ന്യൂഡൽഹി: ഒരു നൂറ്റാണ്ട് മുൻപ്, കറുത്ത കോട്ടിട്ട് കോടതിമുറികളിൽ വാദിക്കാൻ സ്ത്രീകൾക്ക് അനുവാദമില്ലാതിരുന്ന ഒരു കാലമുണ്ടായിരുന്നു. അധിനിവേശ ഭരണകൂടത്തിന്റെ വിലക്കുകളെ തോൽപിച്ച്, പതിറ്റാണ്ടുകൾ നീണ്ട പോരാട്ടത്തിലൂടെ നേടിയെടുത്തതാണ് ഇന്നത്തെ ഓരോ നേട്ടവും. ഈ ചരിത്രസ്മരണകൾ പുതുക്കിക്കൊണ്ടാണ് സുപ്രീം കോടതി ചീഫ് ജസ്റ്റിസ് സൂര്യകാന്ത് ഹൈക്കോടതി കൊളീജിയങ്ങൾക്കായി ഒരു സുപ്രധാന സന്ദേശം നൽകിയത്: "നീതിപീഠത്തിലെ സ്ത്രീസാന്നിധ്യം ഇനി ഒരു അപവാദമാകരുത്, അതൊരു പതിവാകണം."
​സീനിയർ അഭിഭാഷകരായ മഹാലക്ഷ്മി പാവനിയും ശോഭ ഗുപ്തയും ചേർന്ന് സംഘടിപ്പിച്ച "പകുതി രാഷ്ട്രം, പകുതി ബെഞ്ച്" (Half the Nation, Half the Bench) എന്ന രാജ്യാന്തര വനിതാ നിയമ സമ്മേളനത്തിലായിരുന്നു അദ്ദേഹത്തിന്റെ ഈ ശ്രദ്ധേയമായ ഇടപെടൽ.

​ഫാത്തിമ ബീവിയുടെ പിൻഗാമികൾക്കായി...

​ഇന്ത്യൻ നീതിന്യായ ചരിത്രത്തിലെ വിപ്ലവമായ ജസ്റ്റിസ് ഫാത്തിമ ബീവിയെ ചീഫ് ജസ്റ്റിസ് തന്റെ പ്രസംഗത്തിൽ അനുസ്മരിച്ചു. "1989-ൽ സുപ്രീം കോടതിയുടെ ആദ്യ വനിതാ ജഡ്ജിയായി നിയമിതയായപ്പോൾ അവർ പറഞ്ഞു, 'ഞാൻ വാതിൽ തുറന്നു' എന്ന്. ആ വാതിൽ ഇനി ഒരിക്കലും അടയരുത്, അത് കൂടുതൽ വിപുലമാകണം," അദ്ദേഹം പറഞ്ഞു.

​മാറേണ്ട മാനദണ്ഡങ്ങൾ .

ഹൈക്കോടതികളിലേക്കുള്ള നിയമനങ്ങളിൽ സ്ത്രീകൾക്ക് കൂടുതൽ പരിഗണന നൽകാൻ കൊളീജിയങ്ങൾ തയ്യാറാകണമെന്ന് അദ്ദേഹം ആവശ്യപ്പെട്ടു. പ്രായപരിധി പോലുള്ള സാങ്കേതിക കാരണങ്ങൾ പറഞ്ഞ് യോഗ്യരായ വനിതാ അഭിഭാഷകരെ തഴയുന്ന രീതി മാറണം. സുപ്രീം കോടതിയിൽ പ്രാക്ടീസ് ചെയ്യുന്ന മിടുക്കരായ വനിതാ അഭിഭാഷകരെ അവരുടെ മാതൃസംസ്ഥാനങ്ങളിലെ ഹൈക്കോടതികളിലേക്ക് പരിഗണിക്കാൻ മടിക്കരുതെന്നും അദ്ദേഹം ഓർമ്മിപ്പിച്ചു.

​പ്രതീക്ഷ നൽകുന്ന കണക്കുകൾ

​താഴെത്തട്ടിലുള്ള കോടതികളിൽ (District Judiciary) മാറ്റത്തിന്റെ കാറ്റ് വീശിത്തുടങ്ങിയതായി ചീഫ് ജസ്റ്റിസ് ചൂണ്ടിക്കാട്ടി. നിലവിൽ അവിടെ 37 ശതമാനത്തോളം ജഡ്ജിമാർ വനിതകളാണ്. അടിത്തറ ശക്തമാകുമ്പോൾ അതിന്റെ പ്രതിഫലനം വൈകാതെ തന്നെ ഉയർന്ന കോടതികളിലും ഉണ്ടാകുമെന്ന് അദ്ദേഹം പ്രത്യാശ പ്രകടിപ്പിച്ചു.സ്ത്രീകളുടെ ജീവിതാനുഭവങ്ങളും ലോകവീക്ഷണവും കോടതിമുറികളിൽ എത്തുമ്പോൾ അത് നിയമവ്യവസ്ഥയെ കൂടുതൽ മാനുഷികവും സമ്പന്നവുമാക്കുമെന്ന ഉറപ്പോടെയാണ് ചീഫ് ജസ്റ്റിസ് തന്റെ പ്രസംഗം അവസാനിപ്പിച്ചത്.