ദീർഘദൂര യാത്രകളിൽ പലപ്പോഴും നമ്മെ അലട്ടുന്ന ഒരു പ്രശ്നം ശുചിമുറികളുടെ അഭാവമാണ്. ഇതിന് സാങ്കേതിക പരിഹാരവുമായി മുന്നോട്ട് വന്നിരിക്കുകയാണ് ചൈനീസ് ഇലക്ട്രിക് വാഹന നിർമ്മാതാക്കളായ സെറസ്. കാറിനുള്ളിൽ തന്നെ ഘടിപ്പിക്കാവുന്ന വോയ്‌സ് കൺട്രോൾഡ് ടോയ്‌ലറ്റിന് കമ്പനി പേറ്റന്റ് സ്വന്തമാക്കിയിരിക്കുകയാണ്.

സീറ്റിനടിയിൽ ഒളിപ്പിച്ചുവെക്കാവുന്ന രീതിയിലാണ് ഈ ‘ഇൻ-വെഹിക്കിൾ ടോയ്‌ലറ്റ്’ രൂപകൽപ്പന ചെയ്തിരിക്കുന്നത്. ആവശ്യമായപ്പോൾ വോയ്‌സ് കമാൻഡ് ഉപയോഗിച്ചോ ബട്ടൺ അമർത്തിയോ ഇത് പുറത്തേക്ക് കൊണ്ടുവരാം. ഉപയോഗം കഴിഞ്ഞാൽ വീണ്ടും അതേ രീതിയിൽ ഒളിപ്പിക്കാം. ദുർഗന്ധം ഒഴിവാക്കാൻ എക്‌സ്‌ഹോസ്റ്റ് സംവിധാനവും ഫാനും ഉൾപ്പെടുത്തിയിട്ടുണ്ട്. ദ്രാവക മാലിന്യങ്ങളെ നീരാവിയാക്കാനും ഖരമാലിന്യങ്ങളെ ഉണക്കി സൂക്ഷിക്കാനും കഴിയുന്ന സാങ്കേതിക സംവിധാനവും ഇതിനുണ്ട്. ടാങ്ക് നിറഞ്ഞാൽ അത് പുറത്തെടുത്ത് വൃത്തിയാക്കാനും സൗകര്യമുണ്ട്.

ചൈനയിലെ ഇലക്ട്രിക് വാഹന വിപണിയിൽ കടുത്ത മത്സരമാണ് നിലനിൽക്കുന്നത്. അതിനാൽ യാത്രാസൗകര്യങ്ങൾക്കപ്പുറം “കാറിനെ ഒരു ലിവിംഗ് സ്പേസ് ആക്കുക” എന്ന ആശയത്തിലേക്കാണ് കമ്പനികൾ നീങ്ങുന്നത്. ദീർഘദൂര യാത്രകൾ, ഹൈവേ ഡ്രൈവുകൾ, ക്യാമ്പിംഗ് അനുഭവങ്ങൾ എന്നിവ കൂടുതൽ സുഖകരമാക്കാനാണ് ഇത്തരം സവിശേഷതകൾ ലക്ഷ്യമിടുന്നത്.

കാറിനുള്ളിൽ ടോയ്‌ലറ്റ് എന്ന ആശയം പുതുമയുള്ളതല്ലെന്നും ശ്രദ്ധിക്കാം. 1950കളിൽ പുറത്തിറങ്ങിയ Rolls-Royce Silver Wraith മോഡലിൽ ഇതിനകം ഇത്തരമൊരു സംവിധാനം ഉണ്ടായിരുന്നുവെന്ന് ചരിത്രം പറയുന്നു. എന്നാൽ ആഡംബര വാഹനങ്ങളിൽ മാത്രം ഒതുങ്ങിയിരുന്ന ഈ സൗകര്യം ഇപ്പോൾ സാധാരണ വിപണിയിലേക്ക് കൊണ്ടുവരാനാണ് ശ്രമം.

ബിവൈഡി പോലുള്ള വലിയ കമ്പനികൾ ആധിപത്യം പുലർത്തുന്ന വിപണിയിൽ പുതുമകൾ കൊണ്ടാണ് കമ്പനികൾ ശ്രദ്ധ നേടുന്നത്. സെറസിന്റെ ഈ നീക്കം അതിന്റെ ഭാഗമായാണ് വിലയിരുത്തപ്പെടുന്നത്. വാഹനം എന്നത് ഇനി യാത്രയ്ക്കുള്ള ഉപകരണമാത്രമല്ല, ഒരാൾക്ക് താമസിക്കാനാകുന്ന സ്വകാര്യ ഇടമായി മാറുന്ന കാലഘട്ടത്തിലാണ് നാം. ആ മാറ്റത്തിന്റെ അടുത്ത ഘട്ടമായി ‘കാറിനുള്ളിലെ ടോയ്‌ലറ്റ്’ മാറുമോ എന്നതാണ് ഇനി കാത്തിരിക്കേണ്ടത്.