ദോഹ: ഖത്തറിൽ നടക്കുന്ന വിവിധ പരിപാടികളുടെയും വിനോദസഞ്ചാര പ്രവർത്തനങ്ങളുടെയും ടിക്കറ്റുകൾ എളുപ്പത്തിൽ ബുക്ക് ചെയ്യുന്നതിനായി ഏകീകൃത ഡിജിറ്റൽ പ്ലാറ്റ്ഫോം അവതരിപ്പിക്കാനൊരുങ്ങി വിസിറ്റ് ഖത്തർ (Visit Qatar). രാജ്യത്തെ സ്വദേശികൾക്കും പ്രവാസികൾക്കും സന്ദർശകർക്കും ഒരേപോലെ ഉപയോഗപ്രദമാകുന്ന രീതിയിലാണ് പ്ലാറ്റ്ഫോം രൂപകൽപ്പന ചെയ്യുന്നത്.
'ഖത്തർ കലണ്ടർ 2026-2027' പ്രകാശന ചടങ്ങിൽ വിസിറ്റ് ഖത്തർ സി.ഇ.ഒ എൻജിനീയർ അബ്ദുൽ അസീസ് അലി അൽ മൗലവിയാണ് ഇതുസംബന്ധിച്ച പ്രഖ്യാപനം നടത്തിയത്. വിസിറ്റ് ഖത്തറുമായി ബന്ധിപ്പിച്ചായിരിക്കും ഈ പ്ലാറ്റ്ഫോം പ്രവർത്തിക്കുക.
ഡിജിറ്റൽ സേവനങ്ങൾ കൂടുതൽ എളുപ്പമാക്കുന്നതിന്റെ ഭാഗമായി മൊബൈൽ സ്ക്രീൻ ഹോം വിജറ്റ് (Widget) ഫീച്ചറും പുറത്തിറക്കിയിട്ടുണ്ട്. ഐഫോൺ ഉപയോക്താക്കൾക്ക് നിലവിൽ ലഭ്യമായ ഈ ഫീച്ചർ ഉടൻ തന്നെ ആൻഡ്രോയിഡ് ഫോണുകളിലും ലഭ്യമാകും. ഇതിലൂടെ രാജ്യത്ത് നടക്കുന്ന എല്ലാ പരിപാടികളുടെയും തത്സമയ വിവരങ്ങൾ ഫോൺ സ്ക്രീനിൽ തന്നെ കാണാൻ സാധിക്കും.
ഈ വർഷാവസാനത്തോടെ പുതിയ ടിക്കറ്റിംഗ് പ്ലാറ്റ്ഫോം പൂർണ്ണമായും പ്രവർത്തനസജ്ജമാകുമെന്ന് എൻജിനീയർ അൽ മൗലവി വ്യക്തമാക്കി.
