തിരുവനന്തപുരം: വിലക്കയറ്റത്തിന്റെ നടുവിലും കേരളീയരുടെ കീശ ചോർത്താതെ, സമൃദ്ധമായ ഓണം ഉറപ്പാക്കുമെന്ന് മുഖ്യമന്ത്രി പിണറായി വിജയൻ. സപ്ലൈകോ ഓണം ഫെയറിന്റെ ഉദ്ഘാടന വേളയിൽ സംസാരിക്കുകയായിരുന്നു അദ്ദേഹം. രാജ്യത്ത് വിലക്കയറ്റം രൂക്ഷമായിരിക്കുമ്പോഴും, മാതൃകാപരമായ വിപണി ഇടപെടലുകളിലൂടെ കേരളം വിലക്കയറ്റം നിയന്ത്രിച്ച് നിർത്തിയെന്നും മുഖ്യമന്ത്രി പറഞ്ഞു.
​കേന്ദ്രസർക്കാരിന്റെ സഹായമില്ലായിരുന്നിട്ടും സംസ്ഥാന സർക്കാർ ഓണത്തിന് വേണ്ടിയുള്ള ഭക്ഷ്യധാന്യങ്ങൾ സംഭരിച്ച് കഴിഞ്ഞു. ഭക്ഷ്യഭദ്രതാ നിയമത്തിന് പുറത്തുള്ള, 57% വരുന്ന മുൻഗണനാ വിഭാഗത്തിന് ഓണത്തിന് 8.30 രൂപയ്ക്ക് അരി നൽകണമെന്ന് ആവശ്യപ്പെട്ടിരുന്നെങ്കിലും ഒരുമണി അരി പോലും അധികമായി നൽകാൻ കഴിയില്ലെന്നായിരുന്നു കേന്ദ്രത്തിന്റെ മറുപടി. ആവശ്യമുണ്ടെങ്കിൽ സ്വകാര്യ കമ്പനികൾക്ക് നൽകുന്ന വിലയ്ക്ക് വാങ്ങിക്കോളൂ എന്നായിരുന്നു അവരുടെ നിലപാട്. ഇതിനിടയിലും, 2.5 ലക്ഷം ക്വിന്റൽ ഭക്ഷ്യധാന്യങ്ങളാണ് സർക്കാർ സംഭരിച്ചത്.

​കൂടുതൽ ഓഫറുകളുമായി സപ്ലൈകോ:

​ബ്രാൻഡഡ് ഉത്പന്നങ്ങൾ: 150-ലധികം ബ്രാൻഡഡ് ഉത്പന്നങ്ങൾക്ക് ഓഫറുകളും വിലക്കുറവുമുണ്ട്.
​വെളിച്ചെണ്ണ: സബ്സിഡി വെളിച്ചെണ്ണയുടെ വില 339 രൂപയായി കുറച്ചു. സബ്സിഡിയില്ലാത്ത വെളിച്ചെണ്ണ 389 രൂപയ്ക്കും കേര വെളിച്ചെണ്ണ 429 രൂപയ്ക്കും ലഭ്യമാകും.
​മൊബൈൽ ഓണച്ചന്തകൾ: ഓണം ഫെയറുകൾക്കു പുറമെ സപ്ലൈകോയുടെ സഞ്ചരിക്കുന്ന ഓണച്ചന്തകളും ഇത്തവണ സജീവമാണ്.
​
അതിരൂക്ഷമായ വിലക്കയറ്റമുള്ള ഈ സമയത്തും ഉപഭോക്തൃ സംസ്ഥാനമായ കേരളത്തിൽ വിലകൾ പിടിച്ചുനിർത്താൻ കഴിഞ്ഞത്, സർക്കാരിന്റെ കൃത്യമായ ഇടപെടൽ കൊണ്ടാണെന്ന് മുഖ്യമന്ത്രി കൂട്ടിച്ചേർത്തു. ഓണം ഫെയറുകളിലും 1000-ൽ അധികം വരുന്ന മറ്റ് സപ്ലൈകോ വിതരണ കേന്ദ്രങ്ങളിലും ഈ ഓഫറുകൾ ലഭ്യമാണ്. കൂടാതെ, ഓഗസ്റ്റിലെ സബ്സിഡി സാധനങ്ങൾ വാങ്ങാത്തവർക്ക് സെപ്റ്റംബറിലെ സാധനങ്ങളോടൊപ്പം അവ മേളകളിൽ നിന്നോ സപ്ലൈകോ വിതരണ കേന്ദ്രങ്ങളിൽ നിന്നോ വാങ്ങാമെന്ന് ഭക്ഷ്യമന്ത്രി ജി.ആർ. അനിൽ അറിയിച്ചു.