​വാഷിംഗ്ടൺ:ഉപയോക്താക്കളുടെl സ്വകാര്യത വർദ്ധിപ്പിക്കുന്നതിനായി 'റെസ്ട്രിക്റ്റഡ് ചാറ്റ്' (Restricted Chat) എന്ന പുതിയ ഫീച്ചർ അവതരിപ്പിച്ച് പ്രമുഖ സന്ദേശമയക്കൽ ആപ്പായ വാട്സാപ്പ്. തെരഞ്ഞെടുത്ത പ്രധാനപ്പെട്ട വ്യക്തിഗത സംഭാഷണങ്ങൾ പ്രൈമറി ഫോണിൽ മാത്രം ഒതുക്കി നിർത്താനും, കമ്പ്യൂട്ടറുകൾ, ടാബ്‌ലെറ്റുകൾ തുടങ്ങിയ ലിങ്ക് ചെയ്ത മറ്റ് ഉപകരണങ്ങളിൽ അവ ദൃശ്യമാകാതിരിക്കാനും ഈ ഫീച്ചർ സഹായിക്കും.
​വാട്സാപ്പിൽ നിലവിലുണ്ടായിരുന്ന 'അഡ്വാൻസ്ഡ് ചാറ്റ് പ്രൈവസി' ടൂളിന്റെ പരിഷ്കരിച്ച പതിപ്പാണിത്. നിലവിൽ ആൻഡ്രോയിഡ്, ഐ.ഒ.എസ് (iOS) പ്ലാറ്റ്‌ഫോമുകളിലെ ബീറ്റാ ടെസ്റ്റർമാർക്കാണ് ഇത് ലഭ്യമാക്കിത്തുടങ്ങിയിട്ടുള്ളത്.ഈ ഫീച്ചർ ഓൺ ചെയ്താൽ, പ്രസ്തുത ചാറ്റുകൾ വാട്സാപ്പ് വെബ്, ഡെസ്ക്ടോപ്പ് ആപ്പുകൾ അല്ലെങ്കിൽ ലിങ്ക് ചെയ്തിട്ടുള്ള മറ്റ് ഫോണുകൾ എന്നിവയിലേക്ക് സിങ്ക് ആകില്ല. പ്രൈമറി ഫോണിലൂടെ മാത്രം സന്ദേശങ്ങൾ അയക്കാനും സ്വീകരിക്കാനും സാധിക്കും.റെസ്ട്രിക്റ്റഡ് ചാറ്റുകളിലൂടെ കൈമാറുന്ന മീഡിയ ഫയലുകൾ ഫോൺ ഗാലറിയിലേക്ക് സ്വയം സേവ് ആകില്ല. കൂടാതെ, ഈ ചാറ്റുകൾ എക്‌സ്‌പോർട്ട് ചെയ്യാനോ മെറ്റാ എ.ഐ (Meta AI) ഫീച്ചറുകൾ ഇവയിൽ ഉപയോഗിക്കാനോ സാധിക്കില്ല.ലിങ്ക് ചെയ്ത ഉപകരണങ്ങൾ വഴി വാട്സാപ്പ് സന്ദേശങ്ങൾ ചോർത്തുന്ന അനൗദ്യോഗിക ആപ്പുകളിൽ നിന്നും എ.ഐ ഏജന്റുകളിൽ നിന്നും ഈ ഫീച്ചറിലൂടെ ചാറ്റുകളെ സംരക്ഷിക്കാം.
​ചാറ്റ് ഇൻഫർമേഷൻ സ്‌ക്രീനിൽ നിന്ന് ഉപയോക്താക്കൾക്ക് ഈ ഫീച്ചർ തനിയെ ആക്റ്റിവേറ്റ് ചെയ്യാവുന്നതാണ്. സാധാരണ വാട്സാപ്പ് സന്ദേശങ്ങൾ എന്റ്-ടു-എന്റ് എൻക്രിപ്റ്റഡ് (End-to-end encryption) വഴി സുരക്ഷിതമാണെന്നും, ഇത് അധിക സ്വകാര്യതയ്ക്കായുള്ള ഓപ്ഷണൽ ഫീച്ചർ മാത്രമാണെന്നും കമ്പനി വ്യക്തമാക്കി. പൊതു ഉപയോക്താക്കൾക്കായി എന്ന് ലഭ്യമാക്കുമെന്ന തീയതി വാട്സാപ്പ് പ്രഖ്യാപിച്ചിട്ടില്ല.