ദോഹ: പശ്ചിമേഷ്യയിൽ 'യുദ്ധവുമില്ല, സമാധാനവുമില്ല' എന്ന അനിശ്ചിതാവസ്ഥ തുടരുന്നത് അപകടകരമാണെന്നും ഇത് മേഖലയിലെ രാജ്യങ്ങളുടെ സമ്പദ്വ്യവസ്ഥയെയും വികസന സാധ്യതകളെയും തളർത്തുകയാണെന്നും ഖത്തർ മുന്നറിയിപ്പ് നൽകി. വിദേശകാര്യ മന്ത്രാലയം സംഘടിപ്പിച്ച പ്രതിവാര മാധ്യമ അവലോകനത്തിൽ മീഡിയ ആൻഡ് കമ്മ്യൂണിക്കേഷൻസ് ഡയറക്ടർ ഇബ്രാഹിം ബിൻ സുൽത്താൻ അൽ ഹാഷ്മിയാണ് രാജ്യത്തിന്റെ നിലപാട് വ്യക്തമാക്കിയത്.
ചർച്ചകൾ പുനരാരംഭിക്കുന്നതിനും നയതന്ത്ര പരിഹാരങ്ങൾ കണ്ടെത്തുന്നതിനുമായി പ്രാദേശിക, അന്തർദേശീയ പങ്കാളികളുമായി ഖത്തർ തുടർന്നുപോരുന്ന ശ്രമങ്ങൾ അദ്ദേഹം വിശദീകരിച്ചു. ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽ താനിയുടെ ചൈന സന്ദർശനത്തിന്റെ പശ്ചാത്തലത്തിൽ, ബീജിംഗുമായുള്ള സഹകരണം കൂടുതൽ ഊർജ്ജിതമാക്കിയതായി അൽ ഹാഷ്മി ചൂണ്ടിക്കാട്ടി.അന്താരാഷ്ട്ര ജലപാതയായ ഹോർമുസ് കടലിടുക്ക് ഉടനടി, നിബന്ധനകളില്ലാതെ തുറന്നുനൽകുന്നത് ഖത്തറിന്റെയും മേഖലയിലെ മറ്റ് രാജ്യങ്ങളുടെയും പ്രഥമ പരിഗണനയാണെന്ന് അദ്ദേഹം പറഞ്ഞു. ആഗോള ഊർജ്ജ വിതരണത്തിനും വ്യാപാരത്തിനും ഇത് അത്യന്താപേക്ഷിതമാണ്.ഇറാൻ നടത്തിയത് അമേരിക്കൻ സൈനിക കേന്ദ്രങ്ങൾക്ക് നേരെയുള്ള നിയന്ത്രിത ആക്രമണം മാത്രമായിരുന്നുവെന്ന അവകാശവാദങ്ങളെ ഖത്തർ തള്ളി. സിവിലിയൻ, സാമ്പത്തിക കേന്ദ്രങ്ങളെ നേരിട്ട് ലക്ഷ്യമിട്ട് ഇറാൻ നടത്തിയ ആക്രമണങ്ങളെക്കുറിച്ചുള്ള വിശദമായ തെളിവുകൾ അടങ്ങിയ നൂറുകണക്കിന് ഔദ്യോഗിക കത്തുകൾ ഐക്യരാഷ്ട്രസഭയുടെ സെക്യൂരിറ്റി കൗൺസിലിനും ജനറൽ അസംബ്ലിക്കും ഖത്തർ കൈമാറിയിട്ടുണ്ടെന്ന് അദ്ദേഹം വെളിപ്പെടുത്തി.ഖത്തറിനെ 'ശത്രുരാജ്യം' എന്ന് വിശേഷിപ്പിച്ച ഇസ്രായേൽ നിലപാടിനെയും അദ്ദേഹം വിമർശിച്ചു. ഫലസ്തീനിൽ ഇസ്രായേൽ നടത്തുന്ന വംശഹത്യയും ക്രൂരതകളും 'മിഡിൽ ഈസ്റ്റിലെ ഏക ജനാധിപത്യ രാജ്യം' എന്ന അവരുടെ അവകാശവാദങ്ങളെ പൂർണ്ണമായും തകർക്കുന്നതാണ്. ആഭ്യന്തര രാഷ്ട്രീയ നേട്ടങ്ങൾക്കായി നടത്തുന്ന ഇത്തരം പ്രസ്താവനകളിൽ ഖത്തർ ഭയപ്പെടില്ലെന്നും, സമാധാനത്തിനായുള്ള മധ്യസ്ഥ ശ്രമങ്ങളുമായി ഉത്തരവാദിത്തമുള്ള പങ്കാളിയായി രാജ്യം മുന്നോട്ടുപോകുമെന്നും അദ്ദേഹം വ്യക്തമാക്കി.
