ദോഹ: ഖത്തർ പോലീസ് അക്കാദമിക്ക് കീഴിലുള്ള പോലീസ് കോളേജ് സംഘടിപ്പിക്കുന്ന 'നാളത്തെ പോലീസ്' (Tomorrow's Police) സമ്മർ പ്രോഗ്രാമിന്റെ ഏഴാം പതിപ്പിലേക്കുള്ള രജിസ്ട്രേഷൻ ഞായറാഴ്ച (മെയ് 10) ആരംഭിക്കും. മെട്രാഷ് 2 (Metrash 2) ആപ്പ് വഴിയാണ് അപേക്ഷകൾ സമർപ്പിക്കേണ്ടതെന്ന് പോലീസ് അക്കാദമി അധികൃതർ വാർത്താസമ്മേളനത്തിൽ അറിയിച്ചു.മെയ് 10 ഞായറാഴ്ച രാവിലെ 9 മണി മുതലാണ് രജിസ്ട്രേഷൻ ആരംഭിക്കുന്നത്. ഒരു ആഴ്ചയോളമോ അല്ലെങ്കിൽ നിശ്ചിത സീറ്റുകൾ പൂർത്തിയാകുന്നത് വരെയോ അപേക്ഷകൾ സ്വീകരിക്കും. മെട്രാഷ് ആപ്പിലെ 'സിറ്റിസൺസ്' (Citizens) വിൻഡോയിൽ 'ടുമാറോസ് പോലീസ്' എന്ന ഐക്കൺ വഴി ലളിതമായ ഘട്ടങ്ങളിലൂടെ രക്ഷിതാക്കൾക്ക് കുട്ടികളെ രജിസ്റ്റർ ചെയ്യാം.2014-നും 2017-നും ഇടയിൽ ജനിച്ച ഖത്തറി വിദ്യാർത്ഥികൾക്കാണ് പ്രവേശനം.ജൂൺ, ജൂലൈ മാസങ്ങളിലായി മൂന്ന് ഘട്ടങ്ങളിലായാണ് പ്രോഗ്രാം നടപ്പിലാക്കുന്നത്.സൈനിക പരിശീലനം, കായിക പ്രവർത്തനങ്ങൾ, ഫീൽഡ് വിസിറ്റുകൾ എന്നിവ പരിശീലനത്തിന്റെ ഭാഗമായിരിക്കും.
യുവതലമുറയിൽ ദേശീയ സ്വത്വം ദൃഢമാക്കാനും നേതൃപാടവം വളർത്താനുമാണ് ഈ പദ്ധതി ലക്ഷ്യമിടുന്നത്. 2018-ൽ ആരംഭിച്ച ഈ പ്രോഗ്രാം വലിയ ജനപ്രീതിയാണ് നേടിയിട്ടുള്ളത്. 2023-ൽ അറബ് സുരക്ഷയ്ക്കുള്ള 'പ്രിൻസ് നായിഫ് അവാർഡിൽ' മൂന്നാം സ്ഥാനം ഈ പദ്ധതിക്ക് ലഭിച്ചിരുന്നു.
കുട്ടികളിൽ അച്ചടക്കം, ആത്മവിശ്വാസം, സുരക്ഷാ അവബോധം എന്നിവ വളർത്താൻ ലക്ഷ്യമിട്ടുള്ള ഈ സമ്മർ ക്യാമ്പ് ഖത്തറിലെ രക്ഷിതാക്കൾക്കിടയിൽ ഏറെ ശ്രദ്ധേയമാണ്.
