ഇംഗ്ലണ്ടിനെതിരെ രണ്ടാം ടെസ്റ്റിൽ വിജയിച്ചതിന് പിന്നാലെ ആകാശ് ദീപ് ആണ് ഹീറോയാവുന്നത്. ബുമ്രയുടെ അഭാവത്തിൽ ഇന്ത്യയുടെ ബിർമിങ്ഹാമിലെ അവസ്ഥ ദയനീയമാവും എന്നായിരുന്നു ഏവരും കരുതിയിരുന്നത്. എന്നാൽ, എഡ്ജ്ബാസ്റ്റണിലെ ഇന്ത്യയുടെ ചരിത്ര ജയത്തോടെ ആകാശ് ദീപ് എന്ന താരം ഇന്ത്യൻ ക്രിക്കറ്റ് ആരാധകരുടെ മനസ്സിൽ ഹീറോയായി മാറുകയായിരുന്നു. എന്നാൽ, ആകാശ് ദീപ് എന്ന ക്രിക്കറ്ററുടെ ഉദയത്തിന് പിന്നിൽ ഇന്ത്യയുടെ മുൻ ക്യാപ്റ്റൻ സൗരവ് ​ഗാം​ഗുലിക്ക് വലിയൊരു പങ്കുണ്ട്. ഇം​ഗ്ലണ്ടിനെതിരായ ടെസ്റ്റിലൊന്നാകെ 10 വിക്കറ്റെടുത്ത ആകാശ് ദീപ് ഇന്ന് രാജ്യത്തിന്റെയാകെ പ്രശംസകൾ ഏറ്റുവാങ്ങുമ്പോൾ അതിന്റെ ഒരുപങ്കിന് സൗരവ് ​ഗാം​ഗുലിയും അർഹനാണ്.

ആകാശ് ദീപിനെപ്പോലുള്ള പ്രതിഭാധനരായ കളിക്കാർക്ക് ഉയർന്നുവരാനും അഭിവൃദ്ധി പ്രാപിക്കാനും കഴിയുന്ന ഒരു അന്തരീക്ഷം ഇന്ത്യൻ ക്രിക്കറ്റിൽ സൃഷ്ടിച്ചത് ​ഗാം​ഗുലിയാണ്. ബം​ഗാൾ‍ ക്രിക്കറ്റ് അസോസിയേഷൻ പ്രസിഡന്റാ‌യിരിക്കെ സൗരവ് ​ഗാം​ഗുലി ആവിഷ്കരിച്ച് നടപ്പാക്കിയ പദ്ധതികളാണ് ആകാശ് ദീപിനെ ക്രിക്കറ്റ് ലോകത്തേക്ക് എത്തിച്ചത്. 

സൗരവ് ഗാംഗുലി ബം​ഗാൾ ക്രിക്കറ്റ് അസോസിയേഷൻ പ്രസിഡന്റായിരിക്കെ ബംഗാളിലെ പ്രതിഭകളെ വികസിപ്പിക്കുന്നതിനായി വിഷൻ 2020 പരിപാടി ആരംഭിച്ചിരുന്നു. യുവപ്രതിഭകൾക്ക് പരിശീലനം, താമസം, അവസരങ്ങൾ എന്നിവലഭ്യമാക്കുന്ന പദ്ധതിയായിരുന്നു ഇത്. ആകാശ് ദീപിനും ഈ പദ്ധതിയുടെ ഭാ​ഗമായുള്ള പരിശീലനം ലഭിച്ചിരുന്നു. ഇത് അദ്ദേഹത്തിന്റെ ബംഗാൾ അണ്ടർ-23, സീനിയർ അരങ്ങേറ്റങ്ങളിലേക്ക് നയിച്ചു. സിറാജിനോടും ഷാമിയോടും താരതമ്യം ചെയ്തുകൊണ്ട് ഗാംഗുലി അദ്ദേഹത്തിന്റെ വേഗതയെയും കഴിവിനെയും പരസ്യമായി പ്രശംസിച്ചിട്ടുണ്ട്.