ന്യൂഡൽഹി: മുൻകൂർ ജാമ്യാപേക്ഷയിൽ തീരുമാനമെടുക്കാതെ, പ്രതിയെ എന്തുകൊണ്ട് അറസ്റ്റ് ചെയ്തില്ലെന്ന് ചോദിച്ച് പഞ്ചാബ് ആൻഡ് ഹരിയാന ഹൈക്കോടതി. ഈ നടപടിയെ വിമർശിച്ച് സുപ്രീം കോടതി. ഹർജിക്കാരന് ജാമ്യം അനുവദിക്കുകയും ചെയ്തു.
​2021-ൽ രജിസ്റ്റർ ചെയ്ത എഫ്‌ഐആറുമായി ബന്ധപ്പെട്ട കേസിൽ ഗുർസേവക് സിങ് സമർപ്പിച്ച മുൻകൂർ ജാമ്യാപേക്ഷ പരിഗണിച്ചപ്പോഴാണ് പഞ്ചാബ് ആൻഡ് ഹരിയാന ഹൈക്കോടതിയുടെ വിവാദപരമായ ചോദ്യം ചെയ്യൽ. ജാമ്യാപേക്ഷയിൽ തീരുമാനമെടുക്കാതെ, കേസിലെ സഹപ്രതിക്കെതിരെ എന്തുകൊണ്ടാണ് കുറ്റപത്രം സമർപ്പിക്കാത്തതെന്നും നാല് വർഷമായി ഗുർസേവക് സിങ്ങിനെ എന്തുകൊണ്ട് അറസ്റ്റ് ചെയ്തില്ലെന്നും ഹൈക്കോടതി പോലീസിനോട് ചോദിക്കുകയായിരുന്നു.

​ഹൈക്കോടതി ജാമ്യാപേക്ഷയിൽ തീരുമാനമെടുക്കുകയാണ് ചെയ്യേണ്ടിയിരുന്നതെന്ന് സുപ്രീം കോടതി നിരീക്ഷിച്ചു. കൈക്കൂലി വാങ്ങിയെന്ന് ആരോപിക്കപ്പെടുന്ന സഹപ്രതിക്ക് മുൻകൂർ ജാമ്യം ലഭിച്ചതും 2021 മുതൽ സിങ്ങിനെ അറസ്റ്റ് ചെയ്യാത്തതും അദ്ദേഹത്തിന് അനുകൂലമായ ഘടകങ്ങളാണെന്നും സുപ്രീം കോടതി ചൂണ്ടിക്കാട്ടി.

​2023 സെപ്റ്റംബറിൽ സർവീസിൽ തിരിച്ചെടുത്തതിനാൽ തനിക്കെതിരെ കേസില്ലെന്നാണ് സിങ് കരുതിയിരുന്നത്. എന്നാൽ സാമ്പത്തിക കുറ്റകൃത്യ വിഭാഗത്തിന് മുന്നിൽ ഹാജരാകാൻ നിർദേശിച്ചതോടെയാണ് അറസ്റ്റ് ഭയന്നതെന്നും അദ്ദേഹം സുപ്രീം കോടതിയെ അറിയിച്ചു.
​ഹൈക്കോടതിയുടെ സമീപനത്തെ വിമർശിച്ച സുപ്രീം കോടതി, ഹർജിയിൽ സ്വയം തീരുമാനമെടുക്കുകയും ഗുർസേവക് സിങ്ങിനെ അറസ്റ്റ് ചെയ്യുകയാണെങ്കിൽ അന്വേഷണ ഉദ്യോഗസ്ഥൻ നിർദേശിക്കുന്ന വ്യവസ്ഥകൾക്ക് വിധേയമായി ജാമ്യത്തിൽ വിടാനും ഉത്തരവിട്ടു.
​ഈ കേസുമായി ബന്ധപ്പെട്ട ഉദ്ധരണി: 2025 ലൈവ്ലോ (എസ്‌സി) 873.