കൊല്ലം: വിഴിഞ്ഞത്തെ ഒരു ഹോട്ടലിൽ നിന്ന് ഭക്ഷണം കഴിച്ചതിന് പിന്നാലെ ഒരു കുടുംബത്തിലെ രണ്ട് പേർ മരിച്ചു. നിലമേൽ സ്വദേശിനി റഷീദാ ബീവിയും മരുമകൻ ഷാജിയുമാണ് മരണപ്പെട്ടത്. സംഭവത്തിൽ ഭക്ഷ്യവിഷബാധയെന്ന സംശയത്തെ തുടർന്ന് വിഴിഞ്ഞത്തെ സായാഹ്ന ഹോട്ടൽ പൊലീസ് അടച്ചുപൂട്ടി.
ഞായറാഴ്ച രാത്രി ഒൻപതോടെ ആറംഗ കുടുംബം ഹോട്ടലിൽ നിന്ന് ഭക്ഷണം കഴിച്ചതിന് പിന്നാലെ സംഘത്തിലെ നാലുപേർക്ക് ഛർദി ഉൾപ്പെടെയുള്ള അസ്വസ്ഥതകൾ ആരംഭിച്ചു. ഉടൻ ആശുപത്രിയിൽ പ്രവേശിപ്പിച്ചെങ്കിലും റഷീദാ ബീവിയുടെയും ഷാജിയുടെയും ജീവൻ രക്ഷിക്കാനായില്ല. ഷാജിയുടെ ഭാര്യ ചികിത്സയിൽ തുടരുകയാണ്. കുട്ടികൾക്ക് ആരോഗ്യപ്രശ്നങ്ങളില്ലെന്നാണ് വിവരം.
മൃതദേഹങ്ങൾ തിരുവനന്തപുരം മെഡിക്കൽ കോളേജ്, പാരിപ്പള്ളി മെഡിക്കൽ കോളേജ് ആശുപത്രി എന്നിവിടങ്ങളിൽ സൂക്ഷിച്ചിരിക്കുകയാണ്. ശാസ്ത്രീയ പരിശോധനകൾ പൂർത്തിയായ ശേഷമേ മരണകാരണം സ്ഥിരീകരിക്കാനാകൂവെന്ന് പൊലീസ്-ആരോഗ്യവകുപ്പ് അധികൃതർ അറിയിച്ചു. ഉച്ചയ്ക്ക് ശേഷം മത്സ്യവിഭവങ്ങൾ വിൽക്കുന്ന ഹോട്ടലായതിനാൽ ഫുഡ് സേഫ്റ്റി വിഭാഗം അടിയന്തര പരിശോധന നടത്തുമെന്നും അധികൃതർ വ്യക്തമാക്കി.
