​തിരുവനന്തപുരം: തിരുവിതാംകൂർ ദേവസ്വം ബോർഡിൽ ഉദ്യോഗസ്ഥരുടെ സ്ഥലംമാറ്റവുമായി ബന്ധപ്പെട്ട് വൻ അഴിമതിക്കും ക്രമക്കേടിനും നീക്കം നടക്കുന്നതായി റിപ്പോർട്ട്. നിലവിലുള്ള കൃത്യമായ മാനദണ്ഡങ്ങളും ബഹുമാനപ്പെട്ട ഹൈക്കോടതിയുടെ ദേവസ്വം ബെഞ്ച് നൽകിയ കർശന നിർദ്ദേശങ്ങളും പൂർണ്ണമായി അട്ടിമറിച്ചുകൊണ്ടാണ് ഈ അണിയറ നീക്കങ്ങൾ നടക്കുന്നത്. വൻ തുക വരുമാനമുള്ള പ്രധാന ക്ഷേത്രങ്ങളിലെ നിയമനങ്ങൾക്ക് ലക്ഷക്കണക്കിന് രൂപ കോഴ വാങ്ങുന്നു എന്നാണ് ഉയർന്നു വന്നിരിക്കുന്ന പ്രധാന ആരോപണം. എന്നാൽ, നിയമവിരുദ്ധമായ ഈ നീക്കങ്ങളെ ദേവസ്വം ബോർഡ് പ്രസിഡന്റ് നേരിട്ട് എതിർക്കുകയും തൽക്കാലത്തേക്ക് കരട് പട്ടിക തടഞ്ഞു വെക്കുകയും ചെയ്തിട്ടുണ്ട്.
​ദേവസ്വം ബോർഡ് ആസ്ഥാനം കേന്ദ്രീകരിച്ച് പ്രവർത്തിക്കുന്ന ചില ഉന്നതരാണ് ഈ വൻ ക്രമക്കേടുകൾക്ക് പിന്നിലെന്നാണ് സൂചന. അഡ്മിനിസ്ട്രേറ്റീവ് ഓഫീസർ, അസിസ്റ്റന്റ് കമ്മീഷണർ തുടങ്ങിയ പ്രധാന തസ്തികകളിലേക്കാണ് നിയമവിരുദ്ധമായി ആളുകളെ തിരുകിക്കയറ്റാൻ ശ്രമിക്കുന്നത്. ഒരു വർഷം ക്ഷേത്രങ്ങളിൽ ഓഫീസർമാരായി നിയമിക്കപ്പെടുന്നവരെ അടുത്ത വർഷം ഗ്രൂപ്പ് ഓഫീസുകളിലേക്ക് മാറ്റണമെന്നാണ് നിയമം. കൂടാതെ, സാമ്പത്തിക കാര്യങ്ങളിൽ ഗുരുതര വീഴ്ച വരുത്തിയവരെയോ, ഓഡിറ്റിംഗിൽ കടുത്ത പരാമർശങ്ങൾ നേരിട്ടവരെയോ പ്രധാന ക്ഷേത്രങ്ങളിൽ നിയമിക്കാൻ പാടില്ലെന്ന് വ്യവസ്ഥയുണ്ട്. എന്നാൽ, ഇത്തരം കറുത്ത പുള്ളികളുള്ള ഉദ്യോഗസ്ഥരുടെ വിവരങ്ങൾ പൂർണ്ണമായി മറച്ചുവെച്ചുകൊണ്ടാണ് പുതിയ സ്ഥലംമാറ്റ പട്ടിക തയ്യാറാക്കിയിരിക്കുന്നത്
​മലയാലപ്പുഴ, ചെട്ടികുളങ്ങര, ഏറ്റുമാനൂർ, വള്ളിയങ്കാവ്, തിരുവല്ലം, ശ്രീകണ്ഠേശ്വരം തുടങ്ങിയ ലക്ഷങ്ങൾ വരുമാനമുള്ള മേജർ ക്ഷേത്രങ്ങളിലേക്കാണ് ഉദ്യോഗസ്ഥരുടെ അപേക്ഷകളും ശുപാർശകളും ഏറെയുമുള്ളത്. ഈ ക്ഷേത്രങ്ങളിൽ അഡ്മിനിസ്ട്രേറ്റീവ് ഓഫീസർമാരാകുന്നവർക്ക് ശമ്പളത്തിന് പുറമെ വഴിപാടുകളിലൂടെയും മറ്റും വൻ തുക മാസംതോറും ലഭിക്കാറുണ്ട്. വഴിപാടുകൾക്കായി ഭക്തരിൽ നിന്നും വാങ്ങുന്ന തുകയുടെ പകുതി മാത്രമാണ് ബോർഡിന് ലഭിക്കുന്നത്; ബാക്കി തുക പൂജാദ്രവ്യങ്ങൾ വാങ്ങി നൽകുന്ന ഉദ്യോഗസ്ഥർക്കാണ് ലഭിക്കുന്നത്. ഈ വൻ വരുമാനം ലക്ഷ്യമിട്ടാണ് ഇത്തരം ക്ഷേത്രങ്ങളിലെ നിയമനത്തിനായി 15 മുതൽ 20 ലക്ഷം രൂപ വരെ കോഴയായി കൈമാറുന്നത്.
​വിജിലൻസ് അന്വേഷണ റിപ്പോർട്ടിൽ പേരുള്ളവരെയും, മുൻപ് ബോർഡിലേക്ക് അടയ്ക്കേണ്ട തുക കൃത്യസമയത്ത് അടയ്ക്കാത്തവരെയും ഇത്തരം തസ്തികകളിൽ നിയമിക്കരുതെന്നും, അവർക്കെതിരെ ക്രിമിനൽ കേസെടുത്ത് മൂന്ന് വർഷത്തേക്ക് നിയമന വിലക്ക് ഏർപ്പെടുത്തണമെന്നും വ്യക്തമായ നിയമമുണ്ട്. രണ്ടു വർഷം മുൻപ് ക്ഷേത്രത്തിൽ നിന്നും പണം അപഹരിക്കുകയും കഴിഞ്ഞ മാസത്തെ ഓഡിറ്റിൽ അത് കണ്ടെത്തുകയും ചെയ്ത ഉദ്യോഗസ്ഥർ വരെ ഈ പുതിയ പട്ടികയിലുണ്ടെന്നാണ് പുറത്തുവരുന്ന വിവരങ്ങൾ. ദേവസ്വം കമ്മീഷണർ ഓഫീസിൽ നിന്നും തയ്യാറാക്കിയ കരട് പട്ടികയിൽ ഈ മാനദണ്ഡങ്ങളൊന്നും തന്നെ പാലിച്ചിട്ടില്ലെന്ന് വ്യക്തമായതോടെയാണ് ദേവസ്വം ബോർഡ് പ്രസിഡന്റ് ഇടപെട്ട് പട്ടിക തടഞ്ഞത്.