തെലങ്കാനയിലെ രാജന്ന സിർസില്ല ജില്ലയിൽ യുവാവിനെ വീട്ടിൽ മരിച്ച നിലയിൽ കണ്ടെത്തിയ സംഭവത്തിൽ ദുരൂഹത. ഗൊല്ലപ്പള്ളി സ്വദേശിയായ പി. വംശി (25) ആത്മഹത്യയ്ക്ക് മുമ്പ് എഴുതിയ മരണക്കുറിപ്പിൽ തന്റെ മരണത്തിന് പ്രധാനമന്ത്രി നരേന്ദ്ര മോദിയാണെന്ന് ഉത്തരവാദിയെന്ന് ആരോപിച്ചിട്ടുണ്ട്. കുറിപ്പിന്റെ ചിത്രം വാട്സ്ആപ്പ് സ്റ്റാറ്റസായും യുവാവ് പങ്കുവെച്ചിരുന്നതായി പൊലീസ് അറിയിച്ചു.

പെയിന്ററായി ജോലി ചെയ്തിരുന്ന വംശി ബുധനാഴ്ച വൈകുന്നേരം മദ്യപാനത്തെച്ചൊല്ലി അമ്മ ഭാരതിയുമായി തർക്കിച്ചതിനെ തുടർന്ന് വീട്ടിൽ നിന്ന് ഇറങ്ങിപ്പോയിരുന്നു. രാത്രി പത്തുമണിയോടെ അമിതമായി മദ്യപിച്ച നിലയിൽ തിരിച്ചെത്തിയ അദ്ദേഹം അത്താഴം കഴിച്ചശേഷം മുറിയിലേക്ക് പോയെന്നാണ് കുടുംബത്തിന്റെ മൊഴി.

വ്യാഴാഴ്ച രാവിലെ മുറിയിൽ നിന്ന് ടെലിവിഷന്റെ ശബ്ദം കേട്ടതിനെ തുടർന്ന് അമ്മ അകത്തുകയറിയപ്പോഴാണ് വംശിയെ മരിച്ച നിലയിൽ കണ്ടെത്തിയത്. വിവരം ലഭിച്ചതിനെ തുടർന്ന് സ്ഥലത്തെത്തിയ പൊലീസ് നടത്തിയ പരിശോധനയിലാണ് തെലുങ്കിൽ എഴുതിയ മരണക്കുറിപ്പ് കണ്ടെത്തിയത്.

"എന്റെ മരണത്തിന് ഉത്തരവാദി പ്രധാനമന്ത്രി നരേന്ദ്ര മോദിയാണ്. ഇതിന്റെ പേരിൽ എന്റെ കുടുംബത്തെ ബുദ്ധിമുട്ടിക്കരുത്" എന്നാണ് കുറിപ്പിലെ പ്രധാന പരാമർശം. അതേസമയം, എന്ത് സാഹചര്യത്തിലാണ് ഇത്തരമൊരു കുറിപ്പ് എഴുതിയതെന്ന് വ്യക്തമല്ലെന്ന് പൊലീസ് അറിയിച്ചു.

സംഭവത്തിന് പിന്നാലെ വംശിയുടെ മൊബൈൽ ഫോൺ മുറിയിലെ തട്ടിൻപുറത്ത് നിന്ന് കണ്ടെത്തി. കുടുംബത്തിന് രാഷ്ട്രീയ ബന്ധങ്ങളൊന്നുമില്ലെന്നും, യുവാവിന്റെ മരണത്തിലേക്കു നയിച്ച സാഹചര്യങ്ങളും മരണക്കുറിപ്പിലെ പരാമർശങ്ങളുടെ പശ്ചാത്തലവും ഉൾപ്പെടെ എല്ലാ വശങ്ങളും അന്വേഷിച്ചുവരികയാണെന്നും പൊലീസ് അറിയിച്ചു.