അനുകൂലമല്ല. അതിന്റെ ഫലങ്ങൾ ഉടൻ പ്രകടമാകണമെന്നില്ലെങ്കിലും സാമ്പത്തിക സമ്മർദങ്ങൾക്ക് സാധ്യതയുണ്ട്. ആരോഗ്യപരിപാലനത്തിൽ ശ്രദ്ധ പുലർത്തണം.

ഭൂമിയുമായി ബന്ധപ്പെട്ട തർക്കങ്ങളിൽ നിയമപരമായ മാർഗങ്ങൾ സ്വീകരിക്കുന്നതാണ് ഉചിതം. സഹോദരങ്ങളുടെ ഭാവി കാര്യങ്ങളിൽ കൂടുതൽ ശ്രദ്ധ ചെലുത്തും. പുതിയ വാഹനം വാങ്ങാൻ അത്ര അനുകൂലമായ സമയമല്ല.

പൂരാടം

ഗുണദോഷങ്ങൾ ഒരുപോലെ അനുഭവപ്പെടുന്ന മാസമാണിത്. ഭാഗ്യസ്ഥാനത്തെ വ്യാഴത്തിന്റെ സഞ്ചാരം മനഃസമാധാനം നൽകും. ഒറ്റപ്പെട്ടുപോയവർക്ക് ആശ്വാസം ലഭിക്കുകയും ജീവിതത്തിൽ കുറച്ചെങ്കിലും സന്തുലിതാവസ്ഥ കൈവരിക്കുകയും ചെയ്യും. ചെറിയ ഭാഗ്യനേട്ടങ്ങൾക്കും സാധ്യതയുണ്ട്.

എന്നാൽ പന്ത്രണ്ടാം ഭാവത്തിലെ സൂര്യന്റെയും ബുധന്റെയും സഞ്ചാരം തൊഴിൽ, വിദ്യാഭ്യാസ മേഖലകളിൽ ചില ബുദ്ധിമുട്ടുകൾ സൃഷ്ടിച്ചേക്കാം. മേലധികാരികളുടെ ഭാഗത്തുനിന്നുള്ള അനാവശ്യ ഇടപെടലുകളും അധികാരപ്രയോഗവും സമ്മർദത്തിന് കാരണമാകും. വിദ്യാർഥികൾക്ക് പഠനത്തിൽ അലസതയുണ്ടാകാം. ജോലി മാറാനുള്ള ശ്രമങ്ങൾ എളുപ്പത്തിൽ വിജയിക്കണമെന്നില്ല.

പതിനൊന്നാം ഭാവത്തിലെ ശുക്രന്റെ അനുകൂലത പ്രണയബന്ധങ്ങളിലും ഭൗതിക നേട്ടങ്ങളിലും സന്തോഷം നൽകും. രാഹു-കേതു മാറ്റത്തിൽനിന്ന് വലിയ നേട്ടങ്ങൾ പ്രതീക്ഷിക്കാനില്ല. ആരോഗ്യകാര്യങ്ങളിൽ ജാഗ്രത വേണം. ആത്മീയ അനുഷ്ഠാനങ്ങൾ മുടക്കാതിരിക്കുന്നതും നല്ലതാണ്.

ഉത്രാടം

ധനുക്കൂറുകാർക്കും മകരക്കൂറുകാർക്കും വ്യത്യസ്ത ഭാവങ്ങളിലാണ് സൂര്യനും ബുധനും സഞ്ചരിക്കുന്നത്. മറ്റു ഗ്രഹങ്ങളുടെ സ്ഥിതിയും അനുകൂലവും പ്രതികൂലവുമായതിനാൽ മാസത്തിലുടനീളം സമ്മിശ്രഫലങ്ങളാണ് പ്രതീക്ഷിക്കാവുന്നത്.

ജോലി അന്വേഷിക്കുന്നവർക്ക് ചെറിയ അവസരങ്ങൾ ലഭിച്ചേക്കാം. നിലവിലെ തൊഴിൽമേഖലയിൽ തുടരുന്നതാണ് തൽക്കാലം കൂടുതൽ ഉചിതം. ബിസിനസിൽ മുൻമാസത്തെ സ്ഥിതി തുടരും. സ്ഥാപനങ്ങൾ നവീകരിക്കാനോ പുതിയ ശാഖകൾ ആരംഭിക്കാനോ ശ്രമിക്കുമ്പോൾ തടസ്സങ്ങൾ നേരിടേണ്ടിവരും.

കുടുംബകാര്യങ്ങളിൽ ഭാഗികമായ സംതൃപ്തി ലഭിക്കും. യാത്രകൾ ശാരീരിക ക്ഷീണത്തിന് കാരണമാകാം. വിവാഹാലോചനകളിൽ പുരോഗതിയുണ്ടാകുമെങ്കിലും തീരുമാനങ്ങൾ എടുക്കുമ്പോൾ തിടുക്കം ഒഴിവാക്കണം. ആരോഗ്യകാര്യങ്ങളിലും കൂടുതൽ ശ്രദ്ധ ആവശ്യമാണ്.

തിരുവോണം

രാശ്യാധിപനായ ശനി മാസാവസാനം വരെ വക്രഗതിയിൽ തുടരുന്നതിനാൽ പല കാര്യങ്ങളും പ്രതീക്ഷിച്ച സമയത്ത് പൂർത്തിയാക്കാൻ കഴിയണമെന്നില്ല. സമയബന്ധിതമായി ചെയ്യാൻ തീരുമാനിച്ച കാര്യങ്ങൾ വൈകിയേക്കാം. ചില കാര്യങ്ങൾ മാറ്റിവയ്ക്കേണ്ട സാഹചര്യവും ഉണ്ടാകും.

വിദ്യാഭ്യാസരംഗത്ത് മികച്ച ഉത്സാഹം പ്രകടിപ്പിക്കും. പ്രോജക്ടുകൾക്ക് അംഗീകാരവും പ്രശംസയും ലഭിക്കാം. അവസരങ്ങൾ തിരിച്ചറിഞ്ഞ് പ്രവർത്തിക്കാനുള്ള കഴിവ് പ്രകടമാകും. എന്നാൽ ബിസിനസിൽ ആലോചനയില്ലാതെ പണം നിക്ഷേപിക്കുന്നത് ഒഴിവാക്കണം.

പതിനൊന്നാം ഭാവത്തിലെ സൂര്യന്റെ സഞ്ചാരം ഉദ്യോഗസ്ഥർക്ക് അധികാരവും അംഗീകാരവും നേടിക്കൊടുക്കും. സഹപ്രവർത്തകരുടെ വിശ്വാസം വർധിക്കും. രോഗികൾ ആരോഗ്യകാര്യങ്ങളിൽ കൂടുതൽ ശ്രദ്ധിക്കണം. വ്യാഴത്തിന്റെ അഷ്ടമസ്ഥിതി സാമ്പത്തിക ഇടപാടുകളിൽ അബദ്ധങ്ങൾ സംഭവിക്കാൻ ഇടയാക്കാം.

അവിട്ടം

മാസത്തിന്റെ പകുതിയോടെ നക്ഷത്രാധിപനായ ചൊവ്വയുടെ നീചാവസ്ഥ അവസാനിക്കുന്നത് ആത്മവിശ്വാസം വീണ്ടെടുക്കാൻ സഹായിക്കും. ജീവിതത്തിലെ പ്രതിസന്ധികളിൽനിന്ന് പുറത്തുകടന്ന് കൂടുതൽ ഉന്മേഷത്തോടെ മുന്നോട്ടുപോകാനാകും. ജോലിയിലെ സമ്മർദം കുറയുകയും മറ്റുള്ളവരെ ആശ്രയിക്കേണ്ട സാഹചര്യം മാറുകയും ചെയ്യും.

രാഹുവിന്റെ രാശിമാറ്റം സംഭവിച്ചാലും അവിട്ടം നക്ഷത്രത്തിൽ അതിന്റെ സാന്നിധ്യം തുടരുന്നതിനാൽ ചില രഹസ്യങ്ങൾ കണ്ടെത്താനുള്ള ശ്രമങ്ങൾ പ്രശ്നങ്ങളിലേക്ക് നയിച്ചേക്കാം. അനാവശ്യ ഇടപെടലുകൾ മറ്റുള്ളവരുടെ എതിർപ്പിന് കാരണമാകും. വരുമാനം പൊതുവേ തൃപ്തികരമായിരിക്കും.

മകരക്കൂറുകാർക്ക് വ്യാഴത്തിന്റെ സ്ഥിതി ആരോഗ്യകാര്യങ്ങളിൽ അനുകൂലമല്ലെങ്കിലും പഠനത്തിൽ പുരോഗതിയുണ്ടാകും. കുംഭക്കൂറുകാർക്ക് വിവാഹാലോചനകൾ വീണ്ടും സജീവമാകുകയും പുതിയ വാഹനം വാങ്ങാൻ അവസരമൊരുങ്ങുകയും ചെയ്യും.

ചതയം

ഏഴാം ഭാവത്തിലെ വ്യാഴത്തിന്റെ സഞ്ചാരം മാനസിക സമ്മർദങ്ങൾ കുറയ്ക്കാൻ സഹായിക്കും. തൊഴിൽരംഗത്ത് ഉത്തരവാദിത്വങ്ങൾ വർധിക്കും. സമൂഹത്തിൽ അംഗീകാരവും ബഹുമാനവും നേടാനാകും. ആശയങ്ങൾക്കും നിർദേശങ്ങൾക്കും മറ്റുള്ളവരിൽനിന്ന് മികച്ച സ്വീകാര്യത ലഭിക്കും.

സാമ്പത്തികസ്ഥിതി മോശമാകില്ല. ന്യായമായ ആവശ്യങ്ങൾ നടപ്പിലാക്കാൻ സാധിക്കും. ചിലർക്ക് പുതിയ ജോലിയിൽ പ്രവേശിക്കാനുള്ള അവസരമുണ്ടാകും. മകളുടെ വിവാഹവുമായി ബന്ധപ്പെട്ട് ശുഭകരമായ തീരുമാനങ്ങളുണ്ടായേക്കാം. തടസ്സപ്പെട്ട ഭൂമിവിൽപ്പനയും പൂർത്തിയാക്കാനാകും.

ബുധാദിത്യന്മാരുടെയും ചൊവ്വയുടെയും കേതുവിന്റെയും സഞ്ചാരം ആത്മീയ കാര്യങ്ങളിലും ഉപാസനകളിലും തടസ്സങ്ങൾ സൃഷ്ടിച്ചേക്കാം. വിദേശയാത്രയ്ക്ക് തയ്യാറെടുക്കുന്നവർക്ക് മാസത്തിന്റെ രണ്ടാം പകുതിയിൽ അനുകൂലമായ അവസരങ്ങൾ ലഭിക്കും.

പൂരൂരുട്ടാതി

പ്രവർത്തനങ്ങൾക്ക് വേഗം വർധിക്കുമെങ്കിലും കാര്യങ്ങൾ വിലയിരുത്തുന്നതിൽ വസ്തുനിഷ്ഠത കുറയാൻ സാധ്യതയുണ്ട്. സ്വന്തം കാഴ്ചപ്പാടുകൾക്ക് അമിതപ്രാധാന്യം നൽകുന്നത് എതിർപ്പുകൾക്കും ശത്രുതയ്ക്കും കാരണമാകാം. സാഹചര്യങ്ങൾക്കനുസരിച്ച് പ്രായോഗികമായ സമീപനം സ്വീകരിക്കേണ്ടതുണ്ട്.

ബിസിനസിലൂടെ സാമ്പത്തിക നേട്ടം ലഭിക്കുമെങ്കിലും ചെലവുകളും വർധിക്കും. കുംഭക്കൂറുകാർക്ക് യാത്രകളും കൂട്ടുകച്ചവടവും ഗുണകരമാകും. ഗവേഷകർക്ക് പ്രബന്ധങ്ങൾ സമർപ്പിക്കാനും പുതിയ വിഷയങ്ങൾ പഠിക്കാനും അവസരമുണ്ടാകും.

മീനക്കൂറുകാർക്ക് തൊഴിൽസ്ഥലത്ത് മത്സരങ്ങൾ ശക്തമാകാം. സംഘടനകളിലെ നിലപാടുകൾ വിമർശിക്കപ്പെടാനും സാധ്യതയുണ്ട്. ബന്ധുക്കളുടെ സഹായം ലഭിക്കും. പൊതുവേ ഗുണദോഷങ്ങൾ കലർന്ന അനുഭവങ്ങളായിരിക്കും ഈ മാസം.

ഉത്രട്ടാതി

ജന്മനക്ഷത്രത്തിലെ ശനിയുടെ വക്രഗതി അവസാനഘട്ടത്തിലേക്ക് കടക്കുകയാണ്. നിലവിലെ സമ്മർദങ്ങൾ പൂർണമായി മാറിയിട്ടില്ലെങ്കിലും ആശ്വാസകരമായ മാറ്റങ്ങൾ അടുത്തെത്തിയെന്ന തോന്നൽ ഉണ്ടാകും. സാഹസികമായ തീരുമാനങ്ങളും പ്രവർത്തനങ്ങളും ഒഴിവാക്കണം.

ലഭിക്കാനുള്ള പണത്തിൽ ചിലത് തിരിച്ചുകിട്ടാൻ സാധ്യതയുണ്ട്. വായ്പയ്ക്കുള്ള അപേക്ഷയുടെ നടപടികൾ വൈകുമെന്ന് അറിയിപ്പ് ലഭിച്ചേക്കാം. പിടിവാശിയുള്ള സമീപനം മറ്റുള്ളവരുടെ എതിർപ്പിന് കാരണമാകും. പ്രണയബന്ധങ്ങളിലെ തടസ്സങ്ങൾ മറികടക്കാൻ സാധിക്കും.

പ്രധാനപ്പെട്ട കാര്യങ്ങൾ നേടിയെടുക്കാൻ യാത്രകൾ വേണ്ടിവരും. പ്രതീക്ഷകൾ കൈവിടേണ്ട സാഹചര്യമുണ്ടാകില്ല. ഹ്രസ്വകാല കോഴ്സുകളിൽ വിജയിക്കാനാകും. ഫ്ലാറ്റ് വാങ്ങുന്നതുമായി ബന്ധപ്പെട്ട് അനുകൂല സൂചനകൾ ലഭിക്കും. മകന്റെ തൊഴിൽകാര്യങ്ങളിൽ നിലനിന്നിരുന്ന തടസ്സങ്ങൾ മാറാനും സാധ്യതയുണ്ട്.

രേവതി

മാസത്തിന്റെ ഭൂരിഭാഗം സമയവും നക്ഷത്രാധിപനായ ബുധൻ മൗഢ്യാവസ്ഥയിലല്ലാത്തത് കാര്യങ്ങളിൽ വ്യക്തതയും തീരുമാനങ്ങളിൽ കൃത്യതയും നൽകും. അഭിമുഖങ്ങളിൽ മികച്ച പ്രകടനം കാഴ്ചവെക്കാനാകും. ബന്ധുക്കളുമായുള്ള കൂടിച്ചേരലുകൾ സന്തോഷം പകരും.

പരസ്യങ്ങളുടെ സഹായത്തോടെ വ്യാപാരരംഗത്ത് ഉണർവുണ്ടാക്കാൻ സാധിക്കും. എന്നാൽ ചെലവുകൾ നിയന്ത്രിക്കാൻ പ്രയാസമുണ്ടാകാം. കുടുംബസ്വത്തുമായി ബന്ധപ്പെട്ട തർക്കങ്ങൾ കോടതി നടപടികളിലേക്ക് നീങ്ങാതിരിക്കാൻ ശ്രദ്ധിക്കണം.

വ്യാഴത്തിന്റെ ശത്രുഭാവത്തിലെ സഞ്ചാരം ചിലരിൽ അനാവശ്യ സംശയങ്ങളും ആശങ്കകളും സൃഷ്ടിച്ചേക്കാം. ശുക്രന്റെ അനുകൂലത സ്ത്രീകളുമായുള്ള സൗഹൃദബന്ധങ്ങൾ മെച്ചപ്പെടുത്തും. പുതിയ ഇലക്ട്രോണിക് ഉപകരണങ്ങൾ വാങ്ങാനും സാധ്യതയുണ്ട്. ജന്മശനിയുടെ സ്വാധീനം നിലനിൽക്കുന്നതിനാൽ എല്ലാ കാര്യങ്ങളിലും ക്ഷമയും ശ്രദ്ധയും പുലർത്തേണ്ടത് പ്രധാനമാണ്.