ദോഹ: 2026 ഫിഫ ലോകകപ്പ് മത്സരങ്ങൾ വീടുകൾക്കും മജ്‌ലിസുകൾക്കും പുറത്ത് ഇരുന്ന് ആസ്വദിക്കാൻ ആഗ്രഹിക്കുന്ന കായികപ്രേമികൾക്കായി ഖത്തറിൽ വിപുലമായ ക്രമീകരണങ്ങൾ. ഔദ്യോഗിക ഫാൻ സോണുകൾ മുതൽ പ്രമുഖ ഷോപ്പിംഗ് മാളുകളും ആഡംബര ഹോട്ടലുകളും വരെ ആരാധകർക്കായി വലിയ സ്ക്രീനുകളും മികച്ച വിനോദ പരിപാടികളും ഒരുക്കിയിട്ടുണ്ട്.അൽ മഹ ഐലന്റിൽ ഒരുക്കിയിരിക്കുന്ന 'വിസിറ്റ് ഖത്തർ ഫാൻ സോൺ' ആണ് മത്സരങ്ങൾ തത്സമയം കാണാനുള്ള ഏറ്റവും പ്രധാനപ്പെട്ട ഒരിടം. വലിയ സ്ക്രീനുകളിൽ മത്സരങ്ങളുടെ തത്സമയ സംപ്രേക്ഷണത്തോടൊപ്പം വൈവിധ്യമാർന്ന വിനോദ പരിപാടികളും ഇവിടെ ഒരുക്കിയിട്ടുണ്ട്. വൈകുന്നേരം 6:00 മണി മുതൽ രാവിലെ 7:00 മണി വരെയാണ് ഇവിടെ പ്രവേശനം അനുവദിക്കുന്നത്. ആവേശകരമായ അന്തരീക്ഷത്തിൽ കളി കാണാൻ ആഗ്രഹിക്കുന്നവർക്ക് പറ്റിയ മികച്ചൊരു കേന്ദ്രമാണിത്.കുടുംബത്തോടൊപ്പം കളി കാണാൻ ആഗ്രഹിക്കുന്നവർക്കായി മാൾ ഓഫ് ഖത്തറിൽ ഭീമൻ സ്ക്രീനുകൾ സ്ഥാപിച്ചിട്ടുണ്ട്. മികച്ച ദൃശ്യാനുഭവത്തിന് പുറമെ കുട്ടികൾക്കും മുതിർന്നവർക്കുമായി വിനോദ പരിപാടികളും പ്രത്യേക ഷോകളും ഇവിടെ അരങ്ങേറുന്നുണ്ട്. ഷോപ്പിംഗിനും ഭക്ഷണത്തിനുമൊപ്പം ലോകകപ്പ് മത്സരങ്ങളും ആസ്വദിക്കാമെന്നതാണ് ഇവിടുത്തെ പ്രത്യേകത.
ഇവയ്ക്ക് പുറമെ ഖത്തറിലെ 43 പ്രമുഖ ഹോട്ടലുകളിലും ലോകകപ്പ് മത്സരങ്ങൾ തത്സമയം പ്രദർശിപ്പിക്കാൻ പ്രത്യേക സ്ക്രീനുകൾ സജ്ജീകരിച്ചിട്ടുണ്ട്. മികച്ച ഭക്ഷണവും ഹൃദ്യമായ അന്തരീക്ഷവും ആഗ്രഹിക്കുന്ന ആരാധകർക്കായി ഈ ഹോട്ടലുകൾ വ്യത്യസ്തമായ പാക്കേജുകളും സൗകര്യങ്ങളുമാണ് വാഗ്ദാനം ചെയ്യുന്നത്.
