​ദോഹ: പരിസ്ഥിതി കാലാവസ്ഥാ വ്യതിയാന മന്ത്രാലയവും (MoECC) ഖത്തർ ഫൗണ്ടേഷന് കീഴിലുള്ള 'എർത്ത്ന' (Earthna) സെന്ററും സംയുക്തമായി സംഘടിപ്പിക്കുന്ന പതിനൊന്നാമത് ഖത്തർ സുസ്ഥിരതാ വാരം (Qatar Sustainability Week - QSW) ഒക്ടോബർ 31 മുതൽ നവംബർ 7 വരെ നടക്കും. രാജ്യത്തുടനീളം പരിസ്ഥിതി സംരക്ഷണ ബോധവൽക്കരണം ശക്തമാക്കുക, വ്യക്തികളിലും സ്ഥാപനങ്ങളിലും സുസ്ഥിര ശീലങ്ങൾ പ്രോത്സാഹിപ്പിക്കുക എന്നിവയാണ് ഈ ദേശീയ പ്രചാരണത്തിന്റെ പ്രധാന ലക്ഷ്യം.
​ഖത്തർ നാഷണൽ വിഷൻ 2030-ന്റെ ലക്ഷ്യങ്ങൾക്കും ഐക്യരാഷ്ട്രസഭയുടെ സുസ്ഥിര വികസന ലക്ഷ്യങ്ങൾക്കും (SDGs) അനുസൃതമായാണ് പരിപാടി സംഘടിപ്പിക്കുന്നത്. 2016-ൽ ആരംഭിച്ച ഈ സംരംഭത്തിൽ 2025 വരെയായി 3,400-ലധികം പരിപാടികളിലൂടെ പത്ത് ലക്ഷത്തിലധികം ആളുകളാണ് പങ്കാളികളായത്.ഈ കാലയളവിൽ വർക്ക്‌ഷോപ്പുകൾ, പാനൽ ചർച്ചകൾ, എക്സിബിഷനുകൾ, വിദ്യാഭ്യാസ പരിപാടികൾ എന്നിവ സംഘടിപ്പിച്ച് പങ്കാളികളാകാൻ സർക്കാർ-സ്വകാര്യ സ്ഥാപനങ്ങളോട് മന്ത്രാലയവും എർത്ത്നയും ആഹ്വാനം ചെയ്തു.
വിഭവങ്ങളുടെ കാര്യക്ഷമമായ ഉപയോഗം, മാലിന്യ നിർമാർജനം, പുനരുപയോഗം (Recycling) എന്നിവയിലൂടെ കാലാവസ്ഥാ വ്യതിയാനത്തെ പ്രതിരോധിക്കാനും വികസനവും പരിസ്ഥിതി സംരക്ഷണവും സമന്വയിപ്പിക്കാനും സാധിക്കുമെന്ന് പരിസ്ഥിതി കാലാവസ്ഥാ വ്യതിയാന മന്ത്രാലയം അസിസ്റ്റന്റ് അണ്ടർസെക്രട്ടറി അഹമ്മദ് മുഹമ്മദ് അൽ സദ വ്യക്തമാക്കി.
സുസ്ഥിരത എന്നത് സമൂഹത്തിന്റെ പൊതുവായ മുൻഗണനയായി മാറിക്കഴിഞ്ഞെന്നും, പ്രാദേശിക സംരംഭങ്ങളെ ആഗോളതലത്തിലേക്ക് ബന്ധിപ്പിക്കാൻ ഈ പതിനൊന്നാം പതിപ്പ് സഹായിക്കുമെന്നും എർത്ത്ന എക്സിക്യൂട്ടീവ് ഡയറക്ടർ ഡോ. ഗോൺസാലോ കാസ്ട്രോ ഡി ലാ മാറ്റ പറഞ്ഞു.
​കായിക യൂത്ത് മന്ത്രാലയം, വിദ്യാഭ്യാസ മന്ത്രാലയം, നഗരസഭ മന്ത്രാലയം, ഖത്തർ ഫ്രീ സോൺസ്, ദോഹ ബാങ്ക്, ലുലു ഗ്രൂപ്പ്, ഖത്തർ മ്യൂസിയംസ്, ഡി.എച്ച്.എൽ (DHL), മെഷീറെബ് പ്രോപ്പർട്ടീസ് ഉൾപ്പെടെയുള്ള പ്രമുഖ സ്ഥാപനങ്ങളാണ് ഇത്തവണത്തെ സ്ട്രാറ്റജിക് പാർട്ണർമാർ.